ନୂଆଦିଲ୍ଲୀ: ଡାଟା ସୁରକ୍ଷା ନେଇ ପାର୍ଲାମେଣ୍ଟ କମିଟି ଫେସ୍ବୁକ ଏବଂ ଟୁଇଟର ଭଳି ପ୍ରମୁଖ ଟେକ୍ନୋଲୋଜି କମ୍ପାନୀଙ୍କୁ ସମନ ଜାରି କରିଛି। ଶୁକ୍ରବାର ଫେସ୍ବୁକର ଭାରତ ତଥା କେନ୍ଦ୍ର ଏବଂ ଦକ୍ଷିଣ ଏସିଆ ଲାଗି ପବ୍ଲିକ ପଲିସି ମୁଖ୍ୟ ଭାବେ କାର୍ଯ୍ୟରତ ଆଂକ୍ଷୀ ଦାସ ପାର୍ଲମେଣ୍ଟ କମିଟି ଆଗରେ ହାଜର ହୋଇଛନ୍ତି। କମିଟି ସଦସ୍ୟମାନେ ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଫେସବୁକ ପ୍ରତିନିଧିଙ୍କୁ ପ୍ରଶ୍ନ କରିଥିବା ଜଣାପଡିଛି। ଅକ୍ଟୋବର ୨୮ରେ ଟୁଇଟର ଏବଂ ୨୯ରେ ପେଟିଏମ୍ ଏବଂ ଗୁଗଲ ଅଧିକାରୀଙ୍କୁ ହାଜର ହେବା ଲାଗି କୁହାଯାଇଛି। ଏହି କମିଟି ସାମ୍ନାରେ ହାଜର ହେବା ଲାଗି ଆମାଜନ ଅଗ୍ରାହ୍ୟ କରୁଥିବା ସୂଚନା ରହିଛି। ଭାଜପା ଏମ୍ପି ମୀନାକ୍ଷୀ ଲେଖୀଙ୍କ ଅଧ୍ୟକ୍ଷତାରେ ଗଠିତ ବ୍ୟକ୍ତିଗତ ଡାଟା ସୁରକ୍ଷା ଆଇନ-୨୦୧୯ ସମ୍ପର୍କିତ ପାର୍ଲାମେଣ୍ଟର ଯୁଗ୍ମ କମିଟି ସାମ୍ନାରେ ପ୍ରମୁଖ ଟେକ୍ନୋଲୋଜି କମ୍ପାନୀର ଅଧିକାରୀ ହାଜର ହେବାକୁ ଗୁରୁବାର ନିର୍ଦ୍ଦେଶ ଦିଆଯାଇଥିଲା। ଡାଟା ସୁରକ୍ଷା ଏବଂ ପ୍ରିଭେସି ପ୍ରସଙ୍ଗରେ କମିଟି ଏଭଳି ସମନ ଜାରି କରିଛି।
