କେନ୍ଦ୍ରାପଡ଼ା ଅଫିସ, ୫ା୨: କେନ୍ଦ୍ରାପଡ଼ା ଜିଲାରେ ଆସନ୍ତା ୨୨ ତାରିଖରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନର ଚତୁର୍ଥ ପର୍ଯ୍ୟାୟ ଭୋଟ୍ ଗ୍ରହଣ ହେବ। କେନ୍ଦ୍ରାପଡ଼ା ବ୍ଲକ ୫ ନଂ. ଜୋନ୍ ଜିଲା ପରିଷଦ ପଦବୀ ପାଇଁ ୩ ପ୍ରାର୍ଥୀ ନିର୍ବାଚନ ମଇଦାନକୁ ଓହ୍ଲାଇଛନ୍ତି। ଅନ୍ନପୂର୍ଣ୍ଣା ମଲ୍ଲିକ କଂଗ୍ରେସ ପ୍ରାର୍ଥୀ ଭାବେ ପ୍ରତିଦ୍ୱନ୍ଦ୍ୱିତା କରୁଥିବା ବେଳେ ଭାଜପାରୁ ପଦ୍ମିନୀ ମଲ୍ଲିକ ଓ ବିଜେଡିରୁ ଲିଲିତା ଦାସ ପ୍ରାର୍ଥୀ ହୋଇଛନ୍ତି। ଏହି ୩ ପ୍ରାର୍ଥୀ ନବାଗତା। ଲିଲିତା ଉତ୍କଳ ବିଶ୍ୱବିଦ୍ୟାଳୟରୁ ଏଲଏଲବି କରିଛନ୍ତି। ସେହିପରି ପଦ୍ମିନୀ ବିଏ ପାସ କରିଥିବା ବେଳେ ଅନ୍ନପୂର୍ଣ୍ଣାଙ୍କ ଶିକ୍ଷାଗତ ଯୋଗ୍ୟତା ନବମ ପାସ। ଏହି ଆସନକୁ ଦଖଲ କରିବାକୁ ସବୁ ପ୍ରାର୍ଥୀ ତତ୍ପର ହୋଇ ଉଠିଛନ୍ତି। ଏହି ଜୋନରେ ଢୋଲ ପଞ୍ଚାୟତର ୧୪ ୱାର୍ଡରେ ୩୦୭୪ ଭୋଟର ଅଛନ୍ତି। ସେହିପରି ଧୁମାତରେ ୧୭ ୱାର୍ଡର ୪୫୯୩, ଘାଘରାରେ ୧୨ ୱାର୍ଡର ୩୨୨୫, ଇନ୍ଦୁପୁରରେ ୧୨ ୱାର୍ଡର ୪୧୧୧, କୋରୋରେ ୧୮ ୱାର୍ଡର ୫୧୬୩, କୁତରଙ୍ଗରେ ୧୧ ୱାର୍ଡର ୧୮୫୭, ନିକିରାଇରେ ୨୪ ୱାର୍ଡର ୬୮୧୨ ଓ ଚାରିଗଁା ପଞ୍ଚାୟତର ୧୨ ୱାର୍ଡରେ ୩୩୮୩ ଭୋଟର ମତଦାନ ପାଇଁ ଚିହ୍ନଟ ହୋଇଛନ୍ତି। ଏହି ତ୍ରିମୁଖୀ ଲଢ଼େଇରେ ସ୍ଥାନୀୟ ସମସ୍ୟା ସହିତ ରାଜନୈତିକ ସଙ୍ଗଠନ ଫଳାଫଳକୁ ପ୍ରଭାବିତ କରିବ ବୋଲି ରାଜନୈତିକ ବିଶ୍ଳେଷକମାନେ ମତ ଦେଇଛନ୍ତି।
