ନୂଆଦିଲ୍ଲୀ,୨୬ା୮: ୨୦୧୦ରୁ ୨୦୧୯ ପର୍ଯ୍ୟନ୍ତ ୯ ବର୍ଷ ମଧ୍ୟରେ ଜାଲ୍ ପ୍ରମାଣପତ୍ର ଦେଇ ସରକାରୀ ଚାକିରି କରିଥିବା ନେଇ ୧,୦୮୪ଟି ଅଭିଯୋଗ ହୋଇଥିଲା। ସେମାନଙ୍କ ମଧ୍ୟରୁ ୯୨ ଜଣ ଅଫିସରଙ୍କୁ ଚାକିରିରୁ ବହିଷ୍କାର କରାଯାଇଛି। ସୂଚନା ଅଧିକାର ଆଇନ (ଆର୍ଟିଆଇ) ବଳରେ କାର୍ମିକ ଓ ତାଲିମ ବିଭାଗରୁ ମିଳିଥିବା ଏକ ରିପୋର୍ଟରୁ ଏହା ଜଣାପଡ଼ିଛି।
ଗତ ଜୁଲାଇରେ ଟ୍ରେନି ଆଇଏଏସ୍ ଅଫିସର ପୂଜା ଖେଡ୍କର ହାଇପ୍ରୋଫାଇଲ୍ ମାମଲାରେ ସାର୍ଟିଫିକେଟ୍ ଜାଲିଆତି ଘଟଣା ସାମ୍ନାକୁ ଆସିବା ପରେ ଏକ ଗଣମାଧ୍ୟମ ପକ୍ଷରୁ ଏଭଳି ଜାଲିଆତି ସମ୍ପର୍କିତ ତଥ୍ୟ ଆର୍ଟିଆଇରେ ମଗାଯାଇଥିଲା। ପୂଜା ଖେଡ୍କର ଜାଲ୍ ଭିନ୍ନକ୍ଷମ ଏବଂ ଓବିସି ପ୍ରମାଣପତ୍ର ଦେଇ ୨୦୨୧ରେ ସିଭିଲ୍ ସର୍ଭିସ ପରୀକ୍ଷା ଦେଇଥିଲେ। ଜାଲିଆତି ଜଣାପଡ଼ିବା ପରେ ୟୁପିଏସ୍ସି ତାଙ୍କ ଫଳାଫଳକୁ ରଦ୍ଦ କରିଦେଇଥିଲା।
୯୩ଟି ମନ୍ତ୍ରଣାଳୟ ଓ ସରକାରୀ ବିଭାଗ ମଧ୍ୟରୁ ୫୯ଟିର ତଥ୍ୟ ଆର୍ଟିଆଇ ରେକର୍ଡରେ ଉପଲବ୍ଧ ହୋଇଛି। ଉକ୍ତ ରିପୋର୍ଟ ଅନୁଯାୟୀ ଉପରୋକ୍ତ ସମୟ ମଧ୍ୟରେ ରେଲଓ୍ବେରେ ଜାଲ୍ ସାର୍ଟିଫିକେଟରେ ନିଯୁକ୍ତି ସମ୍ପର୍କିତ ସର୍ବାଧିକ ୩୪୯ ଅଭିଯୋଗ ଆସିଥିବାବେଳେ ଡାକ ବିଭାଗରେ ୨୫୯, ଜାହାଜ ଚଳାଚଳ ମନ୍ତ୍ରଣାଳୟରେ ୨୦୨, ଖାଦ୍ୟ ଓ ସାଧାରଣ ବଣ୍ଟନ ବିଭାଗରେ ୧୩୮ଟି ଅଭିଯୋଗ ହୋଇଥିଲା। ସେଥିରୁ ଅଧିକାଂଶ ମାମଲା ବିଭିନ୍ନ ଅଦାଲତରେ ବିଚାରାଧୀନ ରହିଛି। ୨୦୧୦ରେ ତତ୍କାଳୀନ ଅନୁସୂଚିତ ଜାତି/ଜନଜାତି କଲ୍ୟାଣ ସମ୍ପର୍କିତ ସଂସଦୀୟ କମିଟିଙ୍କ ସୁପାରିସ୍ କ୍ରମେ କାର୍ମିକ ଓ ତାଲିମ ବିଭାଗ ଏଭଳି ଅଭିଯୋଗର ତଥ୍ୟ ସଂଗ୍ରହ ଆରମ୍ଭ କରିଥିଲା।
ସରକାରୀ ନିଯୁକ୍ତିରେ ଅନୁସୂଚିତ ଜାତିଙ୍କ ପାଇଁ ୧୫ ପ୍ରତିଶତ ସଂରକ୍ଷଣ ବ୍ୟବସ୍ଥା ଥିବାବେଳେ ଅନୁସୂଚିତ ଜନଜାତିଙ୍କ ପାଇଁ ୭.୫%, ଓବିସିଙ୍କ ପାଇଁ ୨୭%, ଆର୍ଥତ୍କ ଦୁର୍ବଳ ବର୍ଗ (ଇଡବ୍ଲ୍ୟୁଏସ୍)ଙ୍କ ପାଇଁ ୧୦% ଏବଂ ଭିନ୍ନକ୍ଷମଙ୍କ ପାଇଁ ୩ ପ୍ରତିଶତ ସଂରକ୍ଷଣ ବ୍ୟବସ୍ଥା ରହିଛି। ୧୯୯୩ରେ ଜାରି ହୋଇଥିବା ଏକ ନିର୍ଦ୍ଦେଶନାମା ଅନୁଯାୟୀ ଯଦି କୌଣସି କର୍ମଚାରୀ ଜାଲ୍ ତଥ୍ୟ ଦେଇ ବା ଜାଲ୍ ସାର୍ଟିଫିକେଟ ଦାଖଲ କରି ନିଯୁକ୍ତି ପାଇଥିବା ଜଣାପଡ଼େ, ତେବେ ତାଙ୍କୁ ଉକ୍ତ ଚାକିରିରେ ରଖାଯିବା ଉଚିତ ନୁହେଁ। ୟୁପିଏସ୍ସି ପରୀକ୍ଷା ଦେବା ପାଇଁ ଥିବା ସୁଯୋଗ ସୀମା ଶେଷ ହୋଇଥିବା ସତ୍ତ୍ୱେ ପୂଜା ଖେଡ୍କର ଜାଲ୍ ପରିଚୟ ଓ ପ୍ରମାଣପତ୍ର ବଳରେ ୨୦୨୧ରେ ପୁନର୍ବାର ପରୀକ୍ଷା ଦେଇପାରିଥିଲେ ବୋଲି ତଦନ୍ତରୁ ଜଣାପଡ଼ିଥିଲା।
