ଯୋଧପୁର,୯ ।୧୨: ରାଜସ୍ଥାନ ଯୋଧପୁରର ଶେରଗଡରେ ଏକ ବିବାହ ଉତ୍ସବରେ ବଡ ଦୁର୍ଘଟଣା ଘଟିଛି । ଏଠାରେ ଗ୍ୟାସସିଲିଣ୍ଡର ଫାଟି ଯିବାରୁ ଅତିକମରେ ୬୦ ଜଣ ପୋଡି ହୋଇଯାଇଛନ୍ତି । ଗ୍ରାମବାଦୀଙ୍କ ଉପସ୍ଥିତ ବୁଦ୍ଧି ଯୋଗୁ ନିଆଁକୁ ନିୟନ୍ତ୍ରଣ କରାଯାଇଛି । ଏହି ଘଟଣାରେ ବରଙ୍କ ମାତା, ପିତା ଓ ଭଉଣୀ ବି ପୋଡି ହୋଇଯାଇଛନ୍ତି । ଏମାନଙ୍କ ମଧ୍ୟରୁ ଭଉଣୀ ଗୁରୁତର ଥିବା ବେଳେ ସମସ୍ତ ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ଏହି ଘଟଣାରେ ୨ ଶିଶୁଙ୍କ ମୃତ୍ୟୁ ହୋଇଥିବା କୁହାଯାଉଛି ।
ଯୋଧପୁର ଜିଲାପାଳ ହିମାଂଶୁ ଗୁ୍ପ୍ତାଙ୍କ ସୂଚନା ଅନୁଯାୟୀ, ଶେରଗଡ଼ର ଭୁଙ୍ଗରା ଗାଁରେ ତଗତ ସିଂହଙ୍କ ପୁଅ ବାହାଘର ପାଇଁ ବରଯାତ୍ରୀ ପ୍ରସ୍ତୁତ ହେଉଥିଲେ । ଏହି ସମୟରେ ଏକ ଗ୍ୟାସ ସିଲିଣ୍ଡର ଫାଟି ଯିବାରୁ ୬୦ ଜଣ ଅତିଥି ପୁରୁଷ, ମହିଳା ଓ ଶିଶୁ ପୋଡି ହୋଇ ଯାଇଥିଲେ । ଗୁରୁତର ଥିବା ୪୨ ଜଣଙ୍କୁ ଯୋଧପୁରର ମହାତ୍ମା ଗାନ୍ଧୀ ହସ୍ପିଟାଲରେ ଭର୍ତ୍ତି କରାଯାଇଛି । ଜିଲାପାଳ କହିଛନ୍ତି ଏହି ଘଟଣା ଅତ୍ୟନ୍ତ ଦୁଃଖଦାୟକ । ଏଥିରେ ୮ରୁ ୧୦ ଜଣ ମହିଳା ପୁରୁଷ ଓ ଶିଶୁ ୯୦ ପ୍ରତିଶତ ପୋଡି ଯାଇଛନ୍ତି । ସେମିତି ୩୦ ଜଣ ୫୦ରୁ ୭୦ ପ୍ରତିଶତ ପୋଡି ଯାଇଛନ୍ତି । ୧୮ ଜଣଙ୍କୁ ଶେରଗଡ ତହସିଲର ହସ୍ପିଟାଲରେ ପ୍ରାଥମିକ ଉପଚାର କରାଯାଇଛି ।
