ବାଲୁଗାଁ,୩୦।୩(ଡି.ଏନ୍.ଏ.): ବାଲୁଗାଁ ଥାନା ଅଧୀନ ବାବାଲୁଗାଁ ବସଷ୍ଟାଣ୍ଡର ଅନତି ଦୂରରେ ମଙ୍ଗଳବାର ଅପରାହ୍ନ ସ୍ପଷ୍ଟ ଦିବାଲୋକରେ ଏକ ଲୁଟ୍ ହୋଇଛି। ଜଣେ ସମବାୟ କର୍ମଚାରୀଙ୍କଠାରୁ ଦୁର୍ବୃତ୍ତମାନେ ବନ୍ଧୁକ ଓ ମାରଣାସ୍ତ୍ର ଦେଖାଇ ନଗଦ ୭ଲକ୍ଷ ୫୦ହଜାର ୫୬୦ଟଙ୍କା ଓ ମୋବାଇଲ ଫୋନ୍ ଲୁଟି ନେଇଛନ୍ତି। ଏହାଦେଖି ସ୍ଥାନୀୟ ଲୋକ ଭୟଭୀତ ହୋଇଯାଇଥିବା ବେଳେ ପରେ ଖବରପାଇ ପୋଲିସ ଆସି ତଦନ୍ତ ଚଳାଇଛି। ଖବର ଅନୁଯାୟୀ,ବାଲୁଗାଁ ନିକଟ ବଡ଼କୂଳ ସେବା ସମବାୟ ସମିତିର ସହ-ସମ୍ପାଦକ ତଥା କୋଷାଧ୍ୟକ୍ଷ ଭୋବନେଶ୍ୱର ରଥ ତାଙ୍କର ଜଣେ ସହକର୍ମୀ ସମୀର କୁମାର ସାହୁଙ୍କ ସହ ବଡ଼କୂଳ ଓ ଡୁଙ୍ଗମାଳ ପଞ୍ଚାୟତ ଅଧୀନ ଗ୍ରାମଗୁଡ଼ିକରୁ ଅପରାହ୍ନରେ କୃଷି ଋଣ ଅର୍ଥ ଆଦାୟ କରି ବାଲୁଗାଁସ୍ଥିିତ ଖୋର୍ଦ୍ଧା କେନ୍ଦ୍ର ସମବାୟ ବ୍ୟାଙ୍କକୁ ଜମା କରିବା ନିମନ୍ତେ ୨ଟି ବାଇକ୍ ଯୋଗେ ଆଗପଛ ହୋଇ ଆସୁଥିଲେ। ଅପରାହ୍ନ ପ୍ରାୟ ସାଢ଼େ ୩ଟା ସମୟରେ ବାଲୁଗାଁ ବସ୍ଷ୍ଟାଣ୍ଡ ଏବଂ ଇଞ୍ଜନପୁର ଗ୍ରାମ ମଧ୍ୟବର୍ତ୍ତୀ ସ୍ଥଳରେ ପୂର୍ବରୁ ପିଛା କରୁଥିବା ୩ଟି ବାଇକ୍ରେ ୪ଜଣ ଦୁର୍ବୃତ୍ତ ହଠାତ୍ ନିକଟକୁ ଆସି ପ୍ରଥମେ ଭୋବନେଶ୍ୱରଙ୍କ ବାଇକ୍କୁ ଗୋଇଠା ମାରିବାରେ ବାଇକ ସହ ରାସ୍ତାପାର୍ଶ୍ୱ ଏକ ବୁଦାରେ ସେ ପଡ଼ିଯାଇଥିଲେ। ଭୟରେ ତାଙ୍କ ସହକର୍ମୀ ରହିଯାଇଥିବା ବେଳେ ଦୁର୍ବୃତ୍ତମାନେ ୨ଜଣଙ୍କୁ ଘେରିଯାଇ ବନ୍ଧୁକ ଓ ମାରଣାସ୍ତ୍ର ଦେଖାଇ ଭୟଭୀତ କରିଥିଲେ। ଏପରିକି ତାଙ୍କଠାରୁ ବାଇକ୍ ଚାବି ଛଡ଼ାଇ ନେଇ ଡିକି ଖୋଲି ଆଦାୟ କରିଥିବା ଟଙ୍କା ଭର୍ତ୍ତି ବ୍ୟାଗ ଏବଂ ୨ଜଣଙ୍କ ମୋବାଇଲ ଲୁଟି ନେଇ ଘଟଣାସ୍ଥଳରୁ ଫେରାର ହୋଇଯାଇଥିଲେ। ପରେ ବାଲୁଗାଁ ଥାନା ଏବଂ ନାଭାଲ ଫାଣ୍ଡି ପୋଲିସ୍ ଘଟଣାସ୍ଥଳରେ ପହଞ୍ଚତ୍ ତଦନ୍ତ କରିବା ସହ ଲୁଟେରାଙ୍କୁ ଠାବ କରିବା ପାଇଁ ଆଖପାଖ ବିଭିନ୍ନ ଥାନାକୁ ଘଟଣା ସମ୍ପର୍କରେ ଅବଗତ କରାଇଥିଲେ। ତେବେ ପୋଲିସ୍ ଲୁଟେରାଙ୍କ ଅନୁସନ୍ଧାନ ଜାରି ରଖିଥିବା ବେଳେ ରିପୋର୍ଟ ଲେଖାଯିବା ପର୍ଯ୍ୟନ୍ତ ଥାନାରେ କୌଣସି ଅଭିଯୋଗ ହୋଇ ନାହିଁ।
