ଭୁବନେଶ୍ୱର,୧୫ା୧୧(ବ୍ୟୁରୋ): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ମୁଖ୍ୟମନ୍ତ୍ରୀଙ୍କ ସଚିବ(୫-ଟି) ଭି.କେ. ପାଣ୍ଡିଆନ ସୋମବାର ଭୁବନେଶ୍ୱର ଉପକଣ୍ଠ ପଥରଗାଡ଼ିଆ ନିକଟସ୍ଥ ଶିଖରଚଣ୍ଡୀ ମନ୍ଦିର ପରିଦର୍ଶନ କରିବା ସହ ମନ୍ଦିର ଓ ଏହାର ପାର୍ଶ୍ୱବର୍ତ୍ତୀ ଅଞ୍ଚଳର ବିକାଶ କାର୍ଯ୍ୟର ସମୀକ୍ଷା କରିଛନ୍ତି। ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ(ବିଡିଏ)ଦ୍ୱାରା ପର୍ଯ୍ୟଟକଙ୍କ ସକାଶେ କରାଯାଉଥିବା ଅବସର ବିନୋଦନ ଏବଂ ଅନ୍ୟାନ୍ୟ ସୁବିଧାଗୁଡ଼ିକର ସମୀକ୍ଷା କରିଥିଲେ। ପ୍ରାକୃତିକ ଭିତ୍ତିଭୂମିର ବିକାଶ, ଦୁଃସାହସିକ କ୍ରୀଡ଼ା, ଟ୍ରାକିଂ, ପାହାଡ଼ ଉପର ବିକାଶ ସହ ପାହାଡ଼ ପାଦଦେଶ ଇଡ୍କୋ ଅଞ୍ଚଳରେ ଥିବା ଗୋଷ୍ଠୀ ଭିତ୍ତିଭୂମିର ବିକାଶ ନିମନ୍ତେ ୫-ଟି ସଚିବ ପରାମର୍ଶ ଦେଇଛନ୍ତି। ଏହାଛଡ଼ା ଗୋଠପାଟଣା ନିକଟରେ ବିଡିଏ ଦ୍ୱାରା କରାଯାଉଥିବା ଟାଉନ୍ ପ୍ଲାନିଂ ସ୍କିମ୍ ଏବଂ ରିଙ୍ଗ୍ ରୋଡ୍ ପ୍ରକଳ୍ପର ମଧ୍ୟ ସମୀକ୍ଷା କରିଥିଲେ। ପ୍ରକଳ୍ପ କାର୍ଯ୍ୟ ତ୍ୱରାନ୍ବିତ କରିବାକୁ ୫-ଟି ସଚିବ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ଜମି ମାଲିକମାନଙ୍କ ମତାମତ ଭିତ୍ତିରେ ଟାଉନ୍ ପ୍ଲାନିଂ ସ୍କିମ୍ଗୁଡ଼ିକର ବିକାଶ କରିବାକୁ ପାଣ୍ଡିଆନ ପରାମର୍ଶ ଦେଇଛନ୍ତି। ଏହି ସମୀକ୍ଷାରେ ଗ୍ରାମ୍ୟ ଉନ୍ନୟନ ବିଭାଗ ସଚିବ ସଞ୍ଜୟ ସିଂ, କ୍ରୀଡ଼ା ଓ ଯୁବସେବା ବିଭାଗ ସଚିବ ଆର୍. ଭୀନିଲକ୍ରୀଷ୍ଣା, ବିଡିଏ ଉପାଧ୍ୟକ୍ଷ ବଲଓ୍ବନ୍ତ ସିଂ, ବିଏମ୍ସି କମିଶନର ବିଜୟ ଅମୃତା କୁଲାଙ୍ଗେ, ଖୋର୍ଦ୍ଧା ଜିଲାପାଳ କେ.ସୁଦର୍ଶନ ଚକ୍ରବର୍ତ୍ତୀ ଏବଂ ଅନ୍ୟାନ୍ୟ ବରିଷ୍ଠ ଅଧିକାରୀ ଉପସ୍ଥିତ ଥିଲେ।
