ବଅଁରପାଳ,୩୦ା୭(ଡି.ଏନ.ଏ.) ପ୍ରବାସୀ ଶ୍ରମିକମାନଙ୍କ ଘର ବାହୁଡ଼ାକୁ ଦୃଷ୍ଟିରେ ରଖି ଚଳିତବର୍ଷ ଚାଷ ଉପରେ ସରକାର ଅଧିକ ଗୁରୁତ୍ୱ ଦେଉଛନ୍ତି। କିନ୍ତୁ ଆବଶ୍ୟକ ପରିମାଣର ବର୍ଷା ଅଭାବରୁ ଅନେକ ସ୍ଥାନରେ ଚାଷ କାର୍ଯ୍ୟ ବାଧାପ୍ରାପ୍ତ ହୋଇଥିବା ବେଳେ ଅନୁଗୋଳ ଜିଲା ବଅଁରପାଳ ବ୍ଲକ ଅଞ୍ଚଳରେ ୩୩ ଉଠା ଜଳସେଚନ ପଏଣ୍ଟ ଅଚଳ ହୋଇପଡ଼ିଥିବାରୁ ୬୬୦ ହେକ୍ଟର ଜମିକୁ ପାଣି ମାଡ଼ିପାରୁ ନାହିଁ। ଫଳରେ ଏସବୁ ଜମିରେ ଚାଷ କିପରି କରାଯିବ ସେ ନେଇ ଚିନ୍ତାରେ ପଡ଼ିଛନ୍ତି ଚାଷୀ।
ଚଳିତବର୍ଷ ବଅଁରପାଳ ବ୍ଲକର ୨୪ ହଜାର ୮୧୧ ହେକ୍ଟର ଜମିରେ ଚାଷ କରିବା ପାଇଁ କୃଷି ବିଭାଗ ପକ୍ଷରୁ ଲକ୍ଷ୍ୟଧାର୍ଯ୍ୟ କରାଯାଇଛି। ସେଥିମଧ୍ୟରୁ ୧୦ ହଜାର ୮୨୫ ହେକ୍ଟରରେ ଧାନ ଓ ୧୩ ହଜାର ୯୮୬ ହେକ୍ଟରରେ ଅଣଧାନ ଫସଲ ହେବ। ମୋଟ୍ ୨୪ ହଜାର ୮୧୧ ହେକ୍ଟର ମଧ୍ୟରୁ ୯ ହଜାର ୬୧୫ ହେକ୍ଟର ଜମି ପାଇଁ ଜଳସେଚନର ବ୍ୟବସ୍ଥା ରହିଛି। ସେଥିରୁ ପ୍ରାୟ ୨ ହଜାର ହେକ୍ଟର ଉଠାଜଳସେଚନ ଉପରେ ନିର୍ଭର କରେ। ବ୍ଲକ ଅଞ୍ଚଳର ଗଡ଼ତଳମୂଳ, ମହୀଧରପୁର, ଫୁଲପଡା, ବଉଳିଗଡ଼, ରାମିମୁଣ୍ଡା, କଲଣ୍ଡାପାଳ, ଜୁହାରପୁରୁ, ପାଟଣା, କୁକୁଡ଼ାଙ୍ଗ, ଏକଘରିଆ ଆଦି ଅଞ୍ଚଳରେ ଥିବା ବଉଳି, ନନ୍ଦିରା, ଲିଙ୍ଗରା, ମାତେଳିଆ ଆଦି ବିଭିନ୍ନ ନଦୀ ନାଳ ପାର୍ଶ୍ୱରେ ୧୦୧ଟି ଉଠାଜଳସେଚନ ପଏଣ୍ଟ ରହିଛି। କିନ୍ତୁ ଦୀର୍ଘଦିନ ହେଲା ସେଥିରୁ ୩୩ଟି ପଏଣ୍ଟ ଅଚଳ ହୋଇ ପଡିଛି। କେତୋଟିରୁ ପମ୍ପସେଟ୍ ଚୋରି ହୋଇଯାଇଛି ତ ଆଉ କେଉଁଠି ବିଦ୍ୟୁତ୍ ସମସ୍ୟା ବାଧକ ସାଜିଛି। ଏହି