ରାଇଘର/ଉମରକୋଟ, ୧୨।୧୦(ଡି.ଏନ୍.ଏ./ସ୍ବ.ପ୍ର.): ନବରାତ୍ରି ସମୟରେ ପରିବାର ସହ ଛତିଶଗଡ଼ ସିହାଓ୍ବାସ୍ଥିତ ଶୀତଳା ମନ୍ଦିରକୁ ସପରିବାର ଦର୍ଶନ ପାଇଁ ଯାଉଥିଲେ। ବାଟରେ ୬ବର୍ଷୀୟ ଅବିନାଶଙ୍କୁ ପରିବାର ଲୋକଙ୍କ ଆଖି ଆଗରେ ଟେକି ନେଇଥିଲା କଳରାପତରିଆ ବାଘ। ଏନେଇ ନବରଙ୍ଗପୁର ଜିଲା ରାଇଘର ବ୍ଲକ ଛତିଶଗଡ଼ ସୀମାନ୍ତ ତୁରୁଡିହି ଗ୍ରାମର ନରେନ୍ଦ୍ର ମାର୍କମ(ଅଭିନାଶଙ୍କ ବାପା) ଅଭିଯୋଗ କରିଛନ୍ତି। ଖବରପାଇ ପୋଲିସ, ବନ ବିଭାଗ ଅବିନାଶଙ୍କୁ ଖୋଜାଖୋଜି କରିଥିଲା। ବନ ବିଭାଗ ଅବିନାଶଙ୍କ ମୃତଦେହ ଜବତ କରି ପରିବାର ଲୋକଙ୍କୁ ହସ୍ତାନ୍ତର କରିଛି।
ସୂଚନାନୁଯାୟୀ, ସୋମବାର ନରେନ୍ଦ୍ର ସପରିବାର ସିହାଓ୍ବାସ୍ଥିତ ଶୀତଳାଙ୍କ ମନ୍ଦିରକୁ ଯାଉଥିଲେ। ଅବିନାଶ ଅନ୍ୟ ଜଣେ ବାଳକ ସହ ଆଗରେ ଚାଲିଥିଲେ। ହଠାତ୍ ଏକ କଳରାପତରିଆ ସେମାନଙ୍କ ଆଗକୁ ଆସିଥିଲା। ସମସ୍ତେ ଏପଟ ସେପଟ ହୋଇ ଦୌଡୁଥିବାବେଳେ ଅବିନାଶଙ୍କୁ ବାଘ ଝାମ୍ପିନେଇ ଜଙ୍ଗଲ ଭିତରକୁ ପଳାଇଥିଲା। ଏହା ଦେଖି ଅନ୍ୟମାନେ ପାଟି କରିବା ସହ ସ୍ଥାନୀୟ ବନ ବିଭାଗକୁ ଖବର ଦେଇଥିଲେ। ବନ ବିଭାଗ ଓ ସିହାଓ୍ବା ପୋଲିସ ଘଟଣାସ୍ଥଳରେ ପହଞ୍ଚତ୍ ସ୍ଥାନୀୟ ଲୋକଙ୍କୁ ନେଇ ଜଙ୍ଗଲ ମଧ୍ୟକୁ ଯାଇଥିଲେ। ରକ୍ତ ଚିହ୍ନ ଦେଖି କିଛି ବାଟ ଯିବା ପରେ ଏକ ପଥର ଚଟାଣରୁ ଅବିନାଶଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ସିହାଞ୍ବା ଡାକ୍ତରଖାନାରେ ଭର୍ତ୍ତି କରିଥିଲେ। ଡାକ୍ତର ସେଠାରେ ଅବିନାଶଙ୍କୁ ମୃତ ଘୋଷଣା କରିଥିଲେ। ବନ ବିଭାଗ ମୃତକଙ୍କ ପରିବାରକୁ ୩୫ ହଜାର ଟଙ୍କା କ୍ଷତିପୂରଣ ଦେଇଛି। ଉକ୍ତ ଅଞ୍ଚଳରେ ପୂର୍ବରୁ ଥରେ ଏପରି ଘଟଣା ଘଟିଛି। ତେଣୁ ଏଠାରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରିବାକୁ ଲୋକେ ଦାବି କରିଛନ୍ତି।
