ଓ୍ବାଶିଂଟନ,୨୪।୧: ଅନ୍ତର୍ଜାତୀୟ ବଜାରରେ ଆର୍ଥିକ ମାନ୍ଦାବସ୍ଥାର ଗରୁତର ପ୍ରଭାବ ଅନୁଭୂତ ହୋଇଛି। ଏଥିରୁ ମୁକୁଳିବା ପାଇଁ ବୃହତ୍ ଆଇଟି କମ୍ପାନୀଠାରୁ ଆରମ୍ଭ କରି ରିଟେଲ୍ ଏବଂ ଫାଇନାନ୍ସ ସେକ୍ଟର କମ୍ପାନୀଗୁଡ଼ିକ କିଛିଦିନ ହେଲା କର୍ମଚାରୀମାନଙ୍କୁ ଛଟେଇ କରିବାରେ ଲାଗିଛନ୍ତି। ଆମେରିକାରେ ଗୁଗଲ୍, ମାଇକ୍ରୋସଫ୍ଟ, ଫେସ୍ବୁକ୍, ଆମାଜନ ଭଳି ବୃହତ୍ କମ୍ପାନୀଗୁଡ଼ିକ କର୍ମଚାରୀ ଛଟେଇ କରିବା ପରେ ଏବେ ହଜାର ହଜାର ଭାରତୀୟ ଆଇଟି ପେସାଦାର କାମଧନ୍ଦା ହରାଇ ସେଠାରେ ରହିବା ପାଇଁ ସଂଘର୍ଷ କରୁଛନ୍ତି। ସେଠାରେ ରହିବାକୁ ହେଲେ ଓ୍ବାର୍କ ଭିଜାର ଧାର୍ଯ୍ୟ ସମୟସୀମା ମଧ୍ୟରେ ନୂଆ ନିଯୁକ୍ତି ଖୋଜିବାକୁ ହେବ। ସ୍ଥାନୀୟ ଗଣମାଧ୍ୟମ ରିପୋର୍ଟ ଅନୁଯାୟୀ ଗତବର୍ଷ ନଭେମ୍ବରରୁ ଇତିମଧ୍ୟରେ ପାଖାପାଖି ୨ ଲକ୍ଷ ଆଇଟି ପେସାଦାରଙ୍କୁ ନିଯୁକ୍ତିରୁ ଛଟେଇ କରାଗଲାଣି। ସେମାନଙ୍କ ମଧ୍ୟରୁ ଭାରତୀୟ ଆଇଟି ପ୍ରଫେସନାଲମାନଙ୍କ ସଂଖ୍ୟା ୩୦ରୁ ୪୦ ପ୍ରତିଶତ (ପ୍ରାୟ ୬୦ରୁ ୮୦ ହଜାର)। ଛଟେଇ କର୍ମଚାରୀଙ୍କ ମଧ୍ୟରୁ ଅଧିକାଂଶଙ୍କ ପାଖରେ ଏଚ୍-୧ବି ଏବଂ ଏଲ୍୧ ଭିଜା ରହିଛି। ଏଚ୍-୧ବି ଭିଜା ହେଉଛି ନନ୍ ଇମିଗ୍ରାଣ୍ଟ ଭିଜା, ଯାହା ଆମେରିକା କମ୍ପାନୀଗୁଡ଼ିକୁ ବିଦେଶୀ କର୍ମଚାରୀଙ୍କୁ ଟେକ୍ନିକାଲ ଅଭିଜ୍ଞତା ଥିବା ସ୍ବତନ୍ତ୍ର ପେସାରେ ନିଯୁକ୍ତି ଦେବା ଲାଗି ଅନୁମତି ଦେଇଥାଏ। ବୈଷୟିକ କମ୍ପାନୀଗୁଡ଼ିକ ପ୍ରତିବର୍ଷ ଭାରତ ଓ ଚାଇନାରୁ ହଜାର ହଜାର କର୍ମଚାରୀଙ୍କୁ ନିଯୁକ୍ତି ଦେବା ଲାଗି ଏହି ଭିଜା ଉପରେ ନିର୍ଭର କରିଥାନ୍ତି। ଏଲ୍-୧ଏ ଏବଂ ଏଲ୍-୧ବି ଗୋଟିଏ କମ୍ପାନୀର ବିଭିନ୍ନ ବ୍ରାଞ୍ଚ ମଧ୍ୟରେ ଅସ୍ଥାୟୀ ବଦଳି ପାଇଁ ଉପଲବ୍ଧ ହୋଇଥାଏ। ପରିଚାଳକ ପଦବୀ କିମ୍ବା ସ୍ବତନ୍ତ୍ର ଜ୍ଞାନ ଥିବା ବ୍ୟକ୍ତିଙ୍କୁ ଏଥିପାଇଁ ଭିଜା ମଞ୍ଜୁର କରାଯାଇଥାଏ। ଅସ୍ଥାୟୀ ଅପ୍ରବାସ କାର୍ଯ୍ୟ ଭିଜାଧାରୀ ହଜାର ହଜାର ଭାରତୀୟ ଆଇଟି ପେସାଦାର ଆମେରିକାରେ ରହିବା ଲାଗି ନୂଆ ଚାକିରି ପାଇବାକୁ ସଂଘର୍ଷ କରୁଛନ୍ତି। ଏଚ୍-୧ବି ଭିଜାଧାରୀଙ୍କ ପାଇଁ ଅବସ୍ଥା ସବୁଠୁ ସଙ୍ଗିନ୍ ହୋଇଛି। କାରଣ ସେମାନେ ୬୦ ଦିନ ମଧ୍ୟରେ ନୂଆ ନିଯୁକ୍ତି ପାଇ ନ ପାରିଲେ ଭାରତ ଫେରିବାକୁ ବାଧ୍ୟ ହେବେ। ବର୍ତ୍ତମାନର ସ୍ଥିତିରେ ସମସ୍ତ ଆଇଟି କମ୍ପାନୀ କର୍ମଚାରୀ ଛଟେଇ ମନୋବୃତ୍ତିରେ ଥିବାରୁ ସ୍ବଳ୍ପ ସମୟ ମଧ୍ୟରେ ଆଉ ଏକ ନିଯୁକ୍ତି ଖୋଜି ପାଇବା ଏକପ୍ରକାର ଅସମ୍ଭବ ହୋଇପଡ଼ିଛି।