କାରଣରୁ ବ୍ଲକର ୬୬୦ ହେକ୍ଟର ଚାଷ ଜମିକୁ ଜଳସେଚନ ହୋଇପାରୁ ନାହିଁ। କେତେକ ସଚଳ ପଏଣ୍ଟରୁ ଚାଷ ଜମିକୁ ଯାଇଥିବା ପାଇପ୍ଗୁଡିକ ଫାଟି ଯାଇଥିଲେ ମଧ୍ୟ ମରାମତି କରାଯାଉ ନାହିଁ। ଫଳରେ ପାଣି ନଷ୍ଟ ହେବା ସହ ଚାଷ ଜମିକୁ ଆବଶ୍ୟକ ପରିମାଣରେ ପାଣି ମାଡିପାରୁ ନାହିଁ।
ବହୁ ପମ୍ପ ଚୋରି ହୋଇଛି
କେନାଲ ସୁବିଧା ନ ଥିବା ଜମିକୁ ପାଣି ପଏଣ୍ଟ ଦ୍ୱାରା ଜଳସେଚନ ବ୍ୟବସ୍ଥା ରହିଛି। କିନ୍ତୁ ଅନେକ ସମୟରେ ଏଠାରେ ଲାଗିଥିବା ପମ୍ପ ଚୋରି ହୋଇଯାଉଛି। ଚଳିତବର୍ଷ ବର୍ଷା ପରିମାଣ କମ୍ ରହୁଥିବାରୁ ନୂଆ ପମ୍ପ ବ୍ୟବସ୍ଥା କରା ନ ଗଲେ ଚାଷକାର୍ଯ୍ୟ ହୋଇପାରିବ ନାହିଁ।
-ଧରଣୀ ସାହୁ, ବଉଳିଗଡ଼
ପଦକ୍ଷେପ ନିଆଯାଉ ନାହିଁ
କେଉଁ ପାଣି ପଏଣ୍ଟରୁ ମୋଟର ଚୋରି ହୋଇଯାଇଛି ତ ଆଉ କେଉଁଠି ବିଦ୍ୟୁତ୍ ସମସ୍ୟା ରହିଛି। ଅନେକ ପଏଣ୍ଟ ଚାଲୁଥିଲେ ବି ପାଇପ୍ଗୁଡ଼ିକର ମରାମତିର ଆବଶ୍ୟକତା ରହିଛି। କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରାଯାଉଥିଲେ ମଧ୍ୟ ପଦକ୍ଷେପ ନିଆଯାଉ ନାହିଁ।
-ଅଭୟ ଗଡ଼ନାୟକ, ଚାଷୀ
ସରକାରଙ୍କୁ ପ୍ରସ୍ତାବ ଦିଆଯାଇଛି
ପମ୍ପସେଟ୍ ଚୋରି ଓ ବିଦ୍ୟୁତ୍ ସମସ୍ୟା ଯୋଗୁ ୩୩ଟି ପଏଣ୍ଟ ଅଚଳ ରହିଛି। ଏଗୁଡ଼ିକ ମରାମତି ପାଇଁ ଉଚ୍ଚ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରାଯାଇଛି। ତୁରନ୍ତ ୧୧ଟି ପଏଣ୍ଟର ମରାମତି ପାଇଁ ସରକାରଙ୍କୁ ପ୍ରସ୍ତାବ ଦିଆଯାଇଛି। ଧୀରେ ଧୀରେ ସମସ୍ତ ପଏଣ୍ଟ ସଚଳ କରାଯିବ।
-ନିଉଟନ କୁମାର, କନିଷ୍ଠ ଯନ୍ତ୍ରୀ, ଉଠା ଜଳସେଚନ ବିଭାଗ
