ବ୍ରହ୍ମପୁର ଅଫିସ,୧୦ା୧୨: ଜାତୀୟ ଗ୍ରୀନ ଟ୍ରିବ୍ୟୁନାଲ (ଏନଜିଟି) ନିୟମ ବଳରେ ବ୍ରହ୍ମପୁର ମହାନଗର ନିଗମ (ବିଏମ୍ସି) ପକ୍ଷରୁ ସହରର ବନ୍ଧ ହୁଡାରେ ରହିଥିବା ବସ୍ତିଗୁଡିକୁ ଉଚ୍ଛେଦ କରାଯାଉଛି। ଶୁକ୍ରବାର ବିଏମ୍ସି ଏନଫୋର୍ସମେଣ୍ଟ୍ ପକ୍ଷରୁ ୯ନଂ. ୱାର୍ଡ ଅନ୍ତର୍ଗତ ଜଗବନ୍ଧୁ ପୋଖରୀ ହୁଡାରେ ଥିବା ୯୦ ଘର ଉଚ୍ଛେଦ କରାଯାଇଛି।
ବସ୍ତି ବାସିନ୍ଦାଙ୍କ ମଧ୍ୟରୁ ଜଗବନ୍ଧୁ ରାଜୀବ ଆବାସରେ ୬୪ ଓ ଅଟୋନଗର ରାଜୀବ ଆବାସରେ ୨୬ଜଣଙ୍କୁ ଘର ଦିଆଯାଇଛି। ଉଚ୍ଛେଦ ସମୟରେ ଅପ୍ରୀତିକର ପରିସ୍ଥିତିକୁ ଦୃଷ୍ଟିରେ ରଖି ୬ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଥିଲା। ଅନ୍ୟପକ୍ଷରେ ରାଜୀବ ଆବାସ ଯୋଜନାରେ ମିଳିଥିବା ଘରଗୁଡିକରେ ପାଣି ଗଳିବା ସହ ଡ୍ରେନ ପାଣି ଘରେ ପଶୁଥିବା ବସ୍ତି ବାସିନ୍ଦାମାନେ ଅଭିଯୋଗ କରିଛନ୍ତି। ଦୀର୍ଘ ୪୦ ବର୍ଷ ଧରି ଉକ୍ତ ଅଞ୍ଚଳରେ ବସବାସ କରୁଥିବା ବସ୍ତି ବାସିନ୍ଦାଙ୍କୁ ଉପଯୁକ୍ତ ସୁବିଧା ସୁଯୋଗ ଥିବା ସ୍ଥାନରେ ଥଇଥାନ କରିବାକୁ ଦାବି ହୋଇଛି। ଶୁକ୍ରବାର ହୋଇଥିବା ଉଚ୍ଛେଦ ସମୟରେ ବିଏମସି ଡେପୁଟି କମିଶନର ବିନୋଦ କୁମାର ବେହେରା, ଆର୍ଶୀବାଦ ପରିଡା, ଏନଫୋର୍ସମେଣ୍ଟ୍ ଅଧିକାରୀ ତରୁଣକାନ୍ତ, ସହକାରୀ ନିର୍ବାହୀ ଯନ୍ତ୍ରୀ ନାଗେଶ୍ୱର ସୁବୁଦ୍ଧିଙ୍କ ସମେତ ଅତିରିକ୍ତ ଏସ୍ପି ଅସୀମ କୁମାର ପଣ୍ଡା, ଟାଉନ ଏସ୍ଡିପିଓ ରାଜୀବ ଲୋଚନ ପଣ୍ଡା, ଟାଉନ ଥାନାଧିକାରୀ ସୁରେଶ ତ୍ରିପାଠୀ, ବଡ ବଜାର ଥାନାଧିକାରୀ ପ୍ରଶାନ୍ତ ଭୂପତି, ବୈଦ୍ୟନାଥପୁର ଥାନାଧିକାରୀ ରାମ କୁମାର ମୁର୍ମୁ, ଗୋସାଇଁ ନୂଆଗାଁ ଥାନାଧିକାରୀ ସ୍ମୃତି ପ୍ରଭା ପ୍ରଧାନ ପ୍ରମୁଖ ଉପସ୍ଥିତ ଥିଲେ।
