ନୂଆଗାଁ,୧୮।୭(ଧନେଶ୍ୱର ସାହୁ)ନୟାଗଡ଼ ଜିଲା ନୂଆଗାଁ ବ୍ଲକରେ ଭତ୍ତା ପ୍ରଦାନରେ ଅନିୟମିତତା ଅଭିଯୋଗ ପରେ ନୟାଗଡ଼ ଉପ ଜିଲାପାଳଙ୍କ ଦ୍ୱାରା ୩ ଜଣିଆ କମିଟି ଗଠନ କରାଯାଇ ତଦନ୍ତ କରାଯାଇଥିଲା। ତଦନ୍ତରେ ନୂଆଗାଁ ବ୍ଲକର ୨ ପଞ୍ଚାୟତରେ ୫୭ ଜଣ ଜାଲ ଭତ୍ତା ହିତାଧିକାରୀଙ୍କୁ ଚିହ୍ନଟ କରାଯାଇଛି। ସେଥିମଧ୍ୟରୁ ଉଦୟପୁର ପଞ୍ଚାୟତରେ ୩୪ ଜଣ ଓ ମାଳିସାହି ପଞ୍ଚାୟତରେ ୨୩ ଜଣ ଜାଲ ହିତାଧିକାରୀ ଅଛନ୍ତି। ଏହି ହିତାଧିକାରୀମାନଙ୍କ ଭତ୍ତା ବନ୍ଦ କରିବାକୁ ବ୍ଲକ ପ୍ରଶାସନ ପକ୍ଷରୁ ଏକ ନୋଟିସ ଜାରି କରାଯାଇ ସଂପୃକ୍ତ ପଞ୍ଚାୟତରେ ଲଗାଯାଇଛି।
ଅଭିଯୋଗ ଅନୁଯାୟୀ, ନୂଆଗାଁ ବ୍ଲକରେ ଅନେକ ଅଯୋଗ୍ୟ ହିତାଧିକାରୀ ନିଜର ଆଧାର କାର୍ଡ, ଫଟୋ ପରିଚୟ ପତ୍ରରେ ନିଜର ବୟସ ବୃଦ୍ଧି, ଆବଶ୍ୟକ କାଗଜପତ୍ର ଓ ନିଜର ଫଟୋ ଏଡିଟିଂ କରି ଭତ୍ତା ହାତେଇଥିଲେ। ଏପରି କି ବାପାଙ୍କୁ ୭୮ ବର୍ଷ ହୋଇଥିବା ବେଳେ ପୁଅର ବୟସ ୬୯ ବର୍ଷ କରି ଭତ୍ତା ହଡପ କରାଯାଉଥିଲା। କେତେଜଣ ବିଭାଗୀୟ କର୍ମଚାରୀ, ସେବା କେନ୍ଦ୍ର ଓ ମଧ୍ୟସ୍ଥଙ୍କୁ ୫ ହଜାରରୁ ୧୦ ହଜାର ପର୍ଯ୍ୟନ୍ତ ଟଙ୍କା ଦେଲେ ଅଯୋଗ୍ୟ ବ୍ୟକ୍ତିମାନେ ଭତ୍ତା ପାଇବା ସମ୍ଭବ ହୋଇପାରୁଥିଲା। ଏପରି କି କେତେଜଣ ସୁସ୍ଥ ସବଳ ଯୁବକ ମଧ୍ୟ ଭିନ୍ନକ୍ଷମ ପ୍ରମାଣପତ୍ର ଆଣି ଭତ୍ତା ପାଉଥିଲେ। ଏହି ଘଟଣାକୁ ନେଇ ‘ଡକ୍ୟୁମେଣ୍ଟ ଏଡିଟିଂ କରି ଭତ୍ତା ହାତେଇବାକୁ ପ୍ରୟାସ’ ଶୀର୍ଷକ ଏକ ରିପୋର୍ଟ ଧରିତ୍ରୀରେ ୨୮ା୫ା୨୦୨୪ରେ ପ୍ରକାଶ ପାଇଥିଲା। ଏହାପରେ ଜିଲା ପ୍ରଶାସନ ପକ୍ଷରୁ ଉକ୍ତ ଘଟଣା ଉପରେ ଖୋଳତାଡ଼ ଆରମ୍ଭ ହୋଇଥିଲା। ପ୍ରକାଶିତ ଖବରର ସତ୍ୟତା ଜାଣିବା ନିମନ୍ତେ ନୟାଗଡ଼ ଉପଜିଲାପାଳ କର୍ଣ୍ଣଦେବ ସମାଦାର ଉପଖଣ୍ଡ ସାମାଜିକ ସୁରକ୍ଷା ଅଧିକାରୀଙ୍କ ଅଧ୍ୟକ୍ଷତାରେ ନୂଆଗାଁ ବିଡ଼ିଓ ଓ ନୂଆଗାଁ ବ୍ଲକ ସାମାଜିକ ସୁରକ୍ଷା ଅଧିକାରୀଙ୍କୁ ନେଇ ଏକ ୩ ଜଣିଆ କମିଟି ଗଠନ କରି ତଦନ୍ତ କରିବା ପାଇଁ ନିର୍ଦ୍ଦେଶ ଦେଇଥିଲେ। ତଦନ୍ତରେ ଉଦୟପୁର ପଞ୍ଚାୟତରେ ୩୪ ଜଣ ଓ ମାଳିସାହି ପଞ୍ଚାୟତରେ ୨୩ ଜଣ ଜାଲ ହିତାଧିକାରୀଙ୍କୁ ଚିହ୍ନଟ କରାଯାଇଥିଲା। ଚଞ୍ଚକତା କରି ସରକାରୀ ଅର୍ଥ ଲୁଟ୍ କରିଥିବା ବ୍ୟକ୍ତି ଓ ସେଥିରେ ସମ୍ପୃକ୍ତି ଥିବା ସେବା କେନ୍ଦ୍ର, ବିଭାଗୀୟ କର୍ମଚାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବି ହୋଇଥିଲା। ତେବେ କାର୍ଯ୍ୟାନୁଷ୍ଠାନର ପ୍ରଥମ ସୋପାନରେ ଚିହ୍ନଟ ହୋଇଥିବା ୫୭ ଜାଲ ଭତ୍ତା ହିତାଧିକାରୀଙ୍କ ଅନୁଦାନକୁ ବନ୍ଦ କରି ଦିଆଯାଇଛି। ସେହିଭଳି ଅନେକ ସୁସ୍ଥସବଳ ଯୁବକ ଅସତ୍ ଉପାୟରେ ଭିନ୍ନକ୍ଷମ ପ୍ରମାଣପତ୍ର ଆଣି ଭତ୍ତା ପାଉଛନ୍ତି। ସେମାନଙ୍କୁ ଯଦି ଯାଞ୍ଚ କରାଯାଆନ୍ତା ତା’ହେଲେ ଆହୁରି ଅନେକ ଜାଲ ହିତାଧିକାରୀ ବାଦ୍ ପଡନ୍ତେ। ଫଳରେ ଭତ୍ତା ପାଇଁ ଆବେଦନ କରି ଅପେକ୍ଷାରେ ଥିବା ୧୧୭୧ ହିତାଧିକାରୀଙ୍କ ମଧ୍ୟରୁ ଅନେକ ଉପକୃତ ହୋଇପାରନ୍ତେ ବୋଲି ବୁଦ୍ଧିଜୀବୀମାନେ ମତବ୍ୟକ୍ତ କରିଛନ୍ତି ା
