ଗୋପାଳପୁର,୨୦ା୧୨(ଡି.ଏନ.ଏ.): ପର୍ଯ୍ୟଟନ ମାନଚିତ୍ରରେ ଗୋପାଳପୁରର ସ୍ଥାନ ସ୍ବତନ୍ତ୍ର। ଏଠାକୁ ବିଭିନ୍ନ ସମୟରେ ବହୁ ପର୍ଯ୍ୟଟକ ଆସିଥାନ୍ତି। ପର୍ଯ୍ୟଟକଙ୍କ ସୁବିଧା ପାଇଁ ଏଠାରେ ଏକ ଅତ୍ୟାଧୁନିକ ବସ୍ଷ୍ଟାଣ୍ଡ ଲାଗି ୨୦୧୪ରେ ଭିତ୍ତିପ୍ରସ୍ତର ସ୍ଥାପନ ହୋଇଥିଲା। ବ୍ରହ୍ମପୁର ଉନ୍ନୟନ ପରିଷଦ (ବିଡିଏ) ପକ୍ଷରୁ ଏହି ବସଷ୍ଟାଣ୍ଡଟି ପ୍ରାୟ ୬ କୋଟି ଟଙ୍କା ବ୍ୟୟରେ ନିର୍ମାଣ ହୋଇଥିଲା। ୨୦୧୬ରେ ବିଜୁ ପଟ୍ଟନାୟକଙ୍କ ଜୟନ୍ତୀ ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଅତ୍ୟାଧୁନିକ ବସଷ୍ଟାଣ୍ଡ ଉଦଘାଟନ କରିଥିଲେ। ତେବେ ଉଦ୍ଘାଟନ ପରଠାରୁ ଅର୍ଥାତ୍ ଦୀର୍ଘ ୬ବର୍ଷ ପରେ ବି ବସଷ୍ଟାଣ୍ଡ କାର୍ଯ୍ୟକ୍ଷମ ହୋଇପାରିଲା ନାହିଁ। ଯାହାଫଳରେ ଏଠାରେ ଯାତ୍ରୀଙ୍କ ସୁବିଧା ପାଇଁ ହୋଇଥିବା ବିଶ୍ରାମଗ୍ରାର, ପାନୀୟ ଜଳ, ହାଇମାଷ୍ଟ, ଶୌଚାଳୟ, ଟିକେଟ କାଉଣ୍ଟର ସମେତ ପୁରା ବସଷ୍ଟାଣ୍ଡ ଖତ ଖାଉଛି। ବସ୍ଷ୍ଟାଣ୍ଡରେ ଲାଗିଥିବା ଫ୍ୟାନ ଓ ଅନ୍ୟାନ୍ୟ ଲୁହା ସାମଗ୍ରୀ କଳଙ୍କି ଧରିଲାଣି। କେବଳ ସେତିକି ନୁହେଁ, ଏହାର ପରିସର ଅସାମାଜିକ, ମଦ୍ୟପଙ୍କ ଆଡ୍ଡାସ୍ଥଳୀ ପାଲଟିଯାଇଛି। ଉଦଘାଟନ ବେଳେ ବସଷ୍ଟାଣ୍ଡ ପରିସର ଏତେ ସୁନ୍ଦର ପରିବେଶ ଥିଲା ଯେ ପର୍ଯ୍ୟଟକମାନେ ସେଠାରେ କିଛି ସମୟ ପାଇଁ ବିଶ୍ରାମ ନେଉଥିଲେ। ବର୍ତ୍ତମାନ ଏହା ଅସାମାଜିକ ଆଡ଼ାସ୍ଥଳୀ ପାଲଟିଛି। ବସଷ୍ଟାଣ୍ଡ ପରିସର ମଦ ବୋତଲ, ଭଙ୍ଗା କାଚ, ଗୁଟୁଖା ଓ ଜରିରେ ଭର୍ତ୍ତି ହୋଇଛି। ଆସନ୍ତା ୨୪ରୁ ଗୋପାଳପୁର ବେଳାଭୂମି ମହୋତ୍ସବ ଆରମ୍ଭ ହେବ। ଏଥିଲାଗି ଜିଲା, ରାଜ୍ୟ ଓ ରାଜ୍ୟ ବାହାରୁ ବହୁ ପର୍ଯ୍ୟଟକ ଆସିବା ସମ୍ଭାବନା ରହିଛି। ଏଭଳି ସ୍ଥିତିରେ ନୂଆ ବସଷ୍ଟାଣ୍ଡର ସ୍ଥିତିକୁ ନେଇ ବୁଦ୍ଧିଜୀବୀ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଛି। କେବେ ଏହି ବସଷ୍ଟାଣ୍ଡ କାର୍ଯ୍ୟକ୍ଷମ ହେବ,
କେବେ ବସ ଗଡିବ, ସେହି ଦିନକୁ ଲୋକେ ଅପେକ୍ଷା କରିଛନ୍ତି।
