ନୂଆଗାଁ,୨୫।୧୧(ଡି.ଏନ.ଏ.): ନୟାଗଡ଼ ଜିଲା ନୂଆଗାଁ ଥାନା ପୋଲିସ ଠକେଇ ଅଭିଯୋଗରେ ଶୁକ୍ରବାର ଜଣେ ମହିଳାଙ୍କୁ ଗିରଫ କରି କୋର୍ଟ ଚାଲଣ କରିଛି। ସେ ହେଲେ ଯଶୋବନ୍ତୀ ବାରିକ (୪୮)।
ସୂଚନା ଅନୁଯାୟୀ, ବରଗଡ଼ ଜିଲାର ଯଶୋବନ୍ତୀ ଦୀର୍ଘ ଦିନ ହେଲା ନୂଆଗାଁ ଥାନା ମହିପୁର ଅଞ୍ଚଳରେ ରହି ଆସୁଥିଲେ। ଏହାରି ଭିତରେ ବିଭିନ୍ନ ମହିଳାଙ୍କ ସହ ମିଳାମିଶା କରି ସୁସମ୍ପର୍କ ରଖିଥିଲେ। ଏହି ସୁଯୋଗରେ ସେ ମହିଳାମାନଙ୍କ ମନରେ ବିଶ୍ୱାସ ସୃଷ୍ଟିକରି ସାହିପଡିଶା ଓ ମହିଳା ଗ୍ରୁପରୁ ପ୍ରାୟ ୮ ଲକ୍ଷ ଟଙ୍କା ଠକି ନେଇଥିବା ନୂଆଗାଁ ଥାନାରେ ଗତ ଅଗଷ୍ଟରେ ଅଭିଯୋଗ ହୋଇଥିଲା। ଅଭିଯୋଗକୁ ଭିତ୍ତି କରି ପୋଲିସ ଏକ ମାମଲା (ନଂ.୧୧୨/୨୧) ରୁଜୁ କରି ମହିଳାଙ୍କ ଉପରେ ନଜର ରଖିଥିଲା । ଗୁରୁବାର ତାଙ୍କୁ ବାଣିଗୋଛା ଥାନା ଅଞ୍ଚଳରୁ ଗିରଫ କରାଯାଇଥିବା ଥାନା ଅଧିକାରୀ ବସନ୍ତ କୁମାର ସାହୁ ସୂଚନା ଦେଇଛନ୍ତି।
