ରାଜଗାଙ୍ଗପୁର, ୨୧।୨(ଡି.ଏନ.ଏ.): ସୁନ୍ଦରଗଡ଼ ଜିଲା ରାଜଗାଙ୍ଗପୁର ଥାନା ଅନ୍ତର୍ଗତ ଜାମପାଲି ବାଇପାଶ ଠାରେ ଥିବା କ୍ରୀଷ୍ଣା ପାୱାର ଗୋଦାମରୁ ବନ୍ଧୁକ ସହ ଅନ୍ୟ ମାରଣାସ୍ତ୍ର ଦେଖାଇ ଇଲେକ୍ଟ୍ରିକ ଓୱାର (କନଡକଟର)ଡକାୟତି ଘଟଣାରେ ରାଜଗାଙ୍ଗପୁର ପୋଲିସ ୮ଜଣ ଡକାୟତଙ୍କ ସହ ଡକାୟତି ଜିନିଷ କିଣିଥିବା ବ୍ୟକ୍ତିକୁ ଗିରଫ କରି ସୋମବାର କୋର୍ଟ ଚାଲାଣ କରିଛି। ଘଟଣାରୁ ପ୍ରକାଶ ଯେ ଟାଟା ପାୱାର ବିଭିନ୍ନ ଉନ୍ନୟନ କାର୍ଯ୍ୟ ପାଇଁ କ୍ରିଷ୍ଣା ପାୱାରକୁ ଠିକା ଦେଇଥିବାବେଳେ କ୍ରିଷ୍ଣା ପାୱାର ଜାମିପଲ୍ଲୀ ବାଇପାସଠାରେ ତାଙ୍କ ବ୍ୟବହାର ସାମଗ୍ରୀ ରଖି ଗୋଦାମ କରିଥିଲେ l ଗତ ୧୭ ତାରିଖ ରାତି ୨ଟାବେଳେ ରାଜଗାଙ୍ଗପୁର ଜାମପାଲି ବଡ଼ ଗୁଡ଼ ଓ କୁତ୍ରା ଥାନା ଅନ୍ତର୍ଗତ ଝାରବେଡାର ୮ ଜଣ ଦୃର୍ବୃତ୍ତ ପିସ୍ତଲ ଖଣ୍ଡା ଲୁହାରଡ଼ ଲାଠି ନେଇ ଗୋଦାମରେ ଥିବା କର୍ମଚାରୀଙ୍କୁ ମାଡ଼ ମାରି ଲହୁଲୁହାଣ କରିଥିଲେ। ସେଠାରେ ଥିବା ଟାଟା ପିକଅପ୍ ଭ୍ୟାନ ନମ୍ବର ଓଡି ୦୫ ବିଜେ ୨୮୮୨ ରେ ଥିବା ଏକ ଟନ ୩୦ କେଜି ଇଲେକଟ୍ରିକ ଓୱାର କନଡକଟର ନେଇ କିଛି ରାସ୍ତା ଯିବା ପରେ ଓଡି ୧୪ଏ ଏ ୨୬୫୩ ମହେନ୍ଦ୍ରା ପିକଅପ ଭ୍ୟାନରେ ଅନଲୋଡ଼ କରି ତେତେରକେଲା ଜଙ୍ଗଲରେ ଗାଡି ସହ ରଖିଦେଇଥିଲେ। ଡକାୟତି ସାମଗ୍ରୀକୁ ରାଉରକେଲା ନିକଟ ବେଦବ୍ୟାସ ନେଇ ବିକ୍ରି କରି ଦେଇଥିଲେ। ରାଜଗାଙ୍ଗପୁର ଏସ୍ଡିପିଓ ଅଭିଷେକ କୁମାର ପାଣିଗ୍ରାହୀଙ୍କ ନେତୃତ୍ୱରେ ରାଜଗାଙ୍ଗପୁର ଆଇଆଇସି ବିଭତ୍ସ କୁମାର ପ୍ରଧାନ କାଂଶବାହାଲ ଫାଣ୍ଡି ଅଧିକାରୀ ଖଗେଶ୍ୱର ବିଶ୍ୱାଳ ଥାନା ଏସ୍ଆଇ ରତିକାନ୍ତ ପରିଡା, ଦେବଗ୍ରାହୀ ମହାନ୍ତି, ହରପ୍ରିୟା ମାଝୀ ବିଭିନ୍ନ ସ୍ଥାନରେ ଚଢ଼ାଉ କରିଥିଲେ। ଚିତ୍ରସେନ ଲାକ୍ରା, ମହେନ୍ଦ୍ର କୁଜୁର, ମିନକେତନ କୁଜୁର, ଭୂଷଣ ଲାକ୍ରା, କିରଣ ବାଗ, ଶୁଭମ ସାହୁ, ଦୀପକ ନାୟକ, କୁନ୍ଦନ ସା ଓ ଚୋରୀ ସାମଗ୍ରୀ କିଣିଥିବା ବେଦବ୍ୟାସ ଛକର ଗୁଡ଼ୁ ଶର୍ମାଙ୍କୁ ଗିରଫ କରିବାରେ ପୋଲିସ ସଫଳ ହୋଇଥିଲେ। ସେମାନଙ୍କ ଠାରୁ ଡକାୟତି ସାମଗ୍ରୀ ଜବତ କରିବା ସହ,୨ଟି ପିକଅପ୍ ଭ୍ୟାନ, ଗୋଟିଏ ଖଣ୍ଡା, ଗୋଟିଏ ଛୁରି, ଲୁହା ରଡ, ୪ଟି ମୋବାଇଲ ଜବତ କରିଛି। ସ୍ଥାନୀୟ ଏସ୍ଡିପିଓ ଅଭିଷେକ କୁମାର ପାଣିଗ୍ରାହୀ ଏକ ପ୍ରେସବାର୍ତ୍ତା ଦେଇ ଏହା ପ୍ରକାଶ କରିଛନ୍ତି।
