ଭୁବନେଶ୍ୱର,୨୯ା୮(ବ୍ୟୁରୋ): ରାଜଧାନୀରେ ବଡ଼ ଧରଣର ବ୍ୟାଙ୍କ୍ ଠକେଇ ହୋଇଛି। ସୁଧମୂଳ ମିଶି ୫ କୋଟି ଟଙ୍କାକୁ ଆଦାୟ କରିବାକୁ ଯାଇ ବ୍ୟାଙ୍କ କର୍ତ୍ତୃପକ୍ଷ ହରଡ଼ଘଣାରେ ପଡିଛନ୍ତି। ଅଭିଯୁକ୍ତ ବନ୍ଧକ ରଖିଥିବା ପ୍ଲଟ୍ଗୁଡ଼ିକୁ ଜବତ ପାଇଁ ଯିବାବେଳେ ଅଧିକାରୀମାନେ ଖୋଜିଖୋଜି ନୟାନ୍ତ ହୋଇଛନ୍ତି। ୪ଟି ପ୍ଲଟ୍ରେ ଚନ୍ଦକାସ୍ଥିତ ଝୁମୁକା କେନାଲ ଯାଇଥିବାବେଳେ ବାକି ୨ଟି ପ୍ଲଟକୁ ବିକ୍ରି କରିଦିଆଯାଇଛି। ଶେଷରେ ଟଙ୍କା ଫେରି ପାଇବା ପାଇଁ ବ୍ୟାଙ୍କ୍ କର୍ତ୍ତୃପକ୍ଷ ଇଓଡବ୍ଲ୍ୟୁର ଦ୍ୱାରସ୍ଥ ହୋଇଛନ୍ତି। ବ୍ୟାଙ୍କ୍ ମ୍ୟାନେଜର ଅସୀତ କୁମାର ପାଢୀଙ୍କ ଅଭିଯୋଗ ଆଧାରରେ ଇଓଡବ୍ଲ୍ୟୁରେ ମାମଲା (ନଂ.୫/୨୦) ରୁଜୁ ହୋଇଛି। ଅଭିଯୁକ୍ତ ଓ ତାଙ୍କ ପରିବାର ସଦସ୍ୟ ଫେରାର ଥିବାରୁ ସେମାନଙ୍କୁ ଧରିବା ପାଇଁ ଇଓଡବ୍ଲ୍ୟୁ ଅଧିକାରୀମାନେ ଚଢ଼ାଉ ଆରମ୍ଭ କରିଥିବା ସୂଚନା ମିଳିଛି।
ଅଭିଯୋଗ ଅନୁସାରେ, ନରେନ୍ଦ୍ର କୁମାର ସାହୁ ନାମକ ଜଣେ ବ୍ୟକ୍ତିଙ୍କର ଡମଣା ଛକ ନିକଟରେ ଆର.କେ. ଟିମ୍ବର ଡିପୋ ରହିଛି। ଏଥିପାଇଁ ବିଭିନ୍ନ ମେଶିନ କିଣିବାକୁ ନରେନ୍ଦ୍ର ୨୦୦୯ ମେ’ ୧୧ରେ ଜନପଥରେ ଥିବା ଏକ ବ୍ୟାଙ୍କ୍ରେ ୮୦ଲକ୍ଷ ଟଙ୍କା ଲୋନ୍ ଆବେଦନ କରିଥିଲେ। ଲୋନ୍ ପାଇଁ ସ୍ତ୍ରୀ ଜୟନ୍ତୀ ସାହୁଙ୍କ ନାମରେ ଚନ୍ଦକାରେ ଥିବା ୬ଟି ପ୍ଲଟ୍କୁ ବନ୍ଧକ ରଖିବା ସହ ତାଙ୍କୁ ମଧ୍ୟ ଗ୍ୟାରେଣ୍ଟର୍ ରଖିଥିଲେ। ବ୍ୟାଙ୍କ୍ କର୍ତ୍ତୃପକ୍ଷ କାଗପତ୍ର ଯାଞ୍ଚ କରିବା ପରେ ମେ ୧୫ରେ ଲୋନ୍ ମଞ୍ଜୁର କରିଥିଲେ। ମେ ୨୦ରୁ ଜୁନ୍ ୨୩ ମଧ୍ୟରେ ବ୍ୟାଙ୍କ୍ ନରେନ୍ଦ୍ରଙ୍କୁ ସମସ୍ତ ଲୋନ୍ ଟଙ୍କା ପ୍ରଦାନ କରିଥିଲେ। ଟଙ୍କା ନେବାର ବର୍ଷକ ପରେ ମଧ୍ୟ ଚୁକ୍ତି ଅନୁଯାୟୀ ନରେନ୍ଦ୍ର ବ୍ୟାଙ୍କ୍କୁ କିସ୍ତି ଟଙ୍କା ଦେଇ ନ ଥିଲେ। ବ୍ୟାଙ୍କ୍ ତାଙ୍କୁ ନୋଟିସ କରିଥିଲେ ମଧ୍ୟ ସେ ଏହାର ଉତ୍ତର ଦେଇ ନ ଥିଲେ। ଶେଷରେ ବ୍ୟାଙ୍କ୍ ଉକ୍ତ ଲୋନ୍କୁ ଏମ୍ପିଏ ଘୋଷଣା କରିବା ସହ ୨୦୧୨ରେ ଟ୍ରିବ୍ୟୁନାଲକୁ ଯାଇଥିଲା। ଉକ୍ତ ଲୋନ୍ ଏଗ୍ରିମେଣ୍ଟକୁ ପରଖିବା ପରେ ଟ୍ରିବ୍ୟୁନାଲ ନରେନ୍ଦ୍ର ବନ୍ଧକ ରଖିଥିବା ଜମିକୁ ନିଜ ହେପାଜତକୁ ଆଣି ନିଲାମ କରି ଟଙ୍କା ପରିଶୋଧ କରିବାକୁ ନିର୍ଦ୍ଦେଶ ଦେଇଥିଲେ। ଏହାପରେ ବ୍ୟାଙ୍କ୍ କର୍ତ୍ତୃପକ୍ଷ ସେସବୁ ଜମିକୁ ନିଜ ହେପାଜତକୁ ନେବା ପାଇଁ ଜଣେ ବରିଷ୍ଠ ଆଇନଜୀବୀଙ୍କୁ ନିଯୁକ୍ତ କରିଥିଲେ। ଆଇନଜୀବୀ ଜଣକ ଜମି ଜବତ ପାଇଁ ଚନ୍ଦକା ଯାଇ ଯାହା ଦେଖିଲେ ତାହା ତାଙ୍କୁ ଚକିତ କରିଦେଇଥିଲା। ବନ୍ଧକ ଜମିର ୪ଟି ପ୍ଲଟରେ ଝୁମୁକା କେନାଲ ଯାଇଥିଲା। ସେସବୁ ଜମିର କାଗଜପତ୍ର ଯାଞ୍ଚବେଳେ ଜଣାପଡିଛି ଯେ, ନରେନ୍ଦ୍ର ଉକ୍ତ ୪ ପ୍ଲଟ୍କୁ ଝୁମୁକା କେନାଲ ପାଇଁ ସରକାରଙ୍କୁ ଦେଇ ଟଙ୍କା ପାଇଛନ୍ତି। ବାକି ୨ଟି ପ୍ଲଟକୁ ନରେନ୍ଦ୍ର ୨୦୧୧ ଅକ୍ଟୋବରରେ ବିକ୍ରି କରିଦେଇଥିବା ଜଣାପଡିଛି।
