ନୂଆଦିଲ୍ଲୀ, ୧୮।୭ (ପି.ଟି.):ରୁଙ୍ଗଟା ସନ୍ସ ପ୍ରାଇଭେଟ ଲିମିଟେଡ୍କୁ ଆବଣ୍ଟିତ ପ୍ରସ୍ତାବିତ ଅଳକାନନ୍ଦା କୋଇଲା ଖଣିରେ ଖନନ ପାଇଁ ଅନୁଗୋଳ ଜିଲାରେ ୭୫୦ ହେକ୍ଟରରୁ ଅଧିକ ଜଙ୍ଗଲ ଜମି ହସ୍ତାନ୍ତର ହେବାର ସମ୍ଭାବନା ରହିଥିବା ଜଣାପଡ଼ିଛି। ଏହି ଖଣିସ୍ଥଳଟି ଶିମିଳିପାଳ-ସାତକୋଶିଆ ଗଣ୍ଡ ବାଘ କରିଡରଠାରୁ ପ୍ରାୟ ୪.୯ କିଲୋମିଟର ଏବଂ ସମ୍ବଲପୁର ହାତୀ ସଂରକ୍ଷିତ ଅଞ୍ଚଳଠାରୁ ୮.୫ କିଲୋମିଟର ଦୂରରେ ଅବସ୍ଥିତ।
ନିକଟ ବର୍ଷଗୁଡ଼ିକରେ ଏହି ସ୍ଥାନ ଓ ଏହାର ଆଖପାଖ ଅଞ୍ଚଳରେ କେବଳ ହାତୀ ନୁହନ୍ତି ବରଂ ଭାଲୁ ଏବଂ କଲରାପତରିଆ ବାଘ ସମେତ ଅନ୍ୟାନ୍ୟ ବନ୍ୟଜନ୍ତୁଙ୍କ ଉପସ୍ଥିତି ଦେଖିବାକୁ ମିଳିଛି। ଜଙ୍ଗଲ ଜମି ହସ୍ତାନ୍ତର ଯୋଗୁ ୩.୩ ଲକ୍ଷରୁ ଅଧିକ ଗଛ କଟାଯିବ। ଜୁଲାଇ ୭ରେ ଅନୁଷ୍ଠିତ ବୈଠକରେ ପରିବେଶ ମନ୍ତ୍ରଣାଳୟର ଜଙ୍ଗଲ ପରାମର୍ଶଦାତା ସମିତି (ଏଫ୍ଏସି) ଦ୍ୱାରା ଏହାକୁ ପ୍ରଥମ ପର୍ଯ୍ୟାୟ ନୀତିଗତ ମଞ୍ଜୁରୀ ପାଇଁ ସୁପାରିସ କରାଯାଇଥିଲା। ଦ୍ୱିତୀୟ ପର୍ଯ୍ୟାୟ ଆନୁଷ୍ଠାନିକ ହସ୍ତାନ୍ତର ମଞ୍ଜୁରୀ ପ୍ରଦାନ କରାଯିବା ପୂର୍ବରୁ ପ୍ରଥମ ପର୍ଯ୍ୟାୟ କ୍ଲିୟରାନ୍ସରେ କ୍ଷତିପୂରଣମୂଳକ ବନୀକରଣ ସମେତ କେତେକ ସର୍ତ୍ତ ପୂରଣ ହେବା ଆବଶ୍ୟକ। ଏହି ବୈଠକରେ କମିଟି ଏହା ମଧ୍ୟ ଲକ୍ଷ୍ୟ କରିଛି ଯେ, ଖଣିସ୍ଥଳର ପୂର୍ବ ଏବଂ ଦକ୍ଷିଣ ସୀମାରେ ଓଲହାନୀ ନଦୀ ପ୍ରବାହିତ ହେଉଛି। ବ୍ରାହ୍ମଣୀ ନଦୀର ଉପନଦୀ ଟିକ୍ରା ନଦୀ ପ୍ରସ୍ତାବିତ ଖଣି ଲିଜ୍ ଅଞ୍ଚଳରୁ ପ୍ରାୟ ୭୫୦ ମିଟର ଉତ୍ତରରେ ପ୍ରବାହିତ ହେଉଛି। ଏହି ପ୍ରସ୍ତାବିତ ପ୍ରକଳ୍ପ ଦ୍ୱାରା ୫ଟି ଗାଁର ୮୧୮ ପରିବାର ବିସ୍ଥାପିତ ହେବେ ଏବଂ ୧,୫୮୪ ପରିବାର ପ୍ରଭାବିତ ହେବେ। ଏଫ୍ଏସି କେତେକ ସର୍ତ୍ତ ଆଧାରରେ ମଞ୍ଜୁରୀ ପାଇଁ ସୁପାରିସ କରିଛି, ଯେଉଁଥିରେ ଓଲହାନୀ ନଦୀର ଉଭୟ ପାର୍ଶ୍ୱରେ ସର୍ବନିମ୍ନ ୫୦ ମିଟର ଚଉଡ଼ାର ଏକ ସୁରକ୍ଷା ପ୍ରାଚୀର ନିଶ୍ଚିତ କରିବାକୁ ରାଜ୍ୟ ସରକାରଙ୍କୁ କୁହାଯାଇଛି।
ବୈଠକର ବିବରଣୀ ଅନୁଯାୟୀ, ଅନ୍ୟ ଏକ ସର୍ତ୍ତ ହେଉଛି ମୁଖ୍ୟ ବନ୍ୟପ୍ରାଣୀ ୱାର୍ଡେନଙ୍କ ଦ୍ୱାରା ଅନୁମୋଦିତ ଆଞ୍ଚଳିକ ବନ୍ୟପ୍ରାଣୀ ପରିଚାଳନା ଯୋଜନାର କାର୍ଯ୍ୟାନ୍ବୟନ। ବୈଠକର ବିବରଣୀରେ ଏହା ମଧ୍ୟ କୁହାଯାଇଛି ଯେ, ‘ରାଜ୍ୟ ଜଙ୍ଗଲ ବିଭାଗ ସହ ପରାମର୍ଶ କରି ଏବଂ ଅନୁମୋଦିତ ଖଣି ଯୋଜନା, ଖଣି ବନ୍ଦ ଯୋଜନା ଏବଂ ଜଙ୍ଗଲ ବିଭାଗର ନିର୍ଦ୍ଦେଶାବଳୀ ଅନୁଯାୟୀ ପର୍ଯ୍ୟାୟକ୍ରମେ ଗଛ କଟାଯିବ’।