ସାମାନା(ପଞ୍ଜାବ),୨୫ା୪: ପଞ୍ଜାବ ଆକ୍ଟିଭିଷ୍ଟ ଗୁର୍ଜିତ ସିଂ ଖାଲ୍ସା ଧର୍ମନିନ୍ଦା ଘଟଣାରେ କଠୋର ଆଇନ ଆଣିବା ଦାବିରେ ୪୦୦ ଫୁଟ୍ ଉଚ୍ଚ ବିଏସ୍ଏନ୍ଏଲ୍ ଟାଓ୍ବାର ଉପରେ ୫୬୦ ଦିନ ବସିରହିବା ପରେ ଶୁକ୍ରବାର ସକାଳେ ତାଙ୍କୁ ତଳକୁ ଅଣାଯାଇଛି। ପଞ୍ଜାବ ସରକାର ଧର୍ମନିନ୍ଦା ବିରୋଧରେ କଠୋର ଆଇନ ଆଣିବା ପରେ ଜିଲା ପ୍ରଶାସନ ୪୩ ବର୍ଷୀୟ ଗୁର୍ଜିତଙ୍କୁ ସୁରକ୍ଷିତ ଭାବେ ଟାଓ୍ବାରରୁ ତଳକୁ ଆଣିଛି।
ଗୁରୁଗ୍ରନ୍ଥ ସାହିବର ଅପମାନ କରୁଥିବା ବ୍ୟକ୍ତିଙ୍କୁ କଠୋର ଦଣ୍ଡବିଧାନ ଦାବିରେ ଗୁର୍ଜିତ ୨୦୨୪ ଅକ୍ଟୋବର ୧୨ରେ ପଟିଆଲା ନିକଟ ସାମାନାଠାରେ ଥିବା ଟାଓ୍ବାର ଉପରେ ଚଢ଼ି ବିକ୍ଷୋଭ ଜାରି ରଖିଥିଲେ। ଶୁକ୍ରବାର ଅଗ୍ନିଶମ, ପୋଲିସ୍ ଓ ପ୍ରଶାସନିକ ଅଧିକାରୀମାନଙ୍କ ଏକ ଟିମ୍ ଏକ ସ୍ବତନ୍ତ୍ର କ୍ରେନ୍ ସହାୟତାରେ ତାଙ୍କୁ ତଳକୁ ଆଣିଛି। ଏହି ଅଭିଯାନରେ ସୁରକ୍ଷା ଉପକରଣ ଲାଗିଥିବାବେଳେ ବିଭିନ୍ନ ସଂସ୍ଥା ପକ୍ଷରୁ ମିଳିତ ଉଦ୍ୟମ ହୋଇଥିଲା ବୋଲି ଅଗ୍ନିଶମ ବିଭାଗର ଜଣେ ଅଧିକାରୀ କହିଛନ୍ତି। ଗୁର୍ଜିତ ଟାଓ୍ବାରରୁ ଓହ୍ଲାଉଥିବାବେଳେ ତଳେ ଲୋକମାନେ ସ୍ଲୋଗାନ ଦେଇଥିଲେ। ଗୁର୍ଜିତଙ୍କ ସ୍ବାସ୍ଥ୍ୟାବସ୍ଥା ଯାଞ୍ଚ ଲାଗି ତାଙ୍କୁ ଏକ ଆମ୍ବୁଲାନ୍ସ ଯୋଗେ ହସ୍ପଟାଲ ନିଆଯାଇଥିଲା। ସମର୍ଥକମାନେ ତାଙ୍କ ଉପରେ ପୁଷ୍ପବୃଷ୍ଟି କରିଥିଲେ। ଗୁରୁଙ୍କ କୃପାରୁ ୧୮ ମାସ ୧୨ ଦିନ ପରେ ସେ ସୁରକ୍ଷିତ ଭାବେ ତଳକୁ ଆସିଥିବା କହିବା ସହ ପଞ୍ଜାବ ସରକାର, ମୁଖ୍ୟମନ୍ତ୍ରୀ ଭଗଓ୍ବନ୍ତ ମାନ୍ ଏବଂ ବିଧାନସଭା ବାଚସ୍ପତି କୁଲତାର ସିଂ ସାନ୍ଧଓ୍ବନ୍ଙ୍କୁ ଅଭିନନ୍ଦନ ଜଣାଇଛନ୍ତି। ଏଥିସହିତ ତାଙ୍କୁ ସୁରକ୍ଷିତ ଭାବେ ତଳକୁ ଆଣିଥିବା ସ୍ଥାନୀୟ ପ୍ରଶାସନକୁ ସେ ଧନ୍ୟବାଦ ଜଣାଇଛନ୍ତି।