ଡ.ବିଜୟ କୁମାର ମହାରଣା, ଦେବଗଡ଼ ମଡେଲ କଲେଜର ଅଧ୍ୟକ୍ଷ। କଟକ ଜିଲା ଟାଙ୍ଗୀ ଥାନା ଅନ୍ତର୍ଗତ ଭଗତପୁର ଗ୍ରାମରେ ଜନ୍ମଗ୍ରହଣ କରିଥିବା ବିଜୟଙ୍କ ପ୍ରାଥମିକ ଶିକ୍ଷା ଗାଁ ସ୍କୁଲରୁ ହିଁ ଆରମ୍ଭ ହୋଇଥିଲା। ଏହାପରେ କଙ୍ଗେଇପୁର ଗ୍ରାମ ପଞ୍ଚାୟତ ହାଇସ୍କୁଲରେ ମାଟ୍ରିକ ପାସ୍ କରିବା ପରେ ଜାତୀୟ କବି ବୀରକିଶୋର କଲେଜ, ରେଭେନ୍ଶା କଲେଜରେ ତାଙ୍କର ଉଚ୍ଚତର ଶିକ୍ଷା ସମାପ୍ତ ହୋଇଥିଲା। ଉତ୍କଳ ବିଶ୍ୱବିଦ୍ୟାଳୟରେ ସେ ଓଡ଼ିଆରେ ଏମ୍.ଫିଲ୍ କରିବା ପରେ ବ୍ରହ୍ମପୁର ବିଶବିଦ୍ୟାଳୟରୁ ତୁଳନାତ୍ମକ ଭାଷା ସାହିତ୍ୟ ଉପରେ ଗବେଷଣା କରି ପିଏଚ୍ଡି ଲାଭ କରିଥିଲେ।
r ଆପଣଙ୍କ ପ୍ରଥମ ଚାକିରି କେଉଁଠି ହୋଇଥିଲା ?
୧୯୯୬ ମସିହାରେ ଗଞ୍ଜାମ ଜିଲା ଆସିକା ନିରଞ୍ଜନ ସରକାରୀ ମହିଳା ମହାବିଦ୍ୟାଳୟରେ ଅଧ୍ୟାପକ ଭାବେ ଯୋଗ ଦେଇଥିଲି।
r ଦରମା କିପରି ଖର୍ଚ୍ଚ କରିଥିଲେ ?
ପ୍ରଥମ ଦରମାରେ ମୋ ମାଆଙ୍କ ପାଇଁ ଖଣ୍ଡେ ଶାଢ଼ି କିଣିଥିଲି। ସାଙ୍ଗମାନଙ୍କ ସହ ମିଶି କଟକରେ ସିନେମା ଦେଖିଥିଲି।
r ଆପଣଙ୍କ ଆଦର୍ଶ କିଏ ?
ମୋର ଆଦର୍ଶ ସ୍ବାମୀ ବିବେକାନନ୍ଦ ଓ ମହାତ୍ମା ଗାନ୍ଧୀ। ସେମାନଙ୍କ ସରଳ ନିରାଡମ୍ବର ଜୀବନଚର୍ଯ୍ୟା, ଉଚ୍ଚ ଆଧ୍ୟାତ୍ମିକ ଦର୍ଶନ , ସେବା ମନୋଭାବ , ଅହିଂସା ମାର୍ଗ ମତେ ସର୍ବଦା ପ୍ରଭାବିତ କରିଛି
r ଆପଣଙ୍କ ଜୀବନରେ ଘଟିଥିବା କିଛି ଅଭୁଲା କଥା?
ନିଶ୍ଚୟ। ଦିନେ ମୁଁ ମୋର ସାଙ୍ଗ ପ୍ରିୟବ୍ରତ ପାତ୍ରଙ୍କ ସହ ଛତିଶଗଡ଼ର ଅମରକଣ୍ଟକ ଯାଇଥାଉ। ସେଠାକାର ଏକ ଛୋଟ ହୋଟେଲରେ ଆମେ ଖାଇବାକୁ ବସିଥାଉ। ଜଣେ ଯୁବକ ନିଜ ଖାଦ୍ୟ ଅଧା ଖାଇ ଉଠିଯାଇଥିଲେ। ଏହା ଦେଖି ଦୋକାନୀ ଜଣକ ଚିତ୍କାର କଲେ, ଆପଣ ଖାଦ୍ୟ ଫିଙ୍ଗିଲେ ମୁଁ ଦୁଇ ଗୁଣ ପଇସା ନେବି l ଖାଇବାକୁ ଇଚ୍ଛା ନ ଥିଲେ ଅଳ୍ପ ଖାଦ୍ୟ ନେଇଥାନ୍ତେ। ଖାଦ୍ୟ ନଷ୍ଟ କରିବାର ଅଧିକାର ତୁମର ନାହିଁ। ସେଦିନ କଥା ଆଜି ବି ମୋର ମନ ଅଛି। ସେହି ଦୋକାନୀଙ୍କ ତାଗିଦ୍ ଆମକୁ ବି ସଚେତନ କରିଥିଲା।
* କଳା ପ୍ରତି ରୁଚି ରଖନ୍ତି କି?
ନିଶ୍ଚୟ l କଳା ମୋର ଆତ୍ମା କହିଲେ ଭୁଲ୍ ହେବ ନାହିଁ l ମୁଁ କ୍ଲାସିକାଲ ନାଚ ଗୀତ ଦେଖିବାକୁ ଓ ଶୁଣିବାକୁ ବହୁତ ଭଲ ପାଏ l ଉଭୟ ହିନ୍ଦୀ ଓ ଓଡ଼ିଆ ଭାଷାରେ କବିତା ଓ ପ୍ରବନ୍ଧ ଲେଖେ।
* କେଉଁ ଫିଲ୍ମ ଦେଖିବାକୁ ଆପଣ ପସନ୍ଦ କରନ୍ତି?
ସାମାଜିକ ସମସ୍ୟାମୂଳକ ବାସ୍ତବବାଦୀ ଓ କଳାତ୍ମକ ଫିଲ୍ମ ମୋର ପସନ୍ଦ। ରିମେକ ଆକ୍ସନ ମୁଭି ମତେ ଭଲ ଲାଗେନା l
* ଅବସର ସମୟରେ କ’ଣ କରନ୍ତି ?
ସମୟ ମିଳିଲେ ମୁଁ ବୁଲାବୁଲି କରି ଲୋକ ଜୀବନ ଓ ସଂସ୍କୃତିକୁ ଅଧ୍ୟୟନ କରେ l ଟିଭିରେ ନିଉଜ ଓ ଖେଳ ଦେଖେ l
* ପରିବାର ପାଇଁ କେତେ ସମୟ ଦିଅନ୍ତି ?
ମା ,ସ୍ତ୍ରୀ,ଝିଅ ଓ ପୁଅକୁ ନେଇ ମୋର ଛୋଟ ପରିବାର। ଟିକିଏ ସମୟ ମିଳିଲେ ସେମାନଙ୍କ ସହିତ ଗପ କରେ। ଏକାଠି ବସି ବିଭିନ୍ନ ପ୍ରସଙ୍ଗରେ ଆଲୋଚନା କରୁ।
* ଆପଣଙ୍କ ରୁଚି ?
ପୁସ୍ତକ ପଢିବାକୁ ଭଲ ପାଏ। ଉଭୟ ଓଡ଼ିଆ ଓ ହିନ୍ଦୀ ଭାଷାର ବହି ପଢିଥାଏ।
