ନୂଆଦିଲ୍ଲୀ,୧୭।୧୧: ଅଷ୍ଟମ କେନ୍ଦ୍ରୀୟ ବେତନ କମିଶନର କାର୍ଯ୍ୟାବଳୀର ସର୍ତ୍ତାବଳୀ(ToR)ରେ ଗୁରୁତ୍ୱପୂର୍ଣ୍ଣ ସଂଶୋଧନ ଆଣିବାକୁ ଦାବି କରି କେନ୍ଦ୍ର ସରକାରୀ କର୍ମଚାରୀ ଓ ଶ୍ରମିକ ମହାସଂଘ ସୋମବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏକ ଚିଠି ଲେଖିଛି। ଏହି ମହାସଂଘ ପ୍ରାୟ ୬୯ ଲକ୍ଷ ପେନସନଭୋଗୀ ଏବଂ ପାରିବାରିକ ପେନସନଭୋଗୀଙ୍କ ପାଇଁ ପେନସନ ସଂଶୋଧନ ଓ ପେନସନ ସମାନତାକୁ ୮ମ CPCର ପରିସରଭୁକ୍ତ କରିବାକୁ ସ୍ପଷ୍ଟ ଭାବେ ଦାବି କରିଛି।
ଅର୍ଥ ମନ୍ତ୍ରଣାଳୟ ଦ୍ୱାରା ୮ମ CPC ଗଠନକୁ ସ୍ୱାଗତ କରି ମହାସଂଘ ଦର୍ଶାଇଛି ଯେ, ନୂତନ ToRରେ ପୂର୍ବରୁ ଅବସର ନେଇଥିବା କର୍ମଚାରୀଙ୍କ ପେନସନ ସଂଶୋଧନ ପାଇଁ କୌଣସି ସ୍ପଷ୍ଟ ମାଣ୍ଡେଟ୍ ନାହିଁ। ଏହି ପ୍ରସଙ୍ଗରେ ସପ୍ତମ ବେତନ କମିଶନର ToR ରେ ପେନସନ ସଂରଚନା ଏବଂ ଅନ୍ୟାନ୍ୟ ଅବସରକାଳୀନ ସୁବିଧାଗୁଡ଼ିକର ସମୀକ୍ଷା ପାଇଁ ସ୍ପଷ୍ଟ ଉଲ୍ଲେଖ ଥିଲା, ଯାହା ୮ମ CPCରୁ ବାଦ୍ ଦିଆଯାଇଛି।
ମହାସଂଘ ଏହା ମଧ୍ୟ ଦାବି କରିଛି ଯେ ପୂର୍ବ ବେତନ କମିଶନମାନଙ୍କ ଦ୍ୱାରା ଅନୁସୃତ ୧୦ ବର୍ଷିଆ ଚକ୍ରକୁ ଦୃଷ୍ଟିରେ ରଖି ୮ମ CPCକୁ ଜାନୁଆରୀ ୧, ୨୦୨୬ରୁ ଲାଗୁ କରାଯାଉ, କିନ୍ତୁ ToRରେ କାର୍ଯ୍ୟକାରିତା ତାରିଖ ନିର୍ଦ୍ଦିଷ୍ଟ କରାଯାଇ ନାହିଁ।
ToRରେ ଉଲ୍ଲେଖ ଥିବା “ଅଣ-ଯୋଗଦାନକାରୀ ପେନସନ ଯୋଜନାର ଅଣ-ପାଣ୍ଠିଭୁକ୍ତ ଖର୍ଚ୍ଚ” ଶବ୍ଦାବଳୀକୁ ନେଇ ମହାସଂଘ ତୀବ୍ର ଆପତ୍ତି ଉଠାଇଛି। ଏହାକୁ ଅନୁଚିତ, ଅସମ୍ବେଦନଶୀଳ ଏବଂ ସର୍ବୋଚ୍ଚ ନ୍ୟାୟାଳୟର ସିଦ୍ଧାନ୍ତ (ଧାରା ୩୦୦ଏ ଅନୁଯାୟୀ ପେନସନ ଏକ ସାମ୍ବିଧାନିକ ଅଧିକାର)ର ବିରୋଧାଚରଣ ବୋଲି ବର୍ଣ୍ଣନା କରାଯାଇଛି।
ଏପ୍ରିଲ୍ ୧, ୨୦୦୪ ପରେ ନିଯୁକ୍ତି ପାଇଥିବା ପ୍ରାୟ ୨୬ ଲକ୍ଷ କର୍ମଚାରୀଙ୍କ ପାଇଁ ପୁରୁଣା ପେନସନ ଯୋଜନା (OPS) ପୁନଃସ୍ଥାପନ କରିବାକୁ ଦାବି। ୮ମ CPC ପ୍ରକ୍ରିୟାରେ ବିଳମ୍ବ ଓ ବର୍ଦ୍ଧିତ ମୁଦ୍ରାସ୍ଫୀତିକୁ ଦୃଷ୍ଟିରେ ରଖି ୧.୨ କୋଟି କର୍ମଚାରୀ, ପେନସନଭୋଗୀ ଓ ପାରିବାରିକ ପେନସନଭୋଗୀଙ୍କ ମନୋବଳ ବଜାୟ ରଖିବା ପାଇଁ ୨୦% ଅନ୍ତରୀଣ ସହାୟତା ତୁରନ୍ତ ପ୍ରଦାନ କରାଯାଉ।
ସ୍ୱାୟତ୍ତ ଏବଂ ବୈଧାନିକ ସଂସ୍ଥାର କର୍ମଚାରୀ ତଥା ଡାକ ନେଟୱାର୍କର ଗୁରୁତ୍ୱପୂର୍ଣ୍ଣ ଅଂଶ ଗ୍ରାମୀଣ ଡାକ ସେବକ (GDS)ମାନଙ୍କୁ ୮ମ CPCର ଲାଭ ପ୍ରଦାନ କରାଯାଉ।
ଅଧିକ CGHS ୱେଲନେସ୍ ସେଣ୍ଟର ଖୋଲିବା, ପେନସନଭୋଗୀଙ୍କ ପାଇଁ କ୍ୟାସଲେସ୍ ଚିକିତ୍ସା ଏବଂ ସ୍ୱାସ୍ଥ୍ୟସେବାରେ ସୁଧାର ଆଣିବାକୁ ଅନୁରୋଧ କରାଯାଇଛି।
