ନୂଆଦିଲ୍ଲୀ,୧୫।୨: ପ୍ରେମ ଏକ ଅଭୁଲା ଅନୁଭୁତି। ଦାମ୍ପତ୍ୟ ଜୀବନର ସ୍ଥାୟୀତ୍ୱ ସ୍ତ୍ରୀ-ସ୍ବାମୀଙ୍କ ମଧ୍ୟରେ ଥିବା ଭଲ ପାଇବା ଉପରେ ହିଁ ନିର୍ଭର କରିଥାଏ। ବିବାହ ପରବର୍ତ୍ତୀ ଦାମ୍ପତ୍ୟ ଜୀବନରେ ୯୨ ପ୍ରତିଶତ ଭାରତୀୟ ପ୍ରେମ ଚାହିଥାନ୍ତି। ସମ୍ପ୍ରତି କରାଯାଇଥିବା ଏକ ସର୍ଭେ ରିପୋର୍ଟରେ ଏହା ଉଲ୍ଲେଖ କରାଯାଇଛି। ଦାମ୍ପତ୍ୟ ଜୀବନରେ ଭଲ ପାଇବାର ପରିପ୍ରକାଶ ଗୁରୁତ୍ୱପୂର୍ଣ୍ଣ। ସର୍ଭେରେ ୫,୬୨୮ ଲୋକଙ୍କୁ ସାମିଲ କରାଯାଇଥିଲା। ଭାଲେଣ୍ଟାଇନ୍ ଦିବସକୁୂ ନେଇ ପଚରା ଯାଇଥିବା ପ୍ରଶ୍ନରେ ୫୨ ପ୍ରତିଶତ ମହିଳା ଏବଂ ୪୩ ପ୍ରତିଶତ ପୁରୁଷ ଏହା ଦମ୍ପତିଙ୍କ ମଧ୍ୟରେ ଭଲ ପାଇବାକୁ ସୁଦୃଢ଼ କରିଥାଏ ବୋଲି ଉତ୍ତର ଦେଇଛନ୍ତି। ସେହିପରି ୨୬ ପ୍ରତିଶତ ମହିଳା ଏବଂ ୩୭ ପ୍ରତିଶତ ପୁରୁଷ ଏହା ନିଜର ଭଲ ପାଇବାକୁ ପ୍ରକାଶ କରିବାର ଏକ ଗୁରୁତ୍ୱପୂର୍ଣ୍ଣ ଦିବସ ବୋଲି କହିଛନ୍ତି। ତେବେ ବିବାହ ପରେ ଏପରି ଦିବସର ପାଳନ କରିବାର କୌଣସି ଆବଶ୍ୟକତା ନାହିଁ ବୋଲି ୪ ପ୍ରତିଶତ ମହିଳା ଏବଂ ୬ ପ୍ରତିଶତ ପୁରୁଷ ନିଜର ମତାମତ ଦେଇଛନ୍ତି। ୫୫ ପ୍ରତିଶତ ମହିଳା ତାଙ୍କ ଜୀବନସାଥୀ ଏହି ଦିନରେ ଶୁଭେଚ୍ଛା ଜଣାନ୍ତୁ ବୋଲି ଆଶା କରିଥାନ୍ତି। ୩୩ ପ୍ରତିଶତ ମହିଳା ଉପହାର ଆଶା ରଖିଥାନ୍ତି। ସେହିପରି ୩୩ ପ୍ରତିଶତ ପୁରୁଷ ମଧ୍ୟ ଏହି ଦିନ ସ୍ତ୍ରୀଙ୍କଠାରୁ କିଛି ସ୍ବତନ୍ତ୍ର ଧରଣର ବ୍ୟବହାର ଚାହିଥାନ୍ତି ବୋଲି ରିପୋର୍ଟରେ ଉଲ୍ଲେଖ ହୋଇଛି।
