ନୂଆଦିଲ୍ଲୀ,୧୦।୧୨: ସଂସଦର ଶୀତକାଳୀନ ଅଧିବେଶନ ଚାଲିଥିବାବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ବିରୋଧୀ ଦଳର ନେତା ରାହୁଲ ଗାନ୍ଧୀଙ୍କ ମଧ୍ୟରେ ଏକ ଅଚାନକ ୮୮ ମିନିଟ୍ ଧରି ବୈଠକ ହୋଇଥିଲା, ଯାହା ରାଜନୈତିକ ମହଲରେ ଚର୍ଚ୍ଚାର ବିଷୟ ପାଲଟିଛି।
ମୁଖ୍ୟ ସୂଚନା କମିଶନର ଏବଂ ଅନ୍ୟ ଗୁରୁତ୍ୱପୂର୍ଣ୍ଣ ପଦ ପାଇଁ ପ୍ରାର୍ଥୀ ଚୟନ ଉପରେ ଆଲୋଚନା କରିବାକୁ ଦୁହିଁଙ୍କର ବୈଠକ ହେବାର ଥିଲା। ତେବେ ଏତେ ଲମ୍ବା ସମୟ ଧରି ଆଲୋଚନା ଚାଲିବା ଅନେକ କଳ୍ପନାଜଳ୍ପନା ସୃଷ୍ଟି କରିଛି।
ରାହୁଲ ଗାନ୍ଧୀ ଅପରାହ୍ନ ୧ଟାରେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (PMO) ରେ ପହଞ୍ଚିଥିଲେ। ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଆଲୋଚନାରେ କେବଳ ମୁଖ୍ୟ ସୂଚନା କମିଶନର ନୁହଁନ୍ତି, ବରଂ ଆଠ ଜଣ ସୂଚନା କମିଶନର ଏବଂ ଜଣେ ଭିଜିଲାନ୍ସ କମିଶନରଙ୍କ ନିଯୁକ୍ତି ଉପରେ ମଧ୍ୟ ବିସ୍ତୃତ ଆଲୋଚନା ହୋଇଥିଲା। ଏହି ବୈଠକରେ ବରିଷ୍ଠ କେନ୍ଦ୍ର ମନ୍ତ୍ରୀ ଅମିତ ଶାହା ମଧ୍ୟ ଉପସ୍ଥିତ ଥିଲେ।
ବୈଠକରୁ ବାହାରିବା ପରେ ଜଣାପଡିଛି ଯେ ରାହୁଲ ଗାନ୍ଧୀ ସମସ୍ତ ନିଯୁକ୍ତି ଉପରେ ନିଜର ଆପତ୍ତି ପ୍ରକାଶ କରିବା ସହ ଲିଖିତ ଭାବେ ଏହାକୁ ଦାଖଲ କରିଛନ୍ତି। ବର୍ତ୍ତମାନ କେନ୍ଦ୍ରୀୟ ସୂଚନା କମିଶନ (CIC) ରେ ମୁଖ୍ୟ ସୂଚନା କମିଶନରଙ୍କ ସମେତ ୮ଟି ପଦବୀ ଖାଲି ପଡ଼ିଛି। ପୂର୍ବତନ ମୁଖ୍ୟ ସୂଚନା କମିଶନର ହୀରାଲାଲ ସାମରିଆ ସେପ୍ଟେମ୍ବର ୧୩ରେ ଅବସର ନେବା ପରେ ଏହି ପଦ ଖାଲି ରହିଛି।
ସଂସଦର ଉଭୟ କରିଡରରେ ଏହି ୮୮ ମିନିଟ୍ ର ବୈଠକ ବିଷୟରେ ଜୋରଦାର ଚର୍ଚ୍ଚା ଲାଗିରହିଛି।