ଏ ସମ୍ପର୍କରେ ରାଜନୈତିକ ବିଶ୍ଳେଷକ ଶିବାଶିଷ ମହାନ୍ତି, ପ୍ରଶାନ୍ତ କୁମାର ନାୟକ, ମୀର ଅବୁ ଓବେଦା ପ୍ରମୁଖ କହିଛନ୍ତି, ଜୋନ ଅଞ୍ଚଳର ଅର୍ଥନୀତି କୃଷି ପର୍ଯ୍ୟବସିତ। ସ୍ଥାନୀୟ ସମସ୍ୟା ମଧ୍ୟରେ କ୍ଷେତକୁ ଜଳ ପରିଚାଳନା ମୁଖ୍ୟ ହୋଇଥିବା ବେଳେ ଗ୍ରାମ୍ୟ ରାସ୍ତା ନିର୍ମାଣରେ ବହୁ ଅନିୟମିତତା ଅଛି। ଏହାବ୍ୟତୀତ ସ୍ଥାନୀୟ ଅଞ୍ଚଳର ଐତିହ୍ୟ ସଂରକ୍ଷଣ ପ୍ରତି ପୂର୍ବରୁ କୌଣସି ସଫଳ ଉଦ୍ୟମ ହୋଇପାରିନାହିଁ। ଜୋନ ଅଞ୍ଚଳରେ ସିଏଚ୍ସି ହୋଇଛି। ତେବେ ସ୍ବାସ୍ଥ୍ୟସେବା ଭିତ୍ତିଭୂମିର ଉନ୍ନତିକୁ ପ୍ରାର୍ଥୀମାନେ ପ୍ରାଥମିକତା ଦେଇଛନ୍ତି। ୨୦୧୭ ପଞ୍ଚାୟତ ନିର୍ବାଚନରେ ଏହି ଜୋନରେ ଭାଜପାର ରେଶମୀ ଚକ୍ରବର୍ତ୍ତୀ ନିର୍ବାଚିତ ହୋଇଥିଲେ। ଦ୍ୱିତୀୟ ସ୍ଥାନରେ ବିଜେଡି ପ୍ରାର୍ଥୀ ଥିଲେ। ଚଳିତ ନିର୍ବାଚନରେ ଏହି ଜୋନ୍ ଅନୁସୂଚିତ ଜାତି ମହିଳାଙ୍କ ପାଇଁ ସଂରକ୍ଷିତ ହୋଇଛି। ରାଜ୍ୟର ୩ ପ୍ରମୁଖ ରାଜନୈତିକ ଦଳ ଏଠାରେ ପ୍ରାର୍ଥୀ ଦେଇଥିବାରୁ ପ୍ରତିଦ୍ୱନ୍ଦ୍ୱିତା ତୀବ୍ର ହେବ। ଭାଜପା ପୂର୍ବରୁ ଏଠାରେ ଜିତାପଟ ନେଇଥିବା ବେଳେ କଂଗ୍ରେସ ପ୍ରାର୍ଥୀଙ୍କର ରାଜନୈତିକ ଅଭିଜ୍ଞତା ଅଛି। ଅପରପକ୍ଷରେ ବିଜେଡି ଏଠାରେ ଶିକ୍ଷିତା ପ୍ରାର୍ଥୀ ଦେଇ ଗତ ନିର୍ବାଚନ ପରାଜୟକୁ ଭୁଲିବାକୁ ଚେଷ୍ଟା କରୁଛି। ଦଳୀୟ ନେତାମାନେ ମହିଳା ସଙ୍ଗଠନ ସହ ଯୋଗାଯୋଗରେ ରହିଛନ୍ତି। ଏଥିସହ ସ୍ଥାନୀୟ ସମସ୍ୟାର ସମାଧାନ ପାଇଁ ରଣନୀତି ପ୍ରସ୍ତୁତ କରିଛି। ହାତରେ ପ୍ରାୟ ୧୮ ଦିନ ଥିବାରୁ ୩ ପ୍ରାର୍ଥୀ ପ୍ରଚାରକୁ ଜୋରଦାର କରିଛନ୍ତି ବୋଲି ବିଶ୍ଳେଷକମାନେ ମତ ଦେଇଛନ୍ତି। ନିର୍ବାଚନରେ ଥିବା ୩ ପ୍ରାର୍ଥୀ ବିଜୟକୁ ନେଇ ଆଶାବାଦୀ ବୋଲି ମତ ଦେଇଛନ୍ତି।
