ଭୋଗରାଇ,୨୯।୬(ପ୍ରଦୀପ ଦାସ)ଓଡ଼ିଶା ସୀମାନ୍ତ ବାଲେଶ୍ୱର ଜିଲା ଭୋଗରାଇ ବ୍ଲକ ଅଧୀନ ଉଦୟପୁର-ତାଳସାରୀ ବେଳାଭୂମିକୁ ବିଶ୍ୱମାନର ପର୍ଯ୍ୟଟନସ୍ଥଳୀ ଗଢି ତୋଳିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରିବା ପରେ ରାଜ୍ୟସ୍ତରୀୟ ନେତା ଓ ସଚିବମାନେ ପରିଦର୍ଶନରେ ଆସି କୋଟି କୋଟି ଟଙ୍କାର ଆର୍ଥିକ ଅନୁଦାନ ଦେଇଛନ୍ତି। ହେଲେ ସରକାରଙ୍କ ଏହି ବିପୁଳ ଅର୍ଥ ଠିକ୍ ଭାବେ ବିନିଯୋଗ ନ ହୋଇ ସମୁଦ୍ର ଗର୍ଭକୁ ଚାଲିଯାଉଛି। ଅସରାଏ ବର୍ଷାରେ ସୁରକ୍ଷା ବନ୍ଧର ଦକ୍ଷିଣ ପାଚେରି ନିର୍ମିତ କେତେକ ସ୍ଥାନରେ ଦବିଥିବା ବେଳେ ଉତ୍ତର ପାର୍ଶ୍ୱ ରାସ୍ତା ୫oଟି ସ୍ଥାନରେ ବଡ ବଡ ଘାଇ ହୋଇ ରାସ୍ତା ଧସିବା ଏହାର ଉଦାହରଣ। ଏହି କାର୍ଯ୍ୟ ନିମ୍ନମାନର ହୋଇଥିବାରୁ ଏଭଳି ସ୍ଥିତି ହୋଇଛି ବୋଲି ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ବିଭାଗୀୟ ଅଧିକାରୀଙ୍କ ଚାପରେ ବୁଧବାର ଘାଇ ସୃଷ୍ଟି ହୋଇଥିବା ସ୍ଥାନରେ ଠିକାଦାର ନିକଟସ୍ଥ ସମୁଦ୍ର ବାଲିପନ୍ତାରୁ ଟ୍ରାକ୍ଟର ଯୋଗେ ବାଲି ଆଣି ମରାମତି କରୁଥିବା ବେଳେ ତାହା ବର୍ଷାରେ ପୁଣି ଧୋଇଯାଉଛି। ସରକାରଙ୍କ ବିକାଶ ଯୋଜନା ଏଠାରେ ଫେଲ୍ ମାରିଥିବା ସାଧାରଣରେ ଅଭିଯୋଗ ହୋଇଛି।
ଉଦୟପୁର-ତାଳସାରୀ ୨. ୭ କି.ମି. ତଟ ସୁରକ୍ଷା ପଥରବନ୍ଧ ନିର୍ମାଣ ନିମନ୍ତେ ୨୦୧୧ରୁ ପର୍ଯ୍ୟାୟ କ୍ରମେ କାର୍ଯ୍ୟ ଆରମ୍ଭ ହୋଇ ଅଦ୍ୟାବଧି ୫୬କୋଟି ଟଙ୍କାରେ ପହଞ୍ଚିଛି। ୧୨ବର୍ଷ ଧରି ଏହି କାର୍ଯ୍ୟ ଚାଲି ଆସୁଥିବା ବେଳେ କାର୍ଯ୍ୟ ସମ୍ପୂର୍ଣ୍ଣ ହୋଇପାରୁ ନ ଥିବାରୁ ଠିକାଦାର ଓ ବିଭାଗୀୟ ଅଧିକାରୀଙ୍କୁ ଦାୟୀ କରାଯାଇଛି। ପଥର ଓ ବାଲି ମିଳୁନାହିଁ ବୋଲି କହି ଠିକାଦାର ଓ ଜଳସମ୍ପଦ ଅଧିକାରୀମାନେ ନିଜ ମୁଣ୍ଡରୁ ଦାୟିତ୍ୱରୁ ଦୂରେଇ ରହୁଥିବା ଅଭିଯୋଗ ହେଉଛି। ଓଡିଶାରୁ ଦୈନିକ ଶହ ଶହ ପଥର ଓ ବାଲି ବୋଝେଇ ଡମ୍ପର ଚୋରାରେ ପଶ୍ଚିମବଙ୍ଗକୁ ଚାଲାଣ ହେଉଥିବା ବେଳେ ଓଡ଼ିଶାରେ ଉନ୍ନୟନ କାର୍ଯ୍ୟରେ ଲଘୁଜାତ ଦ୍ରବ୍ୟ ନ ମିଳିବା ହାସ୍ୟାସ୍ପଦ ବୋଲି ବହୁ ଜନପ୍ରତିନିଧି ଓ ବୁଦ୍ଧିଜୀବୀ ପ୍ରକାଶ କରିଛନ୍ତି। ପ୍ରତିବର୍ଷ କୋଟି କୋଟି ଟଙ୍କା ରାଜକୋଷରୁ ଖର୍ଚ୍ଚ ହୋଇ ପଥରବନ୍ଧ ପାଇଁ ଆର୍ଥିକ ଅନୁଦାନ ଦିଆଯାଉଥିବା ବେଳେ ନିମ୍ନମାନର କାର୍ଯ୍ୟ ହେଉଥିବା ବାରମ୍ବାର ଅଭିଯୋଗ ହେଉଛି। ଫଳରେ ସମୁଦ୍ର ଜୁଆର ମାଡ଼ରେ ସେସବୁ ସମୁଦ୍ର ଗର୍ଭକୁ ଟାଣିନେଉଛି। ଅପରପକ୍ଷରେ ଓଡିଶା ସୀମାନ୍ତ ପଶ୍ଚିମବଙ୍ଗ ଦୀଘା ବେଳାଭୂମି ପଥରବନ୍ଧକୁ ଯୁଦ୍ଧକାଳୀନ ଭିତ୍ତିରେ ନିର୍ମାଣ, ଶକ୍ତ ଓ ସୁରକ୍ଷିତ ରଖାଯାଇଥିବା ବେଳେ ଆମ ବିଭାଗୀୟ ଅଧିକାରୀ ସେମାଙ୍କର କାର୍ଯ୍ୟଶୈଳୀ ଦେଖି ଚାହିଁ ଶିଖି ପାରୁ ନ ଥିବାରୁ ତଟ ସୁରକ୍ଷା ପଥରବନ୍ଧ ଭାଙ୍ଗିରୁଜି ଯାଉଥିବା କୁହାଯାଉଛି। ଗତ ୨୦୨୧ ୟାସ୍ ନାମିତ ବାତ୍ୟାରେ ଏହି ପଥର ବନ୍ଧ ଭାଙ୍ଗିଯାଇଥିବା ବେଳେ ୨୦୨୨ରେ ମରାମତି କରାଯାଇଥିଲା। ବର୍ଷାଋତୁ ଆରମ୍ଭରୁ ସମ୍ଭାବ୍ୟ ବାତ୍ୟା ଓ ସମୁଦ୍ର ଉତ୍ତାଳ ଢେଉରେ ପଥରବନ୍ଧ ପ୍ରତି ବିପଦ ସୃଷ୍ଟି ହେଲା ଭଳି ସ୍ଥିତି ଉପୁଜିବାରୁ କୂଳବାସଙ୍କ ଭୀତି ବଢାଇଛି। ଏ ସମ୍ପର୍କରେ ବାଲେଶ୍ୱର ଜଳ ସମ୍ପଦ ବିଭାଗର ସୁପରିଣ୍ଟେଣ୍ଡେଣ୍ଟ ପ୍ରଭାସ ପ୍ରଧାନଙ୍କୁ ପଚରାଯିବାରୁ ମେରାଇନ ଡ୍ରାଇଭ ରାସ୍ତାରେ ବଡ ଘାଇ ହେବା ଏବଂ ରାସ୍ତା ଧସେଇ ନେବା ସମ୍ପର୍କରେ ପଚାରିବାରୁ ସେ ମୂଳପ୍ରଶ୍ନ ଚତୁରତାର ସହ ଏଡାଇଯାଇ ରାସ୍ତା କାର୍ଯ୍ୟ ଶେଷ ହୋଇନାହିଁ ବୋଲି କହିଛନ୍ତି।
