ବାଲେଶ୍ୱର ଅଫିସ/ଜଳେଶ୍ୱର, ୮।୮(ସ୍ବ.ପ୍ର.)-ବାଲେଶ୍ୱର ଜିଲାର ବିଭିନ୍ନ ବ୍ଲକରୁ କରୋନା ଆକ୍ରାନ୍ତରୁ ସୁସ୍ଥ ହୋଇଥିବା ୬ଜଣ ବ୍ୟକ୍ତି ପ୍ଲାଜମା ଦାନ ପାଇଁ ଶୁକ୍ରବାର କଟକରେ ପାନ୍ଥନିବାସରେ ପହଞ୍ଚତ୍ଛନ୍ତି। ସେଠାରେ ତାଙ୍କୁ ପର୍ଯ୍ୟଟନ ଓ ସାଂସ୍କୃତିକ ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ ସେମାନଙ୍କୁ ସ୍ବାଗତ କରିବା ସହ ସମ୍ବର୍ଦ୍ଧନା ଜଣାଇ ଉକ୍ତ ୬ଜଣଙ୍କୁ ଆଣ୍ଟିବଡ଼ି ଟେଷ୍ଟ ପାଇଁ କଟକ ଏସ୍ସିବି ମେଡ଼ିକାଲକୁ ପଠାଇଛନ୍ତି। ଶନିବାର ସେମାନଙ୍କଠାରୁ ପ୍ଲାଜମା ସଂଗ୍ରହ କରାଯିବ ବୋଲି ମନ୍ତ୍ରୀ ସୂଚନା ଦେଇଛନ୍ତି।
କରୋନା ମହାମାରୀ ସମଗ୍ର ବିଶ୍ୱକୁ କବଳିତ କରିଥିବା ବେଳେ ଏହାର ନିରାକରଣ ଲାଗି କୌଣସି ଔଷଧ ବା ଭ୍ୟାକ୍ସିନ ବାହାରିନାହଁି। ଏହାର ଚିକିତ୍ସା କେବଳ ପ୍ଲାଜମା ଥେରାପି ମାଧ୍ୟମରେ ସଫଳ ହେଉଛି ା ଫଳରେ ପ୍ଲାଜମା ଦାନ ପାଇଁ ମୁଖ୍ୟମନ୍ତ୍ରୀ ରାଜ୍ୟବାସୀଙ୍କୁ ନିବେଦନ କରିଥିଲେ। ପରେ ବାଲେଶ୍ୱର ଜିଲା ଦାୟିତ୍ୱରେ ଥିବା ମନ୍ତ୍ରୀ ପାଣିଗ୍ରାହୀଙ୍କ ଅନୁରୋଧକ୍ରମେ ଶୁକ୍ରବାର ଜିଲାର ନୀଳଗିର, ବାଲିଆପାଳ, ଭୋଗରାଇ ବ୍ଲକରୁ ଜଣେ ଲେଖାଏଁ ଏବଂ ଜଳେଶ୍ୱର ବ୍ଲକରୁ ୩ଜଣ ପ୍ଲାଜମା ଦାନ ପାଇଁ ବାଲେଶ୍ୱର ସର୍କିଟ ହାଉସ୍ରେ ଏକତ୍ରିତ ହୋଇ କଟକ ଅଭିମୁଖେ ଯାତ୍ରା କରିଥିଲେ।
