ଭୁବନେଶ୍ୱର,୨୭।୧୨(ରବିନାରାୟଣ ଜେନା): ରାଜ୍ୟରେ ଚାଷୀଙ୍କ ବିକାଶ ପାଇଁ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ବହୁବିଧ ଯୋଜନା କାର୍ଯ୍ୟକାରୀ କରାଯାଉଛି। ଏହାକୁ ତୃଣମୂଳସ୍ତରରେ କାର୍ଯ୍ୟକାରୀ କରିବା ଲାଗି ବିଭାଗୀୟ ସଚିବ ଏବଂ ବରିଷ୍ଠ ଅଧିକାରୀଙ୍କୁ ଦାୟିତ୍ୱ ଦିଆଯାଇଛି। ହେଲେ ବାସ୍ତବରେ ତାହା ଚାଷୀଙ୍କ ନିକଟରେ ପହଞ୍ଚୁଛି କି ନାହିଁ ତାହା ପରଖିବାକୁ କେହିନାହିଁ। ଫଳରେ ଚାଷୀଙ୍କ ଆର୍ଥିକ ମାନଦଣ୍ଡ ବୃଦ୍ଧିରେ ଅନ୍ତରାୟ ସୃଷ୍ଟି ହେଉଛି।
ରାଜ୍ୟସ୍ତରୀୟ ବ୍ୟାଙ୍କ ସମୂହ କମିଟି(ଏସ୍ଏଲ୍ବିସି) ବୈଠକରେ ଉନ୍ନୟନ ଆୟୁକ୍ତ ଓ ଅର୍ଥ ବିଭାଗର ପ୍ରମୁଖ ସଚିବ ସବୁବେଳେ ବ୍ୟାଙ୍କ କର୍ତ୍ତୃପକ୍ଷଙ୍କୁ କିଷାନ କ୍ରେଡିଟ୍ କାର୍ଡ(କେସିସି) ଥିବା ଚାଷୀଙ୍କୁ ଋଣ ଦେବାପାଇଁ ବାରମ୍ୱାର ନିର୍ଦ୍ଦେଶ ଦେଉଛନ୍ତି। ହେଲେ ତାହା କିଭଳି ପ୍ରତିଫଳିତ ହେଉନାହିଁ ମତ୍ସ୍ୟ ଓ ପଶୁସମ୍ପଦ ବିଭାଗ ତଥ୍ୟରୁ ଜଣାଯାଇଛି। ବିଭାଗୀୟ ସୂଚନା ଅନୁଯାୟୀ, ପଶୁପାଳନ ଓ ମତ୍ସ୍ୟଚାଷୀଙ୍କ ପାଇଁ କେସିସି ମାଧ୍ୟମରେ ଯେଉଁ ଋଣ ଆବେଦନ ଆସିଥିଲା ତା’ର ମାତ୍ର ୩୦ପ୍ରତିଶତ ଆବେଦନକୁ ବିଚାରକୁ ନିଆଯାଇଥିବାବେଳେ ପ୍ରାୟ ୭୦ ପ୍ରତିଶତ ଆବେଦନକୁ ନାକଚ କରି ଦିଆଯାଇଛି।
ବିଭାଗ ପକ୍ଷରୁ ଡିସେମ୍ୱର ୧୭ରେ ଏସ୍ଏଲ୍ବିସିକୁ ପ୍ରଦାନ କରାଯାଇଥିବା ବିବରଣୀରେ ସ୍ୱତନ୍ତ୍ର ସଚିବ ଦର୍ଶାଇଛନ୍ତି ଯେ, ୩୦ ସେପ୍ଟେମ୍ୱର ୨୦୨୫ ସୁଦ୍ଧା ବିଭିନ୍ନ ବ୍ୟାଙ୍କରେ ମୋଟ ୬୯,୧୮୭ଟି ପଶୁପାଳନ ଆବେଦନ ଗ୍ରହଣ ହୋଇଥିବା ବେଳେ ଏଥିମଧ୍ୟରୁ ୧୯,୧୬୭ଟି ମଞ୍ଜୁର, ୪୭,୬୨୦ଟି ନାକଚ ଏବଂ ୨,୪୦୦ଟି ବିଚାରାଧୀନ ରହିଛି। ବ୍ୟାଙ୍କ ପକ୍ଷରୁ ଏତେସଂଖ୍ୟକ ଚାଷୀଙ୍କ ଆବେଦନ ଖାରଜ ହେବା ଚିନ୍ତା ବଢାଇଛି।
