ଭୁବନେଶ୍ୱର (ସତ୍ୟଜିତ୍ ରାଉତ)/ଜଟଣୀ(ରବୀନ୍ଦ୍ରନାଥ ମହାକୁଡ଼),୨୯।୩:କମିଶନରେଟ୍ ପୋଲିସ ହାତରେ ଧରାପଡିଛନ୍ତି ୫ ଜଣିଆ ଡକାୟତି ଗ୍ୟାଙ୍ଗ। ବୁଧବାର ବିଳମ୍ବିତ ରାତିରେ ଡକାୟତି ଯୋଜନା ବେଳେ ଜଟଣୀ ପୋଲିସ ଟିମ୍ ଚଢ଼ାଉ କରି ଅଭିଯୁକ୍ତମାନଙ୍କୁ ଗିରଫ କରିଛି। ସେମାନେ ହେଲେ ଜଟଣୀ ଅଞ୍ଚଳର ଏମ୍ଡି ଅର୍ବାଜ୍ ଓରଫ ମଙ୍ଗୁଲୁ (୨୨), ସରିଫ୍ ଖାନ୍ ଓରଫ ଚିଣ୍ଟୁ (୨୦), ଦୀପ୍ତିରଞ୍ଜନ ଭୁଜବଳ ଓରଫ ପିଣ୍ଟୁ (୨୫), ଏସ୍କେ ଇସ୍ତାକ୍ ଅହମ୍ମଦ ଓରଫ ସାକିଲ୍ (୨୨) ଓ ସୁମନ୍ତ ପାତ୍ର ଓରଫ କାହ୍ନୁ (୨୯)। ସେମାନଙ୍କଠାରୁ ୫ଟି ବୋମା, ୩ଟି ବାଇକ, ଗୋଟିଏ ସ୍କର୍ପିଓ, ଖଣ୍ଡା, ଲୁହାରଡ ଓ ମୋବାଇଲ ଆଦି ଜବତ ହୋଇଛି। ଏନେଇ ଗୁରୁବାର ପୋଲିସ ଏକ ମାମଲା (ନଂ.୧୨୮/୨୦୨୪) ରୁଜୁ କରି ଅଭିଯୁକ୍ତମାନଙ୍କୁ କୋର୍ଟଚାଲାଣ କରିଥିଲା। ଜାମିନ ନ ମିଳିବାରୁ ସମସ୍ତଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଅଭିଯୁକ୍ତଙ୍କ ନାମରେ ଜଟଣୀ ସମେତ ବିଭିନ୍ନ ଥାନାରେ ବହୁ ମାମଲା ରହିଥିବା ଡିସିପି ପ୍ରତୀକ ସିଂ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ବୁଧବାର ବିଳମ୍ବିତ ରାତି ପ୍ରାୟ ୧ଟା ୧୦ରେ ବେଣାପଞ୍ଜରୀ ପଞ୍ଚାୟତ ଉଚ୍ଚ ବିଦ୍ୟାଳୟ ନିକଟ ଏକ ଶୂନ୍ଶାନ୍ ସ୍ଥାନରେ ଅଭିଯୁକ୍ତମାନେ ଏକତ୍ର ହୋଇ ଡକାୟତି ଯୋଜନା କରୁଥିଲେ। ଖୋର୍ଦ୍ଧା, ଜଟଣୀ, ପିପିଲି ଅଞ୍ଚଳରୁ ଆସୁଥିବା ମାଲ୍ ବୋଝେଇ ଟ୍ରକ୍କୁ ଅଟକାଇ ଡକାୟତି କରିବାକୁ ଆଲୋଚନା କରୁଥିଲେ। ଏନେଇ ଜଟଣୀ ଥାନା ଏସ୍ଆଇ ସସ୍ମିତା ସାହୁ ଖବର ପାଇ ପୋଲିସ ଟିମ୍ ସହ ଘଟଣାସ୍ଥଳରେ ଚଢ଼ାଉ କରିଥିଲେ। ପୋଲିସକୁ ଦେଖି ଅଭିଯୁକ୍ତମାନେ ଛତ୍ରଭଙ୍ଗ ଦେଇଥିଲେ। ହେଲେ ପୋଲିସ ଟିମ୍ ଘେରିଯାଇ ସମସ୍ତଙ୍କୁ କାବୁ କରିଥିଲେ।
