ପ୍ୟାରିସ୍,୧ା୧୧(ପି.ଟି.): ଫୁଟବଲ୍ର ସର୍ବଶ୍ରେଷ୍ଠ ପୁରସ୍କାର ବାଲନ୍ ଡି’ଅର ପୁରସ୍କାର ପ୍ରଦାନ କରାଯାଇଛି। ବିଶ୍ୱକପ ବିଜୟୀ ଆର୍ଜେଣ୍ଟିନା ଦଳର ଅଧିନାୟକ ତଥା ଇଣ୍ଟର ମାୟାମି ଷ୍ଟ୍ରାଇକର ଲିଓନେଲ ମେସି ରେକର୍ଡ ଅଷ୍ଟମ ଥର ପାଇଁ ଏହି ପୁରସ୍କାର ହାସଲ କରିଛନ୍ତି। ସୋମବାର ପ୍ୟାରିସ୍ରେ ଏହି ପୁରସ୍କାର ପ୍ରଦାନ କରାଯାଇଥିଲା। ମାଞ୍ଚେଷ୍ଟର ସିଟିର ଗୋଲ ସ୍କୋରିଂ ମେସିନ୍ ଏର୍ଲିଙ୍ଗ ହାଲାଣ୍ଡ ଓ ପ୍ୟାରିସ୍ ସେଣ୍ଟ ଜର୍ମେନ(ପିଏସ୍ଜି)ର ଫରଓ୍ବାର୍ଡ କିଲିଆନ୍ ଏମ୍ବାପେଙ୍କୁ ପଛରେ ପକାଇ ମେସି ଏହି ପୁରସ୍କାର ହାସଲ କରିଛନ୍ତି। ହାଲାଣ୍ଡ ଦ୍ୱିତୀୟ ଓ ଏମ୍ବାପେ ତୃତୀୟ ସ୍ଥାନରେ ରହିଥିଲେ। ଇଣ୍ଟର ମାୟାମିର କୋ ଓନର ତଥା ଇଂଲଣ୍ଡ ଫୁଟବଲ ଦଳର ପୂର୍ବତନ ଅଧିନାୟକ ଡେଭିଡ୍ ବେକ୍ହାମଙ୍କ ଠାରୁ ମେସି ଏହି ପୁରସ୍କାର ଗ୍ରହଣ କରିଥିଲେ। ପ୍ରଥମ ଇଣ୍ଟର ମାୟାମି ଖେଳାଳି ଭାବରେ ମେସି ଏହି ପୁରସ୍କାର ହାସଲ କରିଥିଲେ ହେଁ ପିଏସ୍ଜି ପକ୍ଷରୁ ଖେଳିଥିବା ସମୟ ପାଇଁ ତାଙ୍କୁ ଏହି ପୁରସ୍କାର ମିଳିଥିଲା। ୩୬ ବର୍ଷୀୟ ମେସି ଏହି ସଫଳତା ପାଇଁ ଆର୍ଜେଣ୍ଟିନା ଦଳର ଖେଳାଳି ଓ କୋଚ୍ଙ୍କୁ ଧନ୍ୟବାଦ ଜଣାଇଥିଲେ। ଆଜିର ରାତିକୁ ମୁଁ ବେଶ ଉପଭୋଗ କରୁଛି। ଏହି ମୁହୂର୍ତ୍ତ ସର୍ବଦା ମୋ ସହିତ ରହିବ। ଏହା ସହିତ ଆଗାମୀ କିଛି ବର୍ଷ ମଧ୍ୟ ଏହି ସଫଳତା ଦୋହରାଇବାକୁ ପ୍ରୟାସ କରିବି ବୋଲି ମେସି କହିଥିଲେ। ଆର୍ଜେଣ୍ଟିନା ସହିତ ମୁଁ ସଫଳତା ହାସଲ କରିଥିଲେ ମଧ୍ୟ ବିଶ୍ୱ ଚାମ୍ପିୟନ ହୋଇ ପାରି ନ ଥିଲୁ। ତେବେ ଏହି ସ୍ବପ୍ନ ସଫଳ ହୋଇଥିବା ବେଳେ ଦଳ ସହିତ ଜଡିତ ସମସ୍ତଙ୍କୁ ମୁଁ ଧନ୍ୟବାଦ ଜଣାଇବାକୁ ଚାହୁଁଛି। ଏହା ସହିତ ୧୯୮୬ ମସିହାରେ ଆର୍ଜେଣ୍ଟିନାକୁ ବିଶ୍ୱ ଚାମ୍ପିୟନ କରାଇଥିବା ଡିଏଗୋ ମାରାଡୋନାଙ୍କୁ ମଧ୍ୟ ସେ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ। ବିଶ୍ୱକପ୍ ଟ୍ରଫି ଓ ବାଲନ୍ ଡି’ଅର ଟ୍ରଫିକୁ ମୁଁ ସମସ୍ତ ଆର୍ଜେଣ୍ଟିନା ବାସୀଙ୍କ ଉଦ୍ଦେଶ୍ୟରେ ଉତ୍ସର୍ଗ କରୁଛି। ଫୁଟବଲ ଜଗତରେ ଅନ୍ୟ କୌଣସି ଖେଳାଳି ମେସିଙ୍କ ରେକର୍ଡର ନିକଟତର ହୋଇ ନାହାନ୍ତି। କ୍ରିଷ୍ଟିଆନୋ ରୋନାଲ୍ଡୋ ୫ ଥର ଏହି ପୁରସ୍କାର ହାସଲ କରିଥିବା ବେଳେ ମାଇକେଲ ପ୍ଲାଟିନି, ଜୋହାନ୍ କ୍ରଫି ଓ ମାର୍କୋ ଭାନ୍ ବାଷ୍ଟେନ୍ ୩ଥର ଲେଖାଏ ଏହି ପୁରସ୍କାର ହାସଲ କରିଛନ୍ତି। ଗତବର୍ଷ ମେସି ଏହି ତାଲିକାରେ ନ ଥିବା ବେଳେ କରିମ୍ ବେଞ୍ଜେମା ଏହି ପୁରସ୍କାର ହାସଲ କରିଥିଲେ।
ଅନ୍ୟ ପକ୍ଷରେ ମେସିଙ୍କ ଟିମ୍ ମେଟ୍ ତଥା ଗୋଲକିପର ଏମିଲିଆନୋ ମାର୍ଟିନେଜଙ୍କୁ ଶ୍ରେଷ୍ଠ ଗୋଲକିପର ଭାବରେ ୟାଶିନ୍ ଟ୍ରଫିରେ ସମ୍ମାନିତ କରାଯାଇଛି। ୨୧ ବର୍ଷରୁ କମ୍ ବୟସ ବର୍ଗର ଶ୍ରେଷ୍ଠ ଖେଳାଳି ଭାବରେ ଜୁଡ୍ ବେଲିଙ୍ଗହାମଙ୍କୁ କୋପା ଟ୍ରଫି ପ୍ରଦାନ କରାଯାଇଥିବା ବେଳେ ସମାଜସେବା ପାଇଁ ବ୍ରାଜିଲର ଭିନିସିଅସ୍ ଜୁନିୟରଙ୍କୁ ସକ୍ରେଟସ ଆଓ୍ବାର୍ଡ ମିଳିଛି। ଶ୍ରେଷ୍ଠ ଷ୍ଟ୍ରାଇକର ଭାରେ ଜର୍ଡ ମୁଲର ଟ୍ରଫି ହାସଲ କରିଛନ୍ତି ଏର୍ଲିଙ୍ଗ ହାଲାଣ୍ଡ।
ମହିଳା ଖେଳାଳିଙ୍କ ପାଇଁ ପ୍ରଦାନ କରାଯାଉଥିବା ବାଲନ୍ ଡି’ଅର ଫେମିନିନ ଟ୍ରଫି ହାସଲ କରିଛନ୍ତି ସ୍ପେନ୍ ଦଳର ମିଡଫିଲ୍ଡର ଆଇଟାନା ବୋନମାଟି। ସ୍ପେନ୍ ଦଳ ପ୍ରଥମ ଥର ଫିଫା ମହିଳା ବିଶ୍ୱକପ ଟାଇଟଲ ହାସଲ କରିଥିବା ବେଳେ ସେ ଗୋଲ୍ଡେନ୍ ବଲ୍ ହାସଲ କରିଥିଲେ। ଏଥିରେ ସେ ୩ଟି ଗୋଲ ଦେଇଥିବା ବେଳେ ଦୁଇଟି ଗୋଲରେ ଆସିଷ୍ଟ କରିଥିଲେ। ଏହା ସହ ବାର୍ସେଲୋନାକୁ ସେ ଲା ଲିଗା ଓ ଚାମ୍ପିୟନ୍ସ ଲିଗରେ ବିଜୟୀ କରିଥିଲେ।
