ନୂଆଦିଲ୍ଲୀ,୧୨।୭ (ଅଭୟ ଦାଶ): କ୍ରମାଗତ ଭାବେ ଦେଶର ଟିକସ ସଂଗ୍ରହ ବୃଦ୍ଧି ପାଉଛି। ବିଶେଷ କରି ଚଳିତ ଆର୍ଥିକ ବର୍ଷରେ ଟିକସରୁ ସରକାରଙ୍କ ଆୟ କ୍ରମାଗତ ଭାବେ ବୃଦ୍ଧି ପାଇଛି। ଶୁକ୍ରବାର ସେଣ୍ଟ୍ରାଲ ବୋର୍ଡ ଅଫ୍ ଡାଇରେକ୍ଟ ଟ୍ୟାକ୍ସେସ୍ (ସିବିଡିଟି) ପକ୍ଷରୁ ଜାରି ହୋଇଥିବା ତଥ୍ୟ ଅନୁସାରେ ଚଳିତ ଆର୍ଥିକ ବର୍ଷର ଅଗଷ୍ଟ ୧୦ ପର୍ଯ୍ୟନ୍ତ ସରକାର ପ୍ରତ୍ୟକ୍ଷ ଟିକସରୁ ମୋଟ ୬.୫୩ ଲକ୍ଷ କୋଟି ଟଙ୍କା ସଂଗ୍ରହ କରିଛନ୍ତି। ଏପରିକି ଗତ ଆର୍ଥିକ ବର୍ଷର ସମାନ ଅବଧିରେ ଆଦାୟ ହୋଇଥିବା ପ୍ରତ୍ୟକ୍ଷ ଟିକସ ରାଶିର ମୂଲ୍ୟ ଠାରୁ ପ୍ରାୟ ୧୬ (୧୫.୭)% ଅଧିକ ବୋଲି କୁହାଯାଇଛି। କେବଳ ଡାଇରେକ୍ଟ ଟ୍ୟାକ୍ସ କ୍ଷେତ୍ରରେ ଚଳିତ ଆର୍ଥିକ ବର୍ଷରେ ସରକାର ଗତ ବର୍ଷ ତୁଳନାରେ ପ୍ରାୟ ୧୬ (୧୫.୭) % ଅଧିକ ଟିକସ ଆଦାୟ କରିଛନ୍ତି। ଉଲ୍ଲେଖଯୋଗ୍ୟ, ୨୦୨୩ ଅଗଷ୍ଟ ୧୦ ମଧ୍ୟରେ ଉକ୍ତ ପରିମାଣରର ଟିକସ ଆଦାୟ ହୋଇଛି। ଅପରପକ୍ଷରେ କରଦାତାଙ୍କ ଫେରସ୍ତ (ରିଫଣ୍ଡ)କୁ ଯଦି ବାଦ୍ ଦିଆଯାଏ ତେବେ ୨୦୨୩ ଅଗଷ୍ଟ ୧୦ ସୁଦ୍ଧା ମୋଟ ୫.୮୪ ଲକ୍ଷ କୋଟି ଟଙ୍କାର ଟିକସ ସରକାର ଆଦାୟ କରିଛନ୍ତି। ସିବିଟିଡିର ସୂଚନା ଅନୁଯାୟୀ, ଚଳିତ ଆର୍ଥିକ ବର୍ଷର ଅଗଷ୍ଟ ୧୦ ପର୍ଯ୍ୟନ୍ତ ପ୍ରତ୍ୟକ୍ଷ ଟିକସରୁ ନେଟ୍ ବେସିସରେ ଆଦାୟ ହୋଇଥିବା କର ପୂର୍ବ ବର୍ଷ ତୁଳନାରେ ୧୭ (୧୭.୩୩)%ରୁ ଅଧିକ ରହିଛି। ଏହି ସଂଖ୍ୟା ପୂରା ଆର୍ଥିକ ବର୍ଷ ପାଇଁ ବଜେଟ୍ ଆକଳନର ୩୨.୦୩% ସହ ସମାନ ବୋଲି କୁହାଯାଉଛି, ଅର୍ଥାତ ୨୦୨୩-୨୪ର ସମ୍ପୂର୍ଣ୍ଣ ଆର୍ଥିକ ବର୍ଷରେ ଯେତିକି ଆୟ ହେବ ବୋଲି ସରକାର ଆନୁମାନ କରିଥିଲେ ତା’ର ୩୨% ରୁ ଅଧିକ ୨୦୨୩ ଅଗଷ୍ଟ ୧୦ ମଧ୍ୟରେ ଆଦାୟ ହୋଇସାରିଛି। ସେହିପରି ପୂର୍ବ ଆର୍ଥିକ ବର୍ଷର ସମାନ ଅବଧୀ ମଧ୍ୟରେ ଫେରସ୍ତ ହୋଇଥିବା ରିଫଣ୍ଡ ଠାରୁ ଚଳିତ ବର୍ଷର ସମାନ ସମୟରେ ଅଧିକ ରିଫଣ୍ଡ ଜାରି ହୋଇଛି। ସେହିପରି ସରକାରଙ୍କ ସୂଚନା ଅନୁସାରେ ଚଳିତ ଆର୍ଥିକ ବର୍ଷରେ ଟିକସଦାତାଙ୍କୁପୂର୍ବ ବର୍ଷ ଅପେକ୍ଷା ଅଧିକ ଫେରସ୍ତ ଦିଆଯାଇଛି। ଏପରିକି ୨୦୨୩ ଏପ୍ରିଲରୁ ଅଗଷ୍ଟ ୧୦ ମଧ୍ୟରେ ସରକାର ଟିକସଦାତାଙ୍କୁ ମୋଟ ୦.୬୯ ଲକ୍ଷ କୋଟି ଟଙ୍କା ଫେରସ୍ତ କରିଛନ୍ତି। ଗତ ଆର୍ଥିକ ବର୍ଷର ସମାନ ଅବଧିରେ ଦିଆଯାଇଥିବା ଫେରସ୍ତଠାରୁ ଏହା ୩.୭୩% ଅଧିକ ବୋଲି କୁହାଯାଉଛି।
