ଭଦ୍ରକ ଅଫିସ,୧୪।୫- ଭଦ୍ରକ ଗ୍ରାମାଞ୍ଚଳ ଥାନI ଅଧୀନ ୧୬ ନମ୍ବର ଜାତୀୟ ରାଜପଥର ନଳାଙ୍ଗଛକ ନିକଟରେ ପୋଲିସ ଟିମ୍ ପାଟ୍ରୋଲିଂ କରୁଥିବା ବେଳେ ବିପୁଳ ପରିମାଣର ଦେଶୀ ମଦ ଜବତ କରିଛନ୍ତି।
ମିଳିଥିବା ସୂଚନା ମୁତାବକ, ସମ୍ପୃକ୍ତ ଅଞ୍ଚଳରେ ମଦ ଚୋରା ଚାଲାଣ ହେଉଥିବା ନେଇ ଅଭିଯୋଗ ହୋଇଥିଲା। ଏନେଇ ଅବକାରୀ ନିରୀକ୍ଷକ ଧନେଶ୍ୱର ବରାଡ଼ଙ୍କ ନେତୃତ୍ୱରେ ଜିଲା ଅବକାରୀ ବିଭାଗ ପକ୍ଷରୁ ଧାମନଗର ଅବକାରୀ ଥାନା ଭାରପ୍ରାପ୍ତ ଅଧିକାରୀ ପ୍ରହଲ୍ଲାଦ ସାମଲ, ଭଦ୍ରକ ଅବକାରୀ ଥାନା ଭାରପ୍ରାପ୍ତ ଅଧିକାରୀ ସନ୍ତୋଷ କୁମାର ବଳ ଏବଂ ପୋଲିସ କର୍ମଚାରୀଙ୍କୁ ନେଇ ଏକ ସ୍ବତନ୍ତ୍ର ଟିମ୍ ଗଠନ କରାଯାଇଥିଲା। ଅନ୍ୟପକ୍ଷେ ନଳାଙ୍ଗଛକ ନିକଟରେ ପୋଲିସ ଟିମ୍ ପାଟ୍ରୋଲିଂ କରୁଥିବା ବେଳେ ଏକ କାର (ଓଆର-୦୨ବିକେ-୦୯୦୭)କୁ ଅଟକାଇ ଯାଞ୍ଚ କରିଥିଲେ। ପୋଲିସ ଅଧିକାରୀମାନେ ୪୦୦ ଲିଟର ଦେଶୀ ରନ୍ଧାମଦ ଜବତ କରିଥିଲେ। ଏପରିକି ପୋଲିସ ଚଢ଼େୟା ଗ୍ରାମରେ ଚଢ଼ାଉ କରି ଏକ ନମ୍ବରବିହୀନ ବାଇକ୍ରୁ ୫୦ ଲିଟର ଦେଶୀ ମଦ ଜବତ କରିଥିଲା। ପୋଲିସ ଘଟଣାରେ ସମ୍ପୃକ୍ତ ଗୋପବନ୍ଧୁପୁର ଗ୍ରାମର ନିରାକାର ମଲ୍ଲିକ ଓରଫ କାଳିଆ ଏବଂ ଚଢ଼େୟା ଗ୍ରାମର ତନେଶ୍ୱର ବେହେରା ଓ ରମାକାନ୍ତ ବେହେରାଙ୍କୁ ଗିରଫ କରିଛି।
ସେହିପରି ଭଣ୍ଡାରିପୋଖରୀ ଥାନା ଅଧୀନ ମଞ୍ଜୁରୀ, ରଣଜିତ, କୋର୍କରା ଓ ବଳିଘାଇ ଗ୍ରାମରେ ଚଢ଼ାଉ କରାଯାଇ ୩୮୦ ଲିଟର ଦେଶୀ ରନ୍ଧାମଦ ଜବତ କରିବା ସହିତ କୋର୍କରା ଗ୍ରାମର ନିରଞ୍ଜନ ସାହୁ, ମଞ୍ଜୁରୀ ଗ୍ରାମର ମହେଶ୍ୱର ମଳିକ ଓ ତପନ ମଳିକଙ୍କୁ ଗିରଫ କରାଯାଇଛି। ଅବକାରୀ ବିଭାଗ ପକ୍ଷରୁ ହୋଇଥିବା ଏହି ଚଢ଼ାଉରେ ୮୩୦ ଲିଟର ଦେଶୀ ରନ୍ଧାମଦ ଜବତ କରାଯିବା ସହିତ ୬ଜଜଣଙ୍କୁ ଗିରଫ କରାଯାଇଛି । ଜବତ ଦେଶୀ ମଦ, କାର ଓ ବାଇକ୍ର ଆନୁମାନିକ ମୂଲ୍ୟ ୩ ଲକ୍ଷ ଟଙ୍କାରୁ ଊଦ୍ଧର୍ବ ହେବ ବୋଲି ଅବକାରୀ ବିଭାଗ ସୂଚନା ଦେଇଛି। ଚଢ଼ାଉରେ ଏଏସ୍ଆଇ ପୁରୁଷୋତ୍ତମ ମଲ୍ଲିକ, କନଷ୍ଟେବଳ ରମେଶ ନାୟକ, ଅଜିତ କୁମାର ସିଙ୍କୁ, ଅନବାଦିତ୍ୟ ବାରିକ, ଶିବପ୍ରସାଦ ସାହୁ, ସାରାଣୀ ସେନାପତି, ଜେନାମଣି ଜାମୁଡା ପ୍ରଭୃତି ସାମିଲ ଥିଲେ। ଏନେଇ ଅବକାରୀ ବିଭାଗ ୫ଟି ମାମଲା ରୁଜୁ କରିଛି।
