କଟକ ଅଫିସ,୨୬ା୧୦- ଓଡ଼ିଶା ମାଧ୍ୟମିକ ଶିକ୍ଷା ପରିଷଦ(ବୋର୍ଡ) ଦ୍ୱାରା ପରିଚାଳିତ ନବମ ଶ୍ରେଣୀ ସମ୍ମେଟିଭ ଆସେସ୍ମେଣ୍ଟ(ଏସ୍ଏ)-୧ ପରୀକ୍ଷା ଗୁରୁବାରଠାରୁ ଆରମ୍ଭ ହୋଇ ଆସନ୍ତା ନଭେମ୍ବର ୨ ତାରିଖ ପର୍ଯ୍ୟନ୍ତ ଚାଲିବ। ରାଜ୍ୟର ୫ ଲକ୍ଷ ୭୪ ହଜାର ୭୦୨ ଜଣ ପରୀକ୍ଷାର୍ଥୀ ୪୧୪ କେନ୍ଦ୍ରରେ ପରୀକ୍ଷା ଦେବେ। ସେହିଭଳି ସଂସ୍କୃତ ମଧ୍ୟମାରେ ୩,୨୦୫ ଜଣ ନବମ ଶ୍ରେଣୀ ଛାତ୍ରୀଛାତ୍ର ୭୫ଟି କେନ୍ଦ୍ରରେ ପରୀକ୍ଷା ଦେବାକୁ ବୋର୍ଡ ପକ୍ଷରୁ ବ୍ୟବସ୍ଥା କରାଯାଇଛି। ପ୍ରଥମ ଦିନରେ ଇଂଲିଶ ବିଷୟରେ ପରୀକ୍ଷା ହେବ। ସେହିପରି ୨୮ରେ ପ୍ରଥମ ଭାଷା ଓଡ଼ିଆ, ୨୯ରେ ତୃତୀୟ ଭାଷା ହିନ୍ଦୀ ଓ ସଂସ୍କୃତ, ୩୧ରେ ଗଣିତ, ନଭେମ୍ବର ୧ରେ ସାଧାରଣ ବିଜ୍ଞାନ ଓ ୨ ତାରିଖରେ ସାମାଜିକ ବିଜ୍ଞାନ ବିଷୟରେ ପରୀକ୍ଷା ହେବ। ସମସ୍ତ ନୋଡାଲ ସ୍କୁଲଗୁଡିକରେ ପରୀକ୍ଷା ନିମନ୍ତେ ପ୍ରଶ୍ନପତ୍ର ପହଁଞ୍ଚି ସାରିଛି। ସ୍କୁଲ କର୍ତ୍ତୃପକ୍ଷ ନୋଡାଲ ସେଣ୍ଟରଗୁଡିକରୁ ପ୍ରଶ୍ନପତ୍ର ଗ୍ରହଣ କରିବେ। ଏଥିପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି ବୋଲି ବୋର୍ଡ ସଭାପତି ରାମାଶିଷ ହାଜରା ସୂଚନା ଦେଇଛନ୍ତି।
