ନୂଆଦିଲ୍ଲୀ,୨୩।୭: ବିୟୁଟିଫୁଲ ମାଇଣ୍ଡସ୍ ୟୁଥ୍ ମେଣ୍ଟରିଂ ଫାଉଣ୍ଡେଶନ (ବିଏମ୍ଓ୍ବାଇଏମ୍ଏଫ୍) ପକ୍ଷରୁ ନିକଟରେ ଏକ ଅଭିନବ କାର୍ଯ୍ୟକ୍ରମର ଆୟୋଜନ କରାଯାଇଥିଲା। ବିଶେଷକରି ଯୁବଗୋଷ୍ଠୀଙ୍କ ମଧ୍ୟରେ ବିଜ୍ଞାନ, ପ୍ରଯୁକ୍ତିବିଦ୍ୟା, ଇଞ୍ଜିନିୟରିଂ ଏବଂ ଗଣିତ (ଷ୍ଟେମ୍) ଭିତ୍ତିକ ଶିକ୍ଷାକୁ ସମର୍ଥନ କରିବା ପାଇଁ ଏଭଳି ଏକ କାର୍ଯ୍ୟକ୍ରମର ଆୟୋଜନ କରାଯାଇଥିଲା। ଉଲ୍ଲେଖଯୋଗ୍ୟ, ଓଡ଼ିଶା ସୋସାଇଟି ଅଫ୍ ଆମେରିକା (ଓଏସ୍ଏ)ର ୫୪ତମ ବାର୍ଷିକ ସମ୍ମିଳନୀ ଶିକାଗୋଠାରେ ଅନୁଷ୍ଠିତ ହୋଇଯାଇଛି। ବିଶେଷକରି ୩ ଦିନିଆ ଓଏସ୍ଏ ସମ୍ମିଳନୀରେ ବୈଜ୍ଞାନିକ ଅନୁସନ୍ଧାନ ଏବଂ ପତ୍ରିକାକୁ ପ୍ରୋତ୍ସାହିତ କରିବା ଲକ୍ଷ୍ୟରେ ଉତ୍ତର ଆମେରିକାର ଯୁବକ ଓଡ଼ିଆ ଯୁବକମାନଙ୍କୁ ଷ୍ଟେମ୍ଭିତ୍ତିକ ପ୍ରତିଯୋଗିତାରେ ଭାଗନେବାକୁ ଉତ୍ସାହିତ କରିବା ପାଇଁ ଉକ୍ତ ପ୍ରତିଯୋଗିତାର ଆୟୋଜନ କରାଯାଇଥିଲା। ସେହିଭଳି ଶିକାଗୋରେ ଅବସ୍ଥିତ ଭାରତର କନ୍ସୁଲ୍ ଜେନେରାଲ ସୋମନାଥ ଘୋଷ ସମ୍ମାନିତ ଅତିଥି ଭାବେ ଯୋଗଦେଇ ଯୁବବୈଜ୍ଞାନିକମାନଙ୍କୁ ଭାରତରେ ଷ୍ଟେମ୍ ସମ୍ବନ୍ଧୀୟ ଶିକ୍ଷା କ୍ଷେତ୍ରର ଅଗ୍ରଗତି ତଥା ଭାରତୀୟ ମୂଳ ଯୁବକମାନଙ୍କ ଭବିଷ୍ୟତରେ ଯୋଗଦାନ ଉପରେ ଗୁରୁତ୍ୱାରୋପ କରିଥିଲେ। ଉକ୍ତ ପ୍ରତିଯୋଗିତାରେ ୱାଶିଂଟନ୍ ଡିସିରୁ ଡ. ଅଜୟ ମହାନ୍ତି,ଶିକାଗୋରୁ ଗୋକୁଳ ମିଶ୍ର ଏବଂ ବିଏମ୍ୱାଇଏମ୍ଏଫ୍ର ପ୍ରତିଷ୍ଠାତା ସଭାପତି ଡ. ଶୁଚିସ୍ମିତା ପଣ୍ଡା ପ୍ରମୁଖ ବିଚାରପତି ଭାବେ ଯୋଗଦେଇଥିଲେ। ଉକ୍ତ କାର୍ଯ୍ୟକ୍ରମକୁ ଶିକାଗୋର ଶୁଭେନ୍ଦୁ ଷଡ଼ଙ୍ଗୀ ପରିଚାଳନା କରିଥିଲେ। ଉକ୍ତ କାର୍ଯ୍ୟକ୍ରମରେ ଅନୁସନ୍ଧାନର ଗଭୀରତା,ପ୍ରସ୍ତୁତିର ବ୍ୟାପକତା ଏବଂ ଜୀବନ୍ତ ଉପସ୍ଥାପନା ଅତ୍ୟନ୍ତ ପ୍ରଶଂସନୀୟ ଥିଲା। ଏହାର ସମସ୍ତ ପ୍ରତିଯୋଗୀଙ୍କୁ ବିଏମ୍ଓ୍ବାଇଏମ୍ଏଫ୍ର ପ୍ରତିଷ୍ଠାତା ସଭାପତି ଡ. ଶୁଚିସ୍ମିତା ପଣ୍ଡା ବିଭିନ୍ନ ଉପାଦେୟ ପରାମର୍ଶ ଦେଇଥିଲେ। ପରିଶେଷରେ ଫାଇନାଲିଷ୍ଟମାନେ ବିଚାର ପାଇଁ ବ୍ୟବହୃତ ରେଫରେନ୍ସ ସହ ଏକ ସଂକ୍ଷିପ୍ତ ଅନୁସନ୍ଧାନ ଡକ୍ୟୁମେଣ୍ଟ ମଧ୍ୟ ଦାଖଲ କରିଥିଲେ। ଉକ୍ତ ପ୍ରତିଯୋଗିତାର ବିଭିନ୍ନ କାଟେଗୋରିରେ ପ୍ରିୟଙ୍କା ଦାସ ଏବଂ ସାନ୍ଭି ଧଳ ପ୍ରଥମ ପୁରସ୍କାର ପାଇଥିବାବେଳେ ଅନନ୍ୟା ପଟ୍ଟନାୟକ ଏବଂ ଦେବା ଦେବାଂନ୍ସୀ ଦେ ଓ ନାଇହାରା ରାଉତ ୨ୟ ପୁରସ୍କାର ଏବଂ ଦେବାବନ୍ଦ୍ୟ ଦାଶ ଓ କ୍ରିତିତା ସାମଲ ୩ୟ ପୁରସ୍କାର ପାଇଥିଲେ। ଅପରପକ୍ଷରେ ପ୍ରତିଯୋଗିତାର ସମସ୍ତ ବିଜେତାଙ୍କୁ ବିଏମ୍ୱାଇଏମ୍ ଦ୍ୱାରା ପ୍ରକାଶିତ ପତ୍ରିକା, ଓଏସ୍ଏ ସଭାପତି ଜ୍ଞାନ ପଟ୍ଟନାୟକଙ୍କ ତଥା ସଂଯୋଜକ ଝରା ଦାସଙ୍କ ଦ୍ବାରା ପ୍ରାୟୋଜିତ ଟ୍ରଫି, ପୁରସ୍କାର ଚେକ୍ ପ୍ରଦାନ କରାଯାଇଥିଲା। ଉଲ୍ଲେଖଯୋଗ୍ୟ, ଆଗାମୀ ଦିନରେ ଓଡ଼ିଶାରେ ମଧ୍ୟ ଏଭଳି ପ୍ରତିଯୋଗିତାର ଆୟୋଜନ କରାଯିବ ବୋଲି ବିଏମ୍ଓ୍ବାଇଏମ୍ଏଫ୍ର ପ୍ରତିଷ୍ଠାତା ସଭାପତି ଡ. ଶୁଚିସ୍ମିତା ପଣ୍ଡା ମତପ୍ରକାଶ କରିଛନ୍ତି। ସୂଚନାଯୋଗ୍ୟ, ଯୁକ୍ତରାଷ୍ଟ୍ରର ଏକ ଅଣ ଲାଭ ସଙ୍ଗଠନ ବିଏମ୍ଓ୍ବାଇଏମ୍ଏଫ୍ ଯାହା ଭାରତରେ ଏକ ସେକ୍ସନ-୮ କମ୍ପାନୀ ଭାବେ ଉପସ୍ଥିତ।
