ନୂଆପଡ଼ା,୩୦।୬(ମକାରୁ ବେମାଲ): ଚାଳ ଛପର ଘରେ ନ ରହି ଛାତ ଘରେ ସମସ୍ତେ ରହିବା ପାଇଁ କେନ୍ଦ୍ର ତଥା ରାଜ୍ୟ ସରକାରଙ୍କ ପକ୍ଷରୁ ଗରିବ ହିତାଧିକାରୀଙ୍କୁ ପକ୍କା ଘର ଯୋଗାଇ ଦେଉଛନ୍ତି। ହେଲେ ୧ ଲକ୍ଷ ୩୦ ହଜାର ଟଙ୍କାରେ ଗରିବ ହିତାଧିକାରୀ ଘର ବନାଇବା କଷ୍ଟକର ହେଉଥିବାରୁ ସ୍ଥାନୀୟ ଠିକାଦାରମାନଙ୍କୁ ଘର ନିର୍ମାଣ କରିବା ପାଇଁ ହିତାଧିକାରୀମାନେ ଦେଉଛନ୍ତି। ଘର ନିର୍ମାଣ ନାମରେ ଠିକାଦାରମାନେ ଗରିବ ଲୋକଙ୍କୁ ଶୋଷଣ କରୁଛନ୍ତି। ହିତାଧିକାରୀଙ୍କ ବ୍ୟାଙ୍କ ଆକାଉଣ୍ଟରେ କିସ୍ତି ଟଙ୍କା ଜମା ହେଲେ ଠିକାଦାରମାନେ ସାଙ୍ଗେ ସାଙ୍ଗେ ହିତାଧିକାରୀଙ୍କୁ ବ୍ୟାଙ୍କକୁ ନେଇ ଟଙ୍କା ଉଠାଣ କରି ନେଇ ଯାଉଛନ୍ତି। କିନ୍ତୁ ହିତାଧିକାରୀମାନଙ୍କୁ ଭୁଆଁ ବୁଲାଇ ଘର ନିର୍ମାଣ କରିବାରେ ବିଳମ୍ବ କରି ବର୍ଷ ବର୍ଷ ଠକି ଚାଲିଛନ୍ତି। ଏପରି ଘଟଣାର ଅଭିଯୋଗ ଆସିଛି ନୂଆପଡା ଜିଲା କୋମନା ବ୍ଲକ ଅନ୍ତର୍ଗତ ଜଟଗଡ ପଞ୍ଚାୟତ ବାଲିପାଟି ଗାଁରେ। ଠିକାଦାରମାନେ ଘର ନିର୍ମାଣ ନ କରି ହିତାଧିକାରୀଙ୍କୁ ଠକିବାରେ ଲାଗିଛନ୍ତି।
ପ୍ରାପ୍ତ ସୂଚନା ଅନୁସାରେ ଜଟଗଡ ପଞ୍ଚାୟତ ବାଲିପାଟି ଗାଁର କୁମୁରା ମାଝି ଓ ରାମଚନ୍ଦ୍ର ମାଝି ୨୦୧୭-୧୮ରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ନିର୍ମାଣ ପାଇଁ କାର୍ଯ୍ୟାଦେଶ ପାଇଥିଲେ। ସେମାନେ ଅତ୍ୟନ୍ତ ଗରିବ ହୋଇଥିବାରୁ ତାଙ୍କ ପକ୍ଷରେ ଘର ନିର୍ମାଣ କରିବା ସମ୍ଭବ ନ ହେବାରୁ ସ୍ଥାନୀୟ ଠିକାଦାରମାନଙ୍କୁ ନିର୍ମାଣ ପାଇଁ ଦେଇଥିଲେ। ଠିକାଦାରମାନେ ଘର କାର୍ଯ୍ୟ ଆରମ୍ଭ କରି ୬ ଫୁଟ ପର୍ଯ୍ୟନ୍ତ କାନ୍ଥ ଉଠାଇ କାର୍ଯ୍ୟ ବନ୍ଦ କରି ଦେଇଛନ୍ତି। ଆଜକୁ ପ୍ରାୟ ୬ ବର୍ଷ ବିତି ଯାଇଥିଲେ ମଧ୍ୟ ଘର ସମ୍ପୂର୍ଣ୍ଣ ହୋଇନାହିଁ। ଲକ୍ଷେ ଟଙ୍କା ପର୍ଯ୍ୟନ୍ତ ଘର ବିଲ ହୋଇ ହିତାଧିକାରୀଙ୍କଠାରୁ ଠିକାଦାର ନେଇ ସାରିଲେଣି। ଛାତ ଘରେ ରହିବା ପାଇଁ ଗରିବ ହିତାଧିକାରୀମାନେ ଚାହିଁ ବସିଛନ୍ତି। ହେଲେ ଛାତ ଘର ମିଳୁନାହିଁ। ଏ ସଂକ୍ରାନ୍ତରେ ଜଟଗଡ ପଞ୍ଚାୟତ ନିର୍ବାହୀ ଅଧିକାରୀ କାର୍ତ୍ତିକ ରଥଙ୍କୁ ପଚାରିବାରୁ ମୁଁ ଏହି ବିଷୟ ଉପରେ ଅବଗତ ନ ଥିଲି। ନିଜେ ଯାଇ କ’ଣ ହୋଇଛି ଦେଖିବି ଓ ଘର ସମ୍ପୂର୍ଣ୍ଣ କରିବା ପାଇଁ ଚେଷ୍ଟା କରିବି। ଅସାଧୁ ଉପଉୟ ଅବଲମ୍ବନ କରୁଥିବା ଠିକାଦାର ପ୍ରତି ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରକାଶ କରିଥିଲେ।
