ନୂଆଦିଲ୍ଲୀ,୨୯ା୩: ୨୦୨୧-୨୨ ଆର୍ଥିକ ବର୍ଷ ପର୍ଯ୍ୟନ୍ତ ୫ ବର୍ଷ ମଧ୍ୟରେ ରାଷ୍ଟ୍ରାୟତ୍ତ ବ୍ୟାଙ୍କଗୁଡ଼ିକ ଡୁବିଥିବା ୭.୩୪ ଲକ୍ଷ କୋଟି ଟଙ୍କା ଋଣରୁ ମାତ୍ର ୧୪ ପ୍ରତିଶତ ଆଦାୟ କରିପାରିଛନ୍ତି। ରାଜ୍ୟ ସଭାରେ ଅର୍ଥ ମନ୍ତ୍ରଣାଳୟ ଉପସ୍ଥାପନ କରିଥିବା ତଥ୍ୟରୁ ଏହା ଜଣାପଡ଼ିଛି। ୨୦୧୭-୧୮ରୁ ୨୦୨୧-୨୨ ମଧ୍ୟରେ ରାଷ୍ଟ୍ରାୟତ୍ତ ବ୍ୟାଙ୍କଗୁଡ଼ିକ ମୋଟ ୭.୩୪ ଲକ୍ଷ କୋଟି ଟଙ୍କା ଋଣକୁ ଅନାଦାୟ ଦର୍ଶାଇ ଏହାକୁ ରିଟେନ୍ ଅଫ୍ କରିଥିବାବେଳେ ସେଥିରୁ ୧.୦୩ ଲକ୍ଷ କୋଟି ଟଙ୍କା ଆଦାୟ ହୋଇଛି। ଅସୁଲି ପରେ ୫ ବର୍ଷରେ ମୋଟ ୬.୩୧ ଲକ୍ଷ କୋଟି ଟଙ୍କା ଅନାଦାୟ ରହିଛି। ରିଟେନ୍ ଅଫ୍ ଅର୍ଥ ନୁହେଁ ଯେ ଋଣଗ୍ରହୀତାମାନଙ୍କୁ ଏହା ଛାଡ଼ କରିଦିଆଯାଇଛି ବୋଲି ଅର୍ଥ ମନ୍ତ୍ରଣାଳୟ କହିଛି। ସେମାନଙ୍କଠାରୁ ଋଣ ଅସୁଲି ପ୍ରକ୍ରିୟା ଜାରି ରହିଛି। ସେମାନଙ୍କୁ ଋଣ ଅର୍ଥ ପରିଶୋଧ କରିବାକୁ ପଡ଼ିବ। ଏଥିପାଇଁ ସିଭିଲ୍ କୋର୍ଟ କିମ୍ବା ଋଣ ଆଦାୟ ଟ୍ରିବ୍ୟୁନାଲରେ ମାମଲା ଦାଏର ହେଉଛି। ପ୍ରତିଭୂତିକରଣ ଓ ବିତ୍ତୀୟ ସମ୍ପତ୍ତିର ପୁନର୍ଗଠନ ଏବଂ ପ୍ରତିଭୂତି ସ୍ବାର୍ଥ ଆଇନ ପ୍ରବର୍ତ୍ତନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଥିବା ମନ୍ତ୍ରଣାଳୟ କହିଛି। ଏହା ବ୍ୟତୀତ ଇନ୍ସଲ୍ଭେନ୍ସି ଆଣ୍ଡ ବ୍ୟାଙ୍କ୍ରପ୍ଟ କୋଡ, ୨୦୧୬ ଅନୁଯାୟୀ ନ୍ୟାଶନାଲ କମ୍ପାନୀ ଲ’ ଟ୍ରିବ୍ୟୁନାଲରେ ମାମଲା ଦାଏର କରାଯାଉଛି। ବୁଝାମଣାରେ କେତେକ ଅନାଦାୟ ଋଣ ମାମଲାର ସମାଧାନ କରାଯାଉଥିବାବେଳେ ଅଣକାର୍ଯ୍ୟକାରୀ ସମ୍ପତ୍ତି (ଏନ୍ପିଏ) ବିକ୍ରି କରାଯାଇ ଋଣ ଅର୍ଥ ଭରଣା କରାଯାଉଛି। ବାଲାନ୍ସ ଶିଟ୍କୁ କ୍ଲିନ୍ ଅପ୍ କରିବା ପାଇଁ ଆର୍ବିଆଇ ଗାଇଡ୍ଲାଇନ ଅନୁଯାୟୀ ବ୍ୟାଙ୍କଗୁଡ଼ିକ ଅନାଦାୟ ଋଣକୁ ରାଇଟ୍ ଅଫ୍ କରିଥାନ୍ତି।
