ଭୁବନେଶ୍ୱର,୨୮ା୧(ସୁନିତ୍ ମିଶ୍ର): ରାଜ୍ୟରେ ଧାନମଣ୍ଡି ଖୋଲିବା ଏବଂ ଧାନ ବିକ୍ରିରେ ଅବ୍ୟବସ୍ଥା କାରଣରୁ ଚାଷୀମାନେ ବହୁ ହଇରାଣ ହେଉଛନ୍ତି। ପ୍ରଦୂଷଣ ସାର୍ଟିଫିକେଟ ନାଁରେ ସାଧାରଣ ଲୋକମାନଙ୍କଠାରୁ ସରକାର ଅନେକ ହଜାର ଟଙ୍କାର ଫାଇନ ଆଦାୟ କରୁଛନ୍ତି। ଟାଟା ପାଓ୍ବାର ସ୍ମାର୍ଟ ମିଟର ଲଗାଇବା ନଁାରେ ଲୁଟ୍ କରିବାରେ ଲାଗିପଡ଼ିଛି। ଏହିସବୁ ପ୍ରସଙ୍ଗକୁ ନେଇ ନବନିର୍ମାଣ କୃଷକ ସଙ୍ଗଠନ ପକ୍ଷରୁ ବୁଧବାର ସକାଳ ୬ଟାରୁ ଅପରାହ୍ନ ୨ଟା ପର୍ଯ୍ୟନ୍ତ ୮ ଘଣ୍ଟା ପାଇଁ ଓଡ଼ିଶା ବନ୍ଦର ଡାକରା ଦିଆଯାଇଛି। ଅନ୍ୟପଟେ ବନ୍ଦ ପାଳନ ସମୟରେ କୌଣସି ଜରୁରିକାଳୀନ ସେବା ଯେପରି ବନ୍ଦ ନ ହେବ ସେଥିପ୍ରତି ଧ୍ୟାନ ଦିଆଯିବ ବୋଲି କୁହାଯାଇଛି। ଏନେଇ ନବନିର୍ମାଣ କୃଷକ ସଙ୍ଗଠନର ରାଷ୍ଟ୍ରୀୟ ସଂଯୋଜକ ଅକ୍ଷୟ କୁମାର ଗତ ୧୭ ତାରିଖରେ ଖବରଦାତା ସମ୍ମିଳନୀକରି ସୂଚନା ଦେଇଥିବା ବେଳେ ପରବର୍ତ୍ତୀ ସମୟରେ ରାଜ୍ୟର ବିଭିନ୍ନ ଅଞ୍ଚଳରେ ପ୍ରଚାର ଜରିଆରେ ବନ୍ଦପାଳନକୁ ସମର୍ଥନ ଦେବା ଲାଗି ଅନୁରୋଧ ମଧ୍ୟ କରାଯାଉଛି। ଅକ୍ଷୟ କୁମାର କହିଛନ୍ତି, ଜରୁରିକାଳୀନ ସେବା କ୍ଷେତ୍ରରେ କୌଣସି ପ୍ରକାର ପ୍ରଭାବିତ ହେବାକୁ ଦିଆଯିବନାହିଁ। ରାଜ୍ୟର ୩୦ ଜିଲାରେ ଦୋକାନବଜାର ବନ୍ଦ କରାଯିବ, ଗାଡି ମଟର ଚଳାଚଳକୁ ଅଟକାଯିବ ବୋଲି ସେ କହିଛନ୍ତି। ଅନ୍ୟପଟେ ପ୍ରଦେଶ କଂଗ୍ରେସ କମିଟି(ପିସିସି) ସଭାପତି ଭକ୍ତ ଚରଣ ଦାସ ବନ୍ଦପାଳନକୁ ତାଙ୍କ ଦଳ ସମର୍ଥନ କରିବା ନେଇ ମଙ୍ଗଳବାର ଘୋଷଣା କରିଛନ୍ତି।
ଭକ୍ତ କହିଛନ୍ତି, ନବିନିର୍ମାଣ ସଙ୍ଗଠନ ପକ୍ଷରୁ ଓଡ଼ିଶା ବନ୍ଦ ଡାକରାକୁ କଂଗ୍ରେସ ସମର୍ଥନ କରିବ। ରାଜ୍ୟର ସବୁ ଜିଲା କଂଗ୍ରେସ କମିଟି ପକ୍ଷରୁ ଉକ୍ତ ବନ୍ଦ ପାଳନକୁ ସମର୍ଥନ ଦେବେ। ରାଜ୍ୟବ୍ୟାପୀ ଧାନକିଣାରେ ଅବ୍ୟବସ୍ଥା, ଯାନବାହନର ପ୍ରଦୂଷଣ ସାର୍ଟିଫିକେଟ ଆଳରେ ମାତ୍ରାଧିକ ତଣ୍ଡ ଆଦାୟ, ବିଜୁଳି ଟାରିଫକୁ ନେଇ ରାଜ୍ୟରେ ସରକାର, ଓଇଆର୍ସି ଓ ଟାଟା ପାଓ୍ବାର ମନମାନି