ଭୁବନେଶ୍ବର,୭ା୧୦(ବ୍ୟୁରୋ):ଆଇପିଏସ୍ ଅଫିସର ପରିଚୟ ଦେଇ ଅଶ୍ଳୀଳ ଭିଡିଓ ଭାଇରାଲ କରିବାର ଧମକ ଦେଇ ସାଇବର ଠକ ଜଣେ ଯୁବକଙ୍କଠାରୁ ୭୧ହଜାର ଟଙ୍କା ଠକି ନେଇଛନ୍ତି। ଠକାମିରେ ଶିକାର ହୋଇଥିବା ବ୍ୟକ୍ତି ଜଣକ ହେଲେ ଖୋର୍ଦ୍ଧା ଜିଲା ଜଟଣୀ ଅଞ୍ଚଳର ବେଣୁଧର ମୁଦୁଲି। ତାଙ୍କ ଅଭିଯୋଗକ୍ରମେ ଭୁବନେଶ୍ୱର ସାଇବର ଥାନା ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ସୂଚନାନୁସାରେ, ବେଣୁଧର ମେଡ଼ିସିନ୍ ରିପ୍ରେଜେଣ୍ଟିଭ୍ ଭାବେ କାମ କରନ୍ତି। ଅନେକ ସମୟରେ ତାଙ୍କ ହ୍ବାଟସ୍ଆପ୍କୁ ଏକ ଅଜଣା ନମ୍ବରରେ ବାରମ୍ବାର ମେସେଜ୍ ଆସୁଥିଲା। ସେ ତାହାକୁ ଗୁରୁତ୍ୱ ଦେଉ ନ ଥିଲେ। ହେଲେ ପରବର୍ତ୍ତୀ ସମୟରେ ଏକ ଭିଡିଓ କଲ୍ ଆସିବାରୁ ସେ ତାହା ରିସିଭ୍ କରିଦେଇଥିଲେ। ଉକ୍ତ ଭିଡିଓରେ ଜଣେ ଯୁବତୀ ଉଲଗ୍ନ ଅବସ୍ଥାରେ ଥିବା ଦେଖିବାରୁ ସେ ସଙ୍ଗେ ସଙ୍ଗେ କଲ୍ଟିକୁ କାଟି ଦେଇଥିଲେ। କିଛିଦିନ ପରେ ପୁଣି ତାଙ୍କ ପାଖକୁ ଏକ କଲ୍ ଆସିଥିଲା। କଲ୍ କରିଥିବା ବ୍ୟକ୍ତି ଜଣକ ନିଜକୁ ଆଇପିଏସ୍ ଅଫିସର ପରିଚୟ ଦେଇଥିଲେ। ଦେଢ଼ଲକ୍ଷ ଟଙ୍କା ନ ଦେଲେ ତାଙ୍କ ଅଶ୍ଳୀଳ ଭିଡିଓ ଭାଇରାଲ୍ କରିଦେବାକୁ ଧମକ ଦେଇଥିଲା। ଫଳରେ ସେ ଭୟରେ ୪ଟି କିସ୍ତିରେ ୭୧ ହଜାର ଟଙ୍କା ଅନ୍ଲାଇନ ମାଧ୍ୟମରେ ଟ୍ରାନ୍ସଫର କରିଥିଲେ। କିନ୍ତୁ ସାଇବର ଠକ ଜଣକ ମୁଦୁଲିଙ୍କୁ ବାକି ଟଙ୍କା ଦେବାକୁ କହିଥିଲେ। ହେଲେ ଠକାମିରେ ଶିକାର ହୋଇଥିବା ଜାଣିବା ପରେ ସେ ଶେଷରେ ଭୁବନେଶ୍ୱର ସାଇବର ଥାନାରେ ଲିଖିତ ଅଭିଯୋଗ କରିଥିଲେ।