ତଥ୍ୟ ଅନୁସାରେ, ମତ୍ସ୍ୟଚାଷ କ୍ଷେତ୍ରରେ ୧୧,୮୪୫ଟି ଗ୍ରହଣ ଆବେଦନ ମଧ୍ୟରୁ ୨,୫୪୪ଟି ମଞ୍ଜୁର, ୯,୦୬୧ଟି ନାକଚ ଏବଂ ୨୪୦ଟି ବିଚାରାଧୀନ ରହିଛି। ଏଥିମଧ୍ୟରୁ ଚଳିତ ବର୍ଷ ମାତ୍ର ୩୪ଟି ଆବେଦନ ମଞ୍ଜୁର ହୋଇଛି। ଏନେଇ ମତ୍ସ୍ୟ ନିର୍ଦ୍ଦେଶକ ବୈଠକରେ ପରାମର୍ଶ ଦେଇଛନ୍ତି ଯେ, କେସିସି ମଞ୍ଜୁର କରୁଥିବା ଗ୍ରାମ୍ୟ ଶାଖାଗୁଡ଼ିକର ନିୟମିତ ସମୀକ୍ଷା କରାଯାଇ ଆବେଦନଗୁଡ଼ିକର ବିଚାରାଧୀନ ଅବସ୍ଥା ହ୍ରାସ କରାଯାଉ। ଏହାଦ୍ୱାରା ଅଧିକ ସଂଖ୍ୟକ ଚାଷୀ ଯୋଜନାର ଲାଭ ପାଇପାରିବେ ବୋଲି ସେ ମତ ଦେଇଛନ୍ତି।
ପଶୁପାଳନ ଓ ପଶୁ ଚିକିତ୍ସା ନିର୍ଦ୍ଦେଶକ ଗୁରୁତ୍ୱ ଦେଇ କହିଛନ୍ତି ଯେ, ଦସ୍ତାବିଜ୍ ପ୍ରକ୍ରିୟାକୁ ସରଳୀକରଣ କରାଯାଇ ସର୍ୱାଧିକ ଚାଷୀ ଯୋଜନାଗୁଡ଼ିକର ସୁବିଧା ପାଇପାରିବେ। ଏହା ଦ୍ୱାରା ଆବେଦନ ନାକଚ ହେବାର ସଂଖ୍ୟା ହ୍ରାସପାଇବ ବୋଲି ସେ ଆଶା ପ୍ରକାଶ କରିଛନ୍ତି। ପଶୁପାଳନ ଓ ପଶୁଚିକିତ୍ସା ଉପ-ନିର୍ଦ୍ଦେଶକ ସୂଚନା ଦେଇଛନ୍ତି ଯେ, ନିର୍ଦ୍ଦେଶାଳୟର ବିଭିନ୍ନ ଯୋଜନା ଅଧୀନରେ ସହାୟତାପ୍ରାପ୍ତ ଚାଷୀଙ୍କୁ ବ୍ୟାଙ୍କଗୁଡ଼ିକ କାର୍ଯ୍ୟକାରୀ ପୁଞ୍ଜି (ୱାର୍କିଂ କ୍ୟାପିଟାଲ) ଋଣ ଯୋଗାଇ ଦେବା ଉଚିତ। ମୟୂରଭଞ୍ଜ ଜିଲାର ଉଦାହରଣ ଦେଇ ସେ କହିଛନ୍ତି, ସେଠାରେ ବ୍ୟାଙ୍କଗୁଡ଼ିକ କାର୍ଯ୍ୟକାରୀ ପୁଞ୍ଜି ଋଣ ବଢ଼ାଉନାହାନ୍ତି। ଏହା ଚାଷୀଙ୍କ ପାଇଁ ବଡ଼ ଅସୁବିଧା ସୃଷ୍ଟି କରୁଛି ବୋଲି ସେ ମତ ଦେଇଛନ୍ତି। ମତ୍ସ୍ୟ ନିର୍ଦ୍ଦେଶକ ଆହୁରି ସୂଚନା ଦେଇଛନ୍ତି ଯେ, ସମବାୟ ବ୍ୟାଙ୍କ ମତ୍ସ୍ୟଚାଷ କେସିସି ପ୍ରସ୍ତାବଗୁଡ଼ିକରେ ସର୍ୱାଧିକ ମଞ୍ଜୁରୀ କରିଛି। ଅନ୍ୟ ବ୍ୟାଙ୍କଗୁଡ଼ିକୁ ପରାମର୍ଶ ଦେଇ ସେ କହିଛନ୍ତି, ପଶୁପାଳନ ଓ ମତ୍ସ୍ୟଚାଷୀଙ୍କୁ କେସିସି ପ୍ରଦାନରେ ଅଧିକ ଗୁରୁତ୍ୱ ଦିଆଯାଉ ଏବଂ କୃଷି କେସିସି ସହିତ ଏହାକୁ ଏକ ଯୌଗିକ ଋଣ (କମ୍ପୋଜିଟ୍ ଲୋନ୍) ରୂପେ ବଢ଼ାଇ ଦିଆଯାଉ। କାରଣ ୨ ଲକ୍ଷ ଟଙ୍କା ପର୍ଯ୍ୟନ୍ତ କୌଣସି ଜାମିନ (କୋଲାଟେରାଲ୍) ଆବଶ୍ୟକତା ନାହିଁ ବୋଲି ସେ ଉଲ୍ଲେଖ କରିଛନ୍ତି।
