ଓ୍ବାଶିଂଟନ, ୩୧।୧୨: ୨୦୨୫ ଜାନୁଆରୀ ୧ ସୁଦ୍ଧା ବିଶ୍ୱର ଜନସଂଖ୍ୟା ୮୦୯ କୋଟିରେ ପହଞ୍ଚିଛି। ଆମେରିକାର ଜନଗଣନା ବ୍ୟୁରୋ(ୟୁଏସ୍ସିବି) ପକ୍ଷରୁ ମଙ୍ଗଳବାର ପ୍ରକାଶ ପାଇଥିବା ଏକ ରିପୋର୍ଟରେ ଏହି ଆକଳନ କରାଯାଇଛି। କେବଳ ୨୦୨୪ରେ ବିଶ୍ୱ ଜନସଂଖ୍ୟାରେ ୭.୧ କୋଟି ବୃଦ୍ଧି ଘଟିଛି। ୨୦୨୪ ଜାନୁଆରୀ ୧ ସୁଦ୍ଧା ବିଶ୍ୱର ସମୁଦାୟ ଜନସଂଖ୍ୟା ୮୦୧.୯ କୋଟି ଥିବାବେଳେ ଏବେ ଏହି ସଂଖ୍ୟା ବୃଦ୍ଧି ପାଇ ୮୦୯ କୋଟିରେ ପହଞ୍ଚିଛି। ୨୦୨୪ରେ ବିଶ୍ୱର ଜନସଂଖ୍ୟା ୦.୯% ହାରରେ ବୃଦ୍ଧି ପାଇଥିଲା, ଯାହା ୨୦୨୩ର ଜନସଂଖ୍ୟା ବୃଦ୍ଧି ହାରଠାରୁ କମ୍ ରହିଥିବା ନେଇ ୟୁଏସ୍ସିବି ଆକଳନ କରିଛି। ତେବେ କେବଳ ୨୦୨୩ରେ ବିଶ୍ୱ ଜନସଂଖ୍ୟାରେ ୭.୫ କୋଟି ବୃଦ୍ଧି ଘଟିଥିବା ନେଇ ୟୁଏସ୍ସିବି କହିଛି।
ଉକ୍ତ ରିପୋର୍ଟ ଅନୁଯାୟୀ, ୧୪୧ କୋଟି ଜନସଂଖ୍ୟା ସହ ଭାରତ ହେଉଛି ବିଶ୍ୱର ସବୁଠୁ ଜନବହୁଳ ଦେଶ। ୨୦୨୪ ଜୁଲାଇରେ ଭାରତ ଜନସଂଖ୍ୟା ପ୍ରଥମଥର ପାଇଁ ଚାଇନାକୁ ଟପିଥିଲା। ସର୍ବାଧିକ ଜନସଂଖ୍ୟା ତାଲିକାରେ ୧୪୦.୮ କୋଟି ଜନସଂଖ୍ୟା ସହ ଭାରତର ଠିକ୍ ପଛକୁ ଚାଇନା ରହିଛି। ସେହିପରି ୩୪.୧ କୋଟି ଲୋକଙ୍କ ସହ ଆମେରିକା ବିଶ୍ୱର ତୃତୀୟ ଜନବହୁଳ ଦେଶ ହୋଇଥିବା ଏହି ରିପୋର୍ଟ କହିଛି। ୨୦୨୪ରେ କେବଳ ଆମେରିକାରେ ୦.୭୮% ହାରରେ ୨୬ ଲକ୍ଷ ଜନସଂଖ୍ୟା ବଢ଼ିଥିବା ୟୁଏସ୍ସିବି ଆକଳନ କରିଛି। ସେହିପରି ସର୍ବାଧିକ ଜନସଂଖ୍ୟା ତାଲିକାରେ ଚତୁର୍ଥ, ପଞ୍ଚମ ଏବଂ ଷଷ୍ଠ ସ୍ଥାନରେ ଯଥାକ୍ରମେ ଇଣ୍ଡୋନେସିଆ, ପାକିସ୍ତାନ ଓ ନାଇଜେରିଆ ରହିଛି। ମାତ୍ର ୭୬୪ ଜନସଂଖ୍ୟା ସହ ଭାଟିକାନ ସିଟି ବିଶ୍ୱର ସବୁଠାରୁ କମ୍ ଜନସଂଖ୍ୟା ଥିବା ଦେଶ ହୋଇଥିବା ନେଇ ଉକ୍ତ ରିପୋର୍ଟ ପ୍ରକାଶ କରିଛି।
ତେବେ ୟୁଏସ୍ସିବିର ଆକଳନ ଅନୁଯାୟୀ, ବିଶ୍ୱର ବିଭିନ୍ନ ପ୍ରାନ୍ତରେ ଚାଲିଥିବା ଯୁଦ୍ଧ ଏବଂ ସଂଘର୍ଷର ପ୍ରଭାବ ମଧ୍ୟ ଜନସଂଖ୍ୟା ଉପରେ ପଡ଼ିଛି। ୟୁକ୍ରେନ, ବୁଲଗାରିଆ ଏବଂ ଲାତଭିଆରେ ମୃତ୍ୟୁ ହାର ସର୍ବାଧିକ ରହିଛି।
ସେହିପରି ସମସ୍ତ ମହାଦେଶ ମଧ୍ୟରେ ଆଫ୍ରିକା ମହାଦେଶରେ ଜନ୍ମ ହାର ସର୍ବାଧିକ ରହିଛି। ଏହି ରିପୋର୍ଟରେ ପ୍ରକାଶ ପାଇଥିବା ଆକଳନ ଅନୁଯାୟୀ, ୨୦୨୫ ଜାନୁଆରୀରେ ସେକେଣ୍ଡ ପ୍ରତି ଜନ୍ମ ହାର ୪.୨ ଏବଂ ମୃତ୍ୟୁ ହାର ୨.୦ ରହିବ। ସେହିପରି ଏହି ମାସ ଆମେରିକାରେ ପ୍ରତି ୯ ସେକେଣ୍ଡରେ ଜଣେ ଶିଶୁ ଜନ୍ମ ହେବେ ବୋଲି ଆକଳନ କରାଯାଇଥିବାବେଳେ ପ୍ରତି ୯.୪ ସେକେଣ୍ଡରେ ଜଣେ ବ୍ୟକ୍ତିଙ୍କର ମୃତ୍ୟୁ ଘଟିବ। ସେହିପରି ପ୍ରତି ୨୩.୨ ସେକେଣ୍ଡରେ ଆମେରିକାର ଜନସଂଖ୍ୟାରେ ଜଣେ ପ୍ରବାସୀ ଯୋଡ଼ି ହେବେ। ଅନ୍ୟପକ୍ଷରେ, ପ୍ରତି ୨୧.୨ ସେକେଣ୍ଡରେ ଦେଶର ଜନସଂଖ୍ୟାରେ ହାରାହାରି ଜଣେ ବ୍ୟକ୍ତିଙ୍କର ବୃଦ୍ଧି ଘଟିବ ବୋଲି ୟୁଏସ୍ସିବି ଆକଳନ କରିଛି।
