ଗୁଡାରି , ୧।୫ (ପ୍ରମୋଦ କୁମାର ପତି ): ରାୟଗଡ଼ା ଜିଲା ଗୁଡାରି ତହସିଲଦାର ଏ. ସ୍ନେହଲତାଙ୍କ ନେତୃତ୍ୱରେ କାର୍ଯ୍ୟାଳୟର ଏକ ଟିମ୍ ବ୍ଲକର ଦୁର୍ଗମ ଅଞ୍ଚଳ ରେଙ୍ଗାପଦର ଗ୍ରାମରେ ଗୁରୁବାର କ୍ୟାମ୍ପ କରିଥିଲେ। ପୂର୍ବରୁ ଅତିରିକ୍ତ ତହସିଲଦାରଙ୍କ ଉପସ୍ଥିତିରେ ମଧୁବନ ଲାଖବେଟା, କେପିଟି, କରଲାଗୁଡ଼ି ଏବଂ ରେଙ୍ଗାପଦର ଗ୍ରାମର ବାସିନ୍ଦାଙ୍କୁ ଆଧାର କାର୍ଡ ପ୍ରଦାନ ନିମନ୍ତେ ବାସିନ୍ଦା ପ୍ରମାଣପତ୍ର ପାଇଁ ନିଜେ ଆବେଦନ କରିଥିଲେ। ଗୁରୁବାର ଏହି ୪ ଗ୍ରାମର ୫୯ ଜଣଙ୍କୁ ତହସିଲଦାରଙ୍କ ଉପସ୍ଥିତିରେ ବାସିନ୍ଦା ପ୍ରମାଣପତ୍ର ପ୍ରଦାନ କରାଯିବା ସହ ଜନ୍ମ ପ୍ରମାଣ ପତ୍ର ପାଇଁ ଆବେଦନ କରାଯାଇଥିବା ସୂଚନା ମିଳିଛି।
କିଛିଦିନ ପୂର୍ବେ ଜିଲାପାଳ ଓ ଉପଜିଲାପାଳ ଉପରୋକ୍ତ ଗ୍ରାମ ପରିଦର୍ଶନକରି ଲୋକଙ୍କ ସମସ୍ୟା ବୁଝିଥିଲେ। ବିଡିଓ ଶୁଚିସ୍ମିତା ବେହେରା ଓ ତହସିଲଦାର ମିଳିତ ଭାବେ ଏହି ଗ୍ରାମରେ ସରକାରଙ୍କ ସମସ୍ତ ଯୋଜନା ପହଞ୍ଚାଇବା ନିମନ୍ତେ ଉଦ୍ୟମ ଜାରି ରଖିଛନ୍ତି। ଉଭୟ ଏହି ଗ୍ରାମ ଗସ୍ତ କରି ପ୍ରଥମେ ସେମାନଙ୍କ ଆଧାର କାର୍ଡ କରିବା ପାଇଁ ଉଦ୍ୟମ କରିଛନ୍ତି। ବାସିନ୍ଦା ପ୍ରମାଣପତ୍ର ଓ ଜନ୍ମ ପ୍ରମାଣପତ୍ର ପାଇବା ପରେ ସେଠାରେ ଆଧାର କ୍ୟାମ୍ପକରି ଆଧାର କାର୍ଡ ପ୍ରଦାନ କରାଯିବ ବୋଲି ତହସିଲଦାର ସୂଚନା ଦେଇଛନ୍ତି । ଏହାଛଡ଼ା ବ୍ଲକର ସମସ୍ତ ଅପହଞ୍ଚ ଗ୍ରାମରେ ପର୍ଯ୍ୟାୟ କ୍ରମେ ଆଧାର କ୍ୟାମ୍ପ କରାଯିବ ବୋଲି ସେ କହିଛନ୍ତି। ପୂର୍ବରୁ ପଞ୍ଜୀକୃତ ହୋଇଥିବା ୫ ବର୍ଷରୁ କମ୍ ୩୫ ଜଣ ପିଲାଙ୍କୁ ଜନ୍ମ ପ୍ରମାଣପତ୍ର ପ୍ରଦାନ କରାଯାଇଛି। ମୋବାଇଲ ନେଟ୍ୱର୍କ ସମସ୍ୟା ଯୋଗୁ ଏହି ଅନ୍ଲାଇନ କାର୍ଯ୍ୟ କରିବା କଷ୍ଟସାଧ୍ୟ ହେଲେ ମଧ୍ୟ ତହସିଲ କର୍ମଚାରୀଙ୍କ ଏହି କାର୍ଯ୍ୟକୁ ସାଧାରଣରେ ପ୍ରଶଂସା କରାଯାଇଛି। ଏହି କାର୍ଯ୍ୟକ୍ରମରେ ରାଜସ୍ବ ସୁପରଭାଇଜର ମନୋଜ ଗମାଙ୍ଗ, ଢେପାଗୁଡା ରାଜସ୍ବ ନିରୀକ୍ଷକ ବିଶ୍ୱନାଥ ସନ୍ତୋଷ କୁମାର, ଅତିରିକ୍ତ ରାଜସ୍ବ ନିରୀକ୍ଷକ ଶଶୀ କୁମାର ବେହେରା, ମଧୁବନ ସରପଞ୍ଚ ବଂଶୀ ଶବର, ସ୍ଥାନୀୟ ଅଙ୍ଗନଓ୍ବାଡି କର୍ମୀ, ତହସିଲ କାର୍ଯ୍ୟାଳୟର କର୍ମଚାରି ସୁଶାନ୍ତ ପାତ୍ର ପ୍ରମୁଖ ଉପସ୍ଥିତ ଥିଲେ।