କରୁଛି। ଏମ୍ଜିଏନ୍ଆର୍ଇଜିଏସ୍କୁ ଉଚ୍ଛେଦ କରିବା ବିରୋଧରେ କଂଗ୍ରେସ ପକ୍ଷରୁ ରାଜ୍ୟବ୍ୟାପୀ ଆନ୍ଦୋଳନ ହେଇ ଆସୁଛି। ଏହି ପରିପ୍ରେକ୍ଷୀରେ ଜନସାଧାରଣଙ୍କ ସମସ୍ୟା ସମ୍ବଳିତ ଉପରୋକ୍ତ ବିଷୟଗୁଡିକୁ ନେଇ ନବନିର୍ମାଣ କୃଷକ ସଙ୍ଗଠନ ପକ୍ଷରୁ ଓଡ଼ିଶା ବନ୍ଦ ଡାକରା ଦିଆଯାଇଥିବା ବେଳେ କଂଗ୍ରେସ ଏହାକୁ ସମର୍ଥନ କରୁଛି।
ବିଜେଡି ନବନିର୍ମାଣ କୃଷକ ସଙ୍ଗଠନର ଓଡ଼ିଶା ବନ୍ଦ ଡାକରା ଚାଷୀମାନଙ୍କ ପାଇଁ ହିତକର ପଦକ୍ଷେପ ବୋଲି କହିଛି । ଚାଷୀଙ୍କ ହିତରେ ବନ୍ଦ ପାଳନ ହେଉଥିବା କହି ପରୋକ୍ଷରେ ବିଜେଡି ନବନିର୍ମାଣ କୃଷକ ସଙ୍ଗଠନକୁ ବଳ ଦେଇଛି। ଦଳର ମୁଖପାତ୍ର ଲେନିନ୍ ମହାନ୍ତି ମଙ୍ଗଳବାର ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି, ଓଡ଼ିଶାରେ ଚାଷୀମାନେ ରାଜରାସ୍ତାରେ ଅଛନ୍ତି। ଉପକୂଳରୁ ଉପାନ୍ତ ପର୍ଯ୍ୟନ୍ତ ବିଭିନ୍ନ ସମସ୍ୟା ନେଇ ଚାଷୀମାନେ ଭାଜପା ସରକାର ବିରୋଧରେ ଆନ୍ଦୋଳନ ଜାରି ରଖିଛନ୍ତି। ବିଜେଡି ପ୍ରତିଷ୍ଠା ପରଠାରୁ ଦଳ ପକ୍ଷରୁ ସବୁବେଳେ ଚାଷୀଙ୍କ ସହିତ ଠିଆ ହୋଇଛି। ପଶ୍ଚିମ ଓଡିଶା ଏବଂ ଅନ୍ୟ ସ୍ଥାନଗୁଡିକରେ ବିଜେଡି ଚାଷୀଙ୍କ ପାଇଁ ଆନ୍ଦୋଳନ ଚଲାଇଛି। ବିଜେଡି ନିଜର ପୂର୍ବନିର୍ଦ୍ଧାରିତ କାର୍ଯ୍ୟକ୍ରମ ଜାରି ରଖିବ ବୋଲି ଲେନିନ୍ କହିଛନ୍ତି।
ଭାଜପା ମୁଖପାତ୍ର ମନୋଜ ମହାପାତ୍ର କହିଛନ୍ତି, ସବୁ ପ୍ରଫେଶନରେ ନକଲି ଏବଂ ଅସଲି ଥାଆନ୍ତି। ଯେଉଁମାନେ ଆନ୍ଦୋଳନ ଡାକରା ଦେଇଛନ୍ତି ସେମାନେ ସବୁ ହେଉଛନ୍ତି ନକଲି ଚାଷୀ। ନା ଏମାନେ ହଳ କରିପାରିବେ ନା ବାହୁଙ୍ଗି ବେକରେ ପକାଇପାରିବେ। ଅତୀତରେ ପଶ୍ଚିମ ଓଡ଼ିଶାରେ ଚାଷୀ ହନ୍ତସନ୍ତ ହେଉଥିବାବେଳେ ଦଲାଲମାନେ ମାଲାମାଲ ହେଉଥିଲେ। ମୋହନ ମାଝୀଙ୍କ ସରକାରରେ କିନ୍ତୁ ଚାଷୀମାନେ ଖୁସିରେ ଅଛନ୍ତି। ଭାଜପା ସରକାର ଆସିବା ପରେ ଧାନ କୁଇଣ୍ଟାଲ ପିଛା ୮୦୦ ଟଙ୍କା ଅଧିକ ଟଙ୍କା ଦେଉଛି। କଂଗ୍ରେସ ସବୁବେଳେ ଚାଷୀ ବିରୋଧୀ, ତେଣୁ ସେମାନଙ୍କ ସମର୍ଥନର କିଛି ମୂଲ୍ୟ ନାହିଁ।
