ନୂଆଦିଲ୍ଲୀ, ୪ା୮ (ପି.ଟି.)-ଭାରତ କିପରି ଫିଫା ବିଶ୍ୱକପ୍ ପାଇଁ ଯୋଗ୍ୟତା ଅର୍ଜନ କରିବ ସେଥିଲାଗି ସରକାର ଏକ ଉଚ୍ଚାଭିଳାଷୀ ଯୋଜନା ପ୍ରସ୍ତୁତ କରିଛନ୍ତି। ସମସ୍ତ ଦେଶରୁ ଫୁଟ୍ବଲ ପ୍ରତିଭାମାନଙ୍କୁ ଚିହ୍ନଟ କରିବା ଲାଗି ୫ଟି ଜୋନାଲ ଟ୍ୟାଲେଣ୍ଟ ହଣ୍ଟ୍ କମିଟି ଗଠନ କରାଯିବ ବୋଲି କେନ୍ଦ୍ର କ୍ରୀଡ଼ା ମନ୍ତ୍ରୀ କିରେନ୍ ରିଜିଜୁ ପ୍ରକାଶ କରିଛନ୍ତି। ଏଥିଲାଗି ସର୍ବଭାରତୀୟ ଫୁଟ୍ବଲ ମହାସଂଘ (ଏଆଇଏଫ୍ଏଫ୍) ସହ ପାର୍ଟନରଶିପ୍ରେ ଖେଲୋ ଇଣ୍ଡିଆ ପ୍ରୋଗ୍ରାମ୍ ଅଧୀନରେ ସ୍ପୋଟର୍ସ ଅଥରିଟି ଅଫ୍୍ ଇଣ୍ଡିଆ (ସାଇ) ତରଫରୁ ପ୍ରଥମେ ପାଣ୍ଠି ଯୋଗାଇ ଦିଆଯିବ। ଆଗାମୀ କିଛି ମାସ ମଧ୍ୟରେ ପୂର୍ବାଞ୍ଚଳ, ଉତ୍ତରାଞ୍ଚଳ, ଦକ୍ଷିଣାଞ୍ଚଳ, ପଶ୍ଚିମାଞ୍ଚଳ ଏବଂ ଉତ୍ତରପୂର୍ବାଞ୍ଚଳ କମିଟିଗୁଡ଼ିକ ଗଠନ କରାଯିବ। ଭାରତ ଅଧିନାୟକ ସୁନୀଲ ଛେତ୍ରୀଙ୍କ ୩୬ତମ ଜନ୍ମ ଦିବସ ଅବସରରେ ଏକ ଭର୍ଚୁଆଲ କାର୍ଯ୍ୟକ୍ରମରେ ଯୋଗଦାନ ପୂର୍ବକ ରିଜିଜୁ ଏକଥା ପ୍ରକାଶ କରିଛନ୍ତି। ଫୁଟ୍ବଲ ହେଉଛି ବିଶ୍ୱର ସବୁଠାରୁ ଲୋକପ୍ରିୟ ଖେଳ। ଆଗାମୀ ୧୦ରୁ ୧୫ବର୍ଷ ମଧ୍ୟରେ ବିଶ୍ୱକପ୍ ଓ ଅଲିମ୍ପିକ୍ସ ଲାଗି ଯୋଗ୍ୟତା ଅର୍ଜନ ଆମର ମୂଳ ଲକ୍ଷ୍ୟ ରହିଛି ବୋଲି ମନ୍ତ୍ରୀ କହିଛନ୍ତି। ଆମକୁ ବର୍ତ୍ତମାନ ପ୍ରଫେଶନାଲ ଢାଞ୍ଚାରେ ୧୨ବର୍ଷରୁ କମ୍ ଫୁଟ୍ବଲ ପ୍ରତିଭାମାନଙ୍କୁ ଖୋଜି ବାହାର କରିବାକୁ ପଡ଼ିବ ବୋଲି ରିଜିଜୁ କହିଛନ୍ତି। ପଞ୍ଚାୟତ ଓ ମ୍ୟୁନିସପାଲିଟିିର ତୃଣମୂଳ ସ୍ତରରୁ ପ୍ରତିଭା ଚିହ୍ନଟ କରିବା ଲାଗି ଆବଶ୍ୟକ ସ୍ଥଳେ ଆଞ୍ଚଳିକ ଲିଗ୍ମାନ ଆୟୋଜନ କରାଯିବ। ଏଥିଲାଗି ରାଜ୍ୟସରକାର ଏବଂ ମହାସଂଘକୁ ଆର୍ଥିକ ସହାୟତା ପ୍ରଦାନ ସମ୍ପର୍କରେ ଚିନ୍ତା କରାଯାଉଛି। ଭର୍ଚୁଆଲ କାର୍ଯ୍ୟକ୍ରମରେ ଭାଗ ନେଇ ଏଆଇଏଫ୍ଏଫ୍ ସଭାପତି ପ୍ରଫୁଲ୍ଲ ପଟେଲ କହିଛନ୍ତି ଯେ, ଭାରତ ୨୦୧୭ରେ ୧୭ବର୍ଷରୁ କମ୍ ଫିଫା ବିଶ୍ୱକପ୍ ଆୟୋଜନ କରିବା ପୂର୍ବରୁ ଏକ ଟ୍ୟାଲେଣ୍ଟ ସ୍କାଉଟିଂ କାର୍ଯ୍ୟକ୍ରମ ଆରମ୍ଭ କରାଯାଇଛି। ଏହା ଏବେ ସୁଦ୍ଧା କାର୍ଯ୍ୟକାରୀ ହେଉଛି। ହେଲେ ମନ୍ତ୍ରୀଙ୍କର ଏହି ବ୍ୟାପକ ଯୋଜନା ସ୍ବାଗତଯୋଗ୍ୟ।
