ନୂଆଦିଲ୍ଲୀ: ଜିଏସ୍ଟି କ୍ଷତିପୂରଣ ନିଅଣ୍ଟ ରାଶି ଭରଣା କରିବା ଲାଗି କେନ୍ଦ୍ର ସରକାର ଓଡ଼ିଶା ସମେତ ୧୬ ରାଜ୍ୟ ଏବଂ ୨ କେନ୍ଦ୍ରଶାସିତ ଅଞ୍ଚଳକୁ ୬ ହଜାର କୋଟି ଟଙ୍କା ପ୍ରଦାନ କରିଛନ୍ତି। ଏହି ରାଶିକୁ ସରକାର ଋଣ କରି ରାଜ୍ୟଗୁଡ଼ିକୁ ହସ୍ତାନ୍ତର କରିଛନ୍ତି। ଜିଏସ୍ଟି କ୍ଷତିପୂରଣ ରାଶିର ପ୍ରଥମ କିସ୍ତି ଭାବେ ଏହି ରାଶି ଓଡ଼ିଶା, ମହାରାଷ୍ଟ୍ର, ଗୁଜରାଟ, ବିହାର, ଆସାମ, ଦିଲ୍ଲୀ, ଜମ୍ମୁ-କଶ୍ମୀର ଭଳି ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳ ଲାଭ କରିଥିବା ଜଣାପଡ଼ିଛି। କ୍ଷତିପୂରଣ ରାଶି କେନ୍ଦ୍ର ଋଣ କରି ରାଜ୍ୟକୁ ପ୍ରଦାନ କରୁ ବୋଲି କିଛି ରାଜ୍ୟ ଦାବି କରିଥିଲେ। ଏହାପରେ କେନ୍ଦ୍ର ଏଭଳି ପଦକ୍ଷେପ ଗ୍ରହଣ କରିଛି। ୧.୧ ଲକ୍ଷ କୋଟି ଟଙ୍କା ଋଣ କରାଯାଇ ରାଜ୍ୟଗୁଡିକୁ ପ୍ରଦାନ କରାଯିବ ବୋଲି ଅର୍ଥମନ୍ତ୍ରୀ ନିର୍ମଳା ସୀତାରାମନ କହିଥିଲେ। କେନ୍ଦ୍ର ସରକାର ଏଥିଲାଗି ସ୍ବତନ୍ତ୍ର ଓ୍ବିଣ୍ଡୋ ବ୍ୟବସ୍ଥା ଗ୍ରହଣ କରିଛନ୍ତି। ସେହିଭଳି ୨୧ ରାଜ୍ୟ, ୨ କେନ୍ଦ୍ର ଶାସିତ ଅଞ୍ଚଳ ସ୍ବତନ୍ତ୍ର ଓ୍ବିଣ୍ଡୋ ସହ ନିଜସ୍ବ ଋଣ ଉଠାଣ ବ୍ୟବସ୍ଥା ସପକ୍ଷରେ ଯାଇଛନ୍ତି। ୫ ରାଜ୍ୟରେ ଜିଏସ୍ଟି କ୍ଷତିପୂରଣ ସମସ୍ୟା ନାହିଁ ବୋଲି ଜଣାପଡ଼ିଛି।
ଅନ୍ୟ ରାଜ୍ୟ ମଧ୍ୟରେ ଉତ୍ତରାଖଣ୍ଡ, ଉତ୍ତର ପ୍ରଦେଶ, ତ୍ରିପୁରା,ତାମିଲନାଡୁ, ମେଘାଳୟ, ମଧ୍ୟପ୍ରଦେଶ, କର୍ନାଟକ, ମହାରାଷ୍ଟ୍ର, ହିମାଚଳ ପ୍ରଦେଶ, ହରିୟାଣା, ଗୋଆ, ଆନ୍ଧ୍ରପ୍ରଦେଶ ପ୍ରମୁଖ ରହିଛନ୍ତି। ୩ରୁ ୫ ବର୍ଷ ଅବଧି ଲାଗି ୫.୧୯% ହାରରେ କେନ୍ଦ୍ର ଋଣ କରିବା ସହ ପ୍ରତି ସପ୍ତାହରେ ୬ ହଜାର କୋଟି ଟଙ୍କା ରାଜ୍ୟଗୁଡିକୁ ଦେବାକୁ କେନ୍ଦ୍ରର ଯୋଜନା ରହିଛି। ଏହା ବିତ୍ତୀୟ ନିଅଣ୍ଟ ଉପରେ କୌଣସି ପ୍ରଭାବ ପକାଇବ ନାହିଁ ବୋଲି କୁହାଯାଇଛି। ପ୍ରଦାନ କରାଯାଇଥିବା ଅର୍ଥ ରାଶିକୁ ରାଜ୍ୟଗୁଡିକର ପୁଞ୍ଜି ଲାଭ ହିସାବରେ ଦର୍ଶାଯିବ। ଅଗଷ୍ଟ ମାସରେ କେନ୍ଦ୍ର ସରକାର ରାଜ୍ୟଗୁଡ଼ିକୁ ୨ଟି ବିକଳ୍ପ ପ୍ରଦାନ କରିଥିଲେ। ରିଜର୍ଭ ବ୍ୟାଙ୍କର ସ୍ପେଶାଲ ଓ୍ବିଣ୍ଡୋରୁ ୯୭ ହଜାର କୋଟି କିମ୍ବା ୨.୩୫ ଲକ୍ଷ କୋଟି ଟଙ୍କାର ବଜାର ଋଣ ଏହା ମଧ୍ୟରେ ସାମିଲ ରହିଥିଲା। ଏହି ବିକଳ୍ପଗୁଡିକୁ ୧.୧୦ ଲକ୍ଷ କୋଟି ଏବଂ ୧.୮ ଲକ୍ଷ କୋଟି ଟଙ୍କାକୁ ପରିବର୍ତ୍ତନ କରାଯାଇଛି।
