କେନ୍ଦୁଝର,୩୧।୫(ସ୍ବ.ପ୍ର.): ଓଡ଼ିଶା ଉଚ୍ଚ ମାଧ୍ୟମିକ ଶିକ୍ଷା ପରିଷଦ ଦ୍ୱାରା ପରିଚାଳିତ ଚଳିତ ବର୍ଷର ଯୁକ୍ତ ଦୁଇ ବିଜ୍ଞାନ ଏବଂ ବାଣିଜ୍ୟ ପରୀକ୍ଷା ଫଳ ବୁଧବାର ପ୍ରକାଶ ପାଇଛି । ଏଥିରେ କେନ୍ଦୁଝର ଜିଲାର ୭୩.୯% ଛାତ୍ରୀଛାତ୍ର କୃତକାର୍ଯ୍ୟ ହୋଇଛନ୍ତି।
ମିଳିଥିବା ସୂଚନା ମୁତାବକ, ୨୦୨୩ରେ +୨ ବିଜ୍ଞାନ ପରୀକ୍ଷାରେ କେନ୍ଦୁଝର ଜିଲାର ବିଭିନ୍ନ ମହାବିଦ୍ୟାଳୟର ୩୦୮୮ ଛାତ୍ରୀଛାତ୍ର ପରୀକ୍ଷା ଦେଇଥିଲେ । ସେମାନଙ୍କ ମଧ୍ୟରୁ ୭୦୦ଜଣ ପ୍ରଥମ ଶ୍ରେଣୀରେ କୃତକାର୍ଯ୍ୟ ହୋଇଛନ୍ତି । ୭୨୦ ଛାତ୍ରୀଛାତ୍ର ଦ୍ୱିତୀୟ ଶ୍ରେଣୀରେ ଉତ୍ତୀର୍ଣ୍ଣ ହୋଇଥିବା ବେଳେ ୮୦୮ଜଣ ତୃତୀୟ ଓ ୫ଜଣ କମ୍ପାଟମେଣ୍ଟାଲରେ ପାସ୍ କରିଥିବା ଜଣାପଡିଛି। ପ୍ରଥମ, ଦ୍ୱିତୀୟ, ତୃତୀୟ ଓ କମ୍ପାର୍ଟମେଣ୍ଟାଲକୁ ମିଶାଇ କେନ୍ଦୁଝର ଜିଲାର ମୋଟ ୨୨୩୮ ଛାତ୍ରୀଛାତ୍ର କୃତକାର୍ଯ୍ୟ ହୋଇଥିବା ସୂଚନା ମିଳିଛି।
୧୫ଜଣ ଛାତ୍ରଛାତ୍ରୀ ପରୀକ୍ଷା ଦେଉଥିବା ବେଳେ କପି କରି ଧରାପଡିଥିବା କାରଣରୁ ସେମାନଙ୍କ ପରୀକ୍ଷା ଫଳ ସ୍ଥଗିତ ରଖାଯାଇଥିବା ଯୁକ୍ତ ୨ ଆଞ୍ଚଳିକ କାର୍ଯ୍ୟାଳୟ ସୂତ୍ରରୁ ସୂଚନା ମିଳିଛି। ସେହିପରି ଯୁକ୍ତ ୨ ବାଣିଜ୍ୟ ୯୫୫ ଛାତ୍ରୀଛାତ୍ର ପରୀକ୍ଷା ଦେଇଥିଲେ । ସେମାନଙ୍କ ମଧ୍ୟରୁ ୧୭୯ଜଣ ପ୍ରଥମ ଶ୍ରେଣୀରେ ପାସ୍ ହୋଇଥିବା ବେଳେ ୧୩୫ଜଣ ଦ୍ୱିତୀୟ ଏବଂ ୩୪୫ଜଣ ତୃତୀୟ ଓ ୬ଜଣ କମ୍ପାର୍ଟମେଣ୍ଟାଲରେ ପାସ୍ କରିଛନ୍ତି। ମୋଟ ପାସ୍ ହାର ୬୯.୬୫ ରହିଥିବା ବେଳେ ବାଣିଜ୍ୟରେ ଜିଲାରୁ ମୋଟ ୬୬୫ଜଣ କୃତକାର୍ଯ୍ୟ ହୋଇଛନ୍ତି।
ଅନ୍ୟପକ୍ଷେ କେନ୍ଦୁଝର ଧରଣୀଧର ହାୟର ସେକେଣ୍ଡାରୀ ସ୍କୁଲରୁ ଯୁକ୍ତ ୨ ବିଜ୍ଞାନରେ ୧୦୪ଜଣ ପ୍ରଥମ ଶ୍ରେଣୀରେ, ୪୮ଜଣ ଦ୍ୱିତୀୟ ଏବଂ ୯ଜଣ ତୃତୀୟ ଶ୍ରେଣୀରେ ଉତ୍ତୀର୍ଣ୍ଣ ହୋଇ ୧୬୧ଜଣ କୃତକାର୍ଯ୍ୟ ହୋଇଛନ୍ତି। ସେହିପରି ଯୁକ୍ତ ୨ ବାଣିଜ୍ୟରେ ୭୭ ଛାତ୍ରୀଛାତ୍ର କୃତକାର୍ଯ୍ୟ ହୋଇଛନ୍ତି। ସେଥିମଧ୍ୟରୁ ୪୭ଜଣ ପ୍ରଥମ ଶ୍ରେଣୀରେ ପାସ୍ କରିଥିବା ବେଳେ ୨୦ଜଣ ଦ୍ୱିତୀୟ ଏବଂ ୧୦ଜଣ ଛାତ୍ରୀଛାତ୍ର ତୃତୀୟ ଶ୍ରେଣୀରେ କୃତକାର୍ଯ୍ୟ ହୋଇଛନ୍ତି। ଏହି ମହାବିଦ୍ୟାଳୟର ଯୁକ୍ତ ୨ ବିଜ୍ଞାନ ଏକ୍ସରେଗୁଲାରରେ ୬ ଜଣ ପାସ୍ କରିଛନ୍ତି। ଏମାନଙ୍କ ମଧ୍ୟରୁ ୪ଜଣ ଦ୍ୱିତୀୟ ଶ୍ରେଣୀରେ ପାସ୍ କରିଥିବାବେଳେ ୨ଜଣ ତୃତୀୟ ଶ୍ରେଣୀରେ ପାସ କରିଛନ୍ତି। ସୂଚନା ଅନୁସାରେ ଡିଡି ହାୟର ସେକେଣ୍ଡାରୀ ସ୍କୁଲର ପଦ୍ମିନୀ ଓଝା କଲେଜର ବିଜ୍ଞାନ ରେଗୁଲାରରେ ସର୍ବାଧିକ ୯୨.୬୭%ରେ ୫୫୬ ନମ୍ବର ରଖିଥିବା ବେଳେ ଶିବମ ସୁନ୍ଧରମ ସାହୁ ଦ୍ୱିତୀୟ ଏବଂ ଦିଗ୍ବିଜୟ ଦଳ ବେହେରା ତୃତୀୟ ସ୍ଥାନରେ ରହିଛନ୍ତି।
