ଅନୁଗୋଳ,୪ା୮(ଅମିତ କୁମାର ସାମଲ): ଅନୁଗୋଳ ଜିଲାରେ ବର୍ଷା ବିପତ୍ତି ପରେ ବଢ଼ିଯାଇଛି ବିପନ୍ନଙ୍କ ଦୁଃଖ। ବିଶେଷକରି ଆଠମଲ୍ଲିକ ଓ ଟିକରପଡ଼ାର ବନ୍ୟା ବିପନ୍ନଙ୍କୁ ଉଦ୍ଧାର, ଥଇଥାନ ଉପରେ ଅଧିକ ଗୁରୁତ୍ୱ ଦିଆଯାଉଛି। ସେହିପରି ଜିଲାର ବିଭିନ୍ନ ବ୍ଲକ ଅଞ୍ଚଳରେ ପାଣି ଘେରରେ ଥିବା ଲୋକଙ୍କୁ ସହାୟତା ପ୍ରଦାନ କରାଯାଉଛି। ଇତିମଧ୍ୟରେ ପ୍ରାୟ ୫ଶହ ଲୋକଙ୍କୁ ଉଦ୍ଧାର କରାଯାଇ ଅସ୍ଥାୟୀ ଶିବିରରେ ଥଇଥାନ କରାଯାଇଛି। ସେହିପରି କେତେ ଘର ଭାଙ୍ଗିଛି, ଫସଲ କ୍ଷତିଗ୍ରସ୍ତ ହୋଇଛି ତାହାର ମଧ୍ୟ ଆକଳନ କରାଯାଉଛି। ସ୍ଥିତି ଉପରେ ସମ୍ପୂର୍ଣ୍ଣ ନଜର ରଖାଯାଇଥିବା ଜିଲା ପ୍ରଶାସନ ପକ୍ଷରୁ ସୂଚନା ପ୍ରଦାନ କରାଯାଇଛି।
ପ୍ରକାଶ ଯେ, ଲଗାଣ ବର୍ଷା ଯୋଗୁ ଅନୁଗୋଳ ସହର ସମେତ ଜିଲାର ବିଭିନ୍ନ ତଳି ଅଞ୍ଚଳରେ ଜଳାର୍ଣ୍ଣବ ପରିସ୍ଥିତି ସୃଷ୍ଟି ହୋଇଛି। ଏଥିସହ ମହାନଦୀର ଜଳସ୍ତର ବୃଦ୍ଧି ଯୋଗୁ ଆଠମଲ୍ଲିକ ଓ ଅନୁଗୋଳ ବ୍ଲକର ଅନେକ ଗଁା ସହ ଯୋଗାଯୋଗ ବିଚ୍ଛିହ୍ନ ହୋଇଯାଇଛି। ଆଠମଲ୍ଲିକର ମହାନଦୀ ଭିତରେ ଥିବା କୁଦଗାଁରୁ ଲୋକଙ୍କୁ ଉଦ୍ଧାର କରାଯାଉଛି। ଏହି ଉଦ୍ଧାର କାର୍ଯ୍ୟରେ ଏନ୍ଡିଆର୍ଏଫ ଓ ଓଡ୍ରାଫ୍ଟ ଏବଂ ଅଗ୍ନିଶମ ଟିମ୍କୁ ନିୟୋଜିତ କରାଯାଇଛି। ଟିକରପଡ଼ାଠାରେ ମହାନଦୀ ଫୁଲିଥିବାରୁ ବନ୍ୟାଜଳ ସ୍ଥାନୀୟ ଅଞ୍ଚଳବାସୀଙ୍କ ଘରେ ପଶିଯାଇଛି। ଫଳରେ ଟିକରପଡ଼ା ପଞ୍ଚାୟତର ୫ଟି ଗାଁର ଲୋକଙ୍କୁ ଉଦ୍ଧାର କରାଯାଇ ସ୍ଥାନୀୟ ପଞ୍ଚାୟତ ଉଚ୍ଚ ବିଦ୍ୟାଳୟ ଓ ଉଚ୍ଚ ପ୍ରାଥମିକ ବିଦ୍ୟାଳୟରେ ଥଇଥାନ କରାଯାଇଛି। ସେମାନଙ୍କୁ ରନ୍ଧା ଓ ଶୁଖିଲା ଖାଦ୍ୟ, ଟ୍ୟାଙ୍କର ପାଣି ପ୍ରଦାନ କରାଯାଉଛି। ଜିଲାରେ ପ୍ରାୟତଃ ୫ଶହ ଲୋକଙ୍କୁ ଖାଦ୍ୟ ପ୍ରଦାନ କରାଯାଇଥିବା ପ୍ରଶାସନ ପକ୍ଷରୁ କୁହାଯାଇଛି। ସେହିଭଳି ତାଳଚେର ଅଞ୍ଚଳରେ ମଧ୍ୟ କିଛି ଲୋକ ପାଣି ଘେରରେ ରହିଛନ୍ତି। ସେମାନଙ୍କ ନିକଟରେ ମଧ୍ୟ ରନ୍ଧା ଖାଦ୍ୟ ଓ ଶୁଖିଲା ଖାଦ୍ୟ ସ୍ଥାନୀୟ ଗୋଷ୍ଠୀ ଉନ୍ନୟନ ଅଧିକାରୀ ପହଞ୍ଚାଇଛନ୍ତି। ଅନ୍ୟପକ୍ଷରେ ଲଗାଣ ବର୍ଷା ଓ ବନ୍ୟା ଯୋଗୁ ଚାଷ କାର୍ଯ୍ୟ କ୍ଷତିଗ୍ରସ୍ତ ହୋଇଛି। ଚାଷ ଜମିରେ ପାଣି ଛିଡ଼ା ହୋଇ ରହିଥିବାରୁ ଚାଷୀକୁଳ ହତାଶ ହୋଇପଡ଼ିଛଛି। ଧାନ ଚାଷ କାର୍ଯ୍ୟ ବର୍ଷା ଅଭାବରୁ ବିଳମ୍ବରେ ଆରମ୍ଭ ହୋଇଥିବାବେଳେ ଏବେ ଲଗାଣ ବର୍ଷା ତାହାକୁ ଉଜାଡ଼ି ଦେଇଥିବା ଚାଷୀମାନେ ଅଭିଯୋଗ କରିଛନ୍ତି। ପନିପରିବା ଚାଷ କରିଥିବା ଚାଷୀମାନେ ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଛନ୍ତି। କେବଳ ଆଠମଲ୍ଲିକ ବ୍ଲକରେ ୧ ହଜାର ୨୦ ହେକ୍ଟର ଜମିରେ ଚାଷ କ୍ଷତିଗ୍ରସ୍ତ ହୋଇଥିବା ପ୍ରଶାସନ ପକ୍ଷରୁ ସୂଚନା ପ୍ରଦାନ କରାଯାଇଛି। ଅନ୍ୟ ବ୍ଲକରେ କ୍ଷୟକ୍ଷତି ଆକଳନ ଚାଲିଛି। ଜିଲାରେ ୫୬୩ଟି ଘର ଆଂଶିକ କ୍ଷତି ହୋଇଥିବା ପ୍ରାଥମିକ ରିପୋର୍ଟ ପ୍ରଶାସନର ହସ୍ତଗତ ହୋଇଛି। ସମ୍ପୂର୍ଣ୍ଣ ଭାବେ କେତେଘର ନଷ୍ଟ ହୋଇଛି ତାହାର ଆକଳନ କରାଯାଉଛି। ସନ୍ଧ୍ୟା ସୁଦ୍ଧା ଜିଲାରେ କ୍ଷତିଗ୍ରସ୍ତଙ୍କ ମଧ୍ୟରୁ ୩୪୫ ଜଣଙ୍କୁ ପଲିଥିନ ବଣ୍ଟନ କରାଯାଇଛି। ତେବେ ମହାନଦୀରେ ଜଳସ୍ତର ଖସୁଥିବାରୁ ପ୍ରଶାସନ ସାମାନ୍ୟ ଆଶ୍ୱସ୍ତ ପ୍ରକାଶ କରିଛି। ମାନଜୋର ଡ୍ୟାମ୍ର ଖୋଲିଥିବା ୬ଟି ଫାଟକ, ଡେରେଜାଙ୍ଗରେ ଖୋଲାଥିବା ୩ଟି ଫାଟକକୁ ବନ୍ଦ କରାଯାଇଥିବା ଜଳସେଚନ ବିଭାଗ ସୁପରିଣ୍ଟେଣ୍ଡେଣ୍ଟ ଇଞ୍ଜିନିୟର ସୁବ୍ରତ ନାୟକ ସୂଚନା ଦେଇଛନ୍ତି। ଟିକରପଡ଼ା ଅଞ୍ଚଳରେ ବନ୍ୟା ପରିସ୍ଥିତିରେ ନିୟନ୍ତ୍ରଣରେ ଥିବା ଅନୁଗୋଳ ଉପଜିଲାପାଳ ବରେଣ୍ୟନ୍ଦୁ ମହାନ୍ତି ସୂଚନା ଦେଇଛନ୍ତି। ସେ କହିଛନ୍ତି, ପରିସ୍ଥିତି ଉପରେ ସମ୍ପୂର୍ଣ୍ଣ ନଜର ରଖାଯାଇଛି। ଲୋକଙ୍କୁ ଶୁଖିଲା ଓ ରନ୍ଧାଖାଦ୍ୟ ପ୍ରଦାନ କରାଯାଉଛି। ଜଳବନ୍ଦୀରେ ଥିବା ଲୋକଙ୍କୁ ଜଙ୍ଗଲ ବିଭାଗର ବୋଟ୍ ସାହାଯ୍ୟରେ ଉଦ୍ଧାର କରାଯାଇଛି। ଆବଶ୍ୟକ ପଡ଼ିଲେ ଓଡ୍ରାଫ୍ଟ ଟିମ୍ର ସହଯୋଗ ଲୋଡ଼ାଯିବ। ଏଥିସହ ସ୍ବାସ୍ଥ୍ୟଗତ ସମସ୍ୟା ପାଇଁ ଫାର୍ମାସିଷ୍ଟ ଓ ଡାକ୍ତରୀ ଟିମ୍ ସେଠାରେ ଉପସ୍ଥିତ ରହିଛନ୍ତି।