ଛତ୍ରପୁର,୨୨ା୧(ଡି.ଏନ୍.ଏ.)- ଗଞ୍ଜାମ ଜିଲା ନିର୍ଭୟକଢି ଟାସ୍କଫୋର୍ସ କମିଟି ବୈଠକ ଶୁକ୍ରବାର ଜିଲାପାଳଙ୍କ ସମ୍ମିଳନୀ ଗୃହରେ ଅନୁଷ୍ଠିତ ହୋଇଯାଇଛି । ଏଥିରେ ଜିଲାପାଳ ବିଜୟ ଅମୃତା କୁଲାଙ୍ଗେ ଅଧ୍ୟକ୍ଷତା କରିଥିଲେ । ଗାଁରେ ବାଲ୍ୟବିବାହ ହେଲେ ସ୍ଥାନୀୟ ସ୍କୁଲ ଶିକ୍ଷକ ଓ ଅଙ୍ଗନୱାଡି କର୍ମୀ କିଭଳି ଜାଣିପାରୁନାହାନ୍ତି ବୋଲି ଜିଲାପାଳ ପ୍ରଶ୍ନ କରିଥିଲେ । ଏଣିକି ବାଲ୍ୟବିବାହ ହେଲେ ଶିକ୍ଷକମାନେ ଦାୟୀ ରହିବେ ବୋଲି ଜିଲାପାଳ କହିଛନ୍ତି। ପ୍ରତି ସପ୍ତାହରେ ଶିକ୍ଷକ, ଅଙ୍ଗନୱାଡି କର୍ମୀ, ଏଏନ୍ଏମ୍ମାନଙ୍କୁ ନେଇ ନିର୍ଭୟ କଢି ବୈଠକ କରାଯିବ । ଏଥିରେ ବାଳିକାଙ୍କ ସ୍ବାସ୍ଥ୍ୟ ସମ୍ବନ୍ଧୀୟ, ପରିବାରର କ’ଣ ସମସ୍ୟା ରହିଛି, ବାଲ୍ୟ ବିବାହ କିଭଳି ରୋକାଯାଇପାରିବ ତାହା ଆଲୋଚନା କରିବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ବାଲ୍ୟବିବାହ କରୁଥିବା ପୁରୋହିତଙ୍କ ନାଁରେ ସ୍ଥାନୀୟ ଥାନାରେ ଏତଲା ଦିଆଯିବ । ବିବାହ ବେଳେ ଅଙ୍ଗନୱାଡି କର୍ମୀ ଓ ପୁରୋହିତ ଉଭୟ ବରକନ୍ୟାଙ୍କ ଆଧାର କାର୍ଡ ଦେଖିବା ବାଧ୍ୟତାମୂଳକ । ବର ବୟସ ୨୧ ଓ କନ୍ୟା ବୟସ ୧୮ ହେବା ଜରୁରୀ । ଉପଜିଲାପାଳମାନେ ଏଣିକି ଏହାର ଅନୁଧ୍ୟାନ କରିବେ । ଅନ୍ୟପକ୍ଷରେ ବାଲ୍ୟ ବିବାହ ସମ୍ପର୍କରେ କେହି ଖବର ଦେଲେ ୫ ହଜାର ଟଙ୍କା ପୁରସ୍କାର ମିଳିବ । ଅଙ୍ଗନୱାଡି କର୍ମୀ ମଧ୍ୟ ଏହି ପୁରସ୍କାର ପାଇପାରିବେ ବୋଲି ଜିଲାପାଳ ଘୋଷଣା କରିଛନ୍ତି।
ବର୍ତ୍ତମାନ ସୁଦ୍ଧା ଜିଲାର ୧୦୩୨ ଗାଁ ଓ ସହରାଞ୍ଚଳର ୧୪୦ ୱାର୍ଡ ବାଲ୍ୟବିବାହ ମୁକ୍ତ ଘୋଷଣା ହୋଇଛି । ଜୁଲାଇ ଶେଷସୁଦ୍ଧା ଗଞ୍ଜାମ ଜିଲାକୁ ବାଲ୍ୟ ବିବାହ ମୁକ୍ତ କରିବା ନିମନ୍ତେ ଜିଲାପାଳ ନିର୍ଦ୍ଦେଶ ଦେଇଛନ୍ତି। ବାଲ୍ୟବିବାହ ନେଇ ଜିଲାରେ ୧୪ଟି ସମ୍ବେଦନଶୀଳ ଅଞ୍ଚଳ ଚିହ୍ନଟ ହୋଇଛି। ବାଲ୍ୟ ବିବାହ ସମ୍ପର୍କରେ ୧୦ଟି ଏତଲା ଥାନାରେ ଦିଆଯାଇଥିବାବେଳେ ୧୧ ମାମଲା ସିଡବ୍ଲ୍ୟୁସିକୁ ହସ୍ତାନ୍ତର ହୋଇଛି । ୨୦୧୭ରେ ୨୪ ବାଲ୍ୟ ବିବାହ ରୋକାଯାଇଥିବା ବେଳେ ୨୦୧୮ରେ ୨୨, ୨୦୧୯ରେ ୪୫ ଓ ୨୦୨୦ରେ ୨୨୮ ବାଲ୍ୟ ବିବାହ ରୋକାଯାଇଥିବା ସୂଚନା ମିଳିଛି। ବୈଠକରେ ବ୍ରହ୍ମପୁର ଉପଜିଲାପାଳ, ସିଡବ୍ଲ୍ୟୁସି ମେମ୍ବର ସିଏଚ୍ ଜ୍ୟୋତି, ଜିଲା ଶିକ୍ଷା ଅଧିକାରୀ ଅମୂଲ୍ୟ କୁମାର ପ୍ରଧାନ, ଜିଲା ସମାଜ ମଙ୍ଗଳ ଅଧିକାରୀ ସୁରେଖା ସୁନ୍ଦରୀ ମଲ୍ଲିକ, ଜିଲା ଶିଶୁ ସୁରକ୍ଷା ଅଧିକାରୀ ଶୁଭ୍ରାଂଶୁ ମହାରଣା, ଡିପିଏମ୍ ଶ୍ୟାମ ସୁନ୍ଦର ତ୍ରିପାଠୀ, ଅରୁଣ ଶତପଥୀ, ଦେବୀଦତ୍ତ ରଥ ପ୍ରମୁଖ ଉପସ୍ଥିତ ଥିଲେ ।
