ସିନାପାଲି,୯।୨(ଡି.ଏନ.ଏ.): ନୂଆପଡ଼ା ଜିଲା ସିନାପାଲି ବ୍ଲକ ଅନ୍ତର୍ଗତ ଭରୁଆମୁଣ୍ଡା ପଞ୍ଚାୟତ ବରପଦର ପ୍ରାଥମିକ ବିଦ୍ୟାଳୟ ଅବ୍ୟବସ୍ଥାରେ ଗତି କରୁଛି। ବିଦ୍ୟାଳୟରେ ୨ଟି ଶ୍ରେଣୀ ଗୃହରେ ବର୍ତ୍ତମାନ ୫ଟି ଶ୍ରେଣୀର ପ୍ରାୟ ୭୧ଜଣ ଛାତ୍ରୀଛାତ୍ର ପାଠପଢ଼ୁଥିବା ଜଣାପଡିଛି। ବିଦ୍ୟାଳୟରେ ରୋଷେଇ ଗୃହ ନ ଥିବା ବେଳେ ପାନୀୟ ଜଳ ଅସୁବିଧା ଦେଖାଦେଇଛି। ପ୍ରାପ୍ତ ଖବର ଅନୁସାରେ ୧୯୭୫ରେ ବିଦ୍ୟାଳୟ ସ୍ଥାପିତ ହୋଇଛି। ପ୍ରଥମରୁ ପଞ୍ଚମ ଯାଏ ମୋଟ ୭୧ଜଣ ଛାତ୍ରୀଛାତ୍ରଙ୍କ ପାଇଁ ୩ଜଣ ଶିକ୍ଷକ ରହିଛନ୍ତି। ୫ଟି ଶ୍ରେଣୀ ଛାତ୍ରୀଛାତ୍ରଙ୍କ ପାଇଁ ରହିଥିବା ୨ଟି କକ୍ଷରେ ଶିକ୍ଷାଦାନ ସମ୍ଭବ ହୋଇପାରୁ ନାହିଁ। ସେହିପରି ମଧ୍ୟାହ୍ନ ଭୋଜନ ପ୍ରସ୍ତୁତ ପାଇଁ ରୋଷେଇ ଗୃହ ନ ଥିବା ବେଳେ ପାନୀୟଜଳ ଘୋର ସମସ୍ୟା ଦେଖାଦେଇଛି। ଗତ ୨ବର୍ଷ ପୂର୍ବେ ବିଦ୍ୟାଳୟର ନଳକୂପରେ ମୋଟର ସଂଯୋଗ କରି ସୋଲାର ମାଧ୍ୟମରେ ଜଳ ଯୋଗାଇ ଦିଆଯିବା ପାଇଁ ପ୍ରଶାସନ ପକ୍ଷରୁ ବ୍ୟବସ୍ଥା କରାଯାଇଥିଲ। କିନ୍ତୁ କିଛି ଦିନ ପରେ ସୋଲାର ପ୍ଲେଟ ଚୋରି ହୋଇଯାଇଥିଲା। ଫଳରେ ଛାତ୍ରୀଛାତ୍ରଙ୍କ ପାଇଁ ପାନୀୟଜଳ ଯୋଗାଣ ବନ୍ଦ ହୋଇଛି। ନିକଟସ୍ଥ ଏକ ନଳକୂପରୁ ପାଣି ଆଣି ବ୍ୟବହାର କରାଯାଇଛି। ପୁଣି ସ୍ଥାନୀୟ ଏମଇ ସ୍କୁଲ ଛାତ୍ରୀଛାତ୍ରମାନେ ମଧ୍ୟ ଏହି ନଳକୂପରେ ନିର୍ଭର କରିଥାନ୍ତି। ଏ ସମସ୍ୟା ନେଇ ସ୍ଥାନୀୟ ବିଦ୍ୟାଳୟ କର୍ତ୍ତୃପକ୍ଷ ବାରମ୍ବାର ବିଭାଗୀୟ ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ ହେଁ କୌଣସି ସୁଫଳ ମିଳି ନ ଥିବା ପ୍ରକାଶ କରିଛନ୍ତି। ସୋଲାର ପ୍ଲେଟ ଚୋରି ନେଇ ସିନାପାଲି ଥାନାରେ ଏତଲା ଦିଆଯାଇଥିବା ପ୍ରଧାନ ଶିକ୍ଷକ ଧବଲସିଙ୍ଗ ମାଝି କହିଛନ୍ତି। ହେଲେ ତାର ମଧ୍ୟ କୌଣସି ସୁଫଳ ମିଳିିନାହିଁ। ବିଦ୍ୟାଳୟ ସମସ୍ୟା ନେଇ ବାରମ୍ବାର ପ୍ରଶାସନ ନିକଟରେ ଦାବି କରି ଆସୁଥିଲେ ବି କୌଣସି ସୁଫଳ ମିଳି ନ ଥିବା ବିଦ୍ୟାଳୟ ଚେୟାରମ୍ୟାନ ପୀତାମ୍ବର ଛତ୍ରିଆ କହିଛନ୍ତି। ଆଗାମୀ ଦିନରେ ସମସ୍ୟା ସମାଧାନ ନ ହେଲେ ଆନ୍ଦୋଳନାତ୍ମକପନ୍ଥା ଗ୍ରହଣ କରିବାକୁ ବାଧ୍ୟ ହେବୁ ବୋଲି ଚେୟାରମ୍ୟାନ କହିଛନ୍ତି। ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେଇ ତୁରନ୍ତ ଆବଶ୍ୟକ ପଦକ୍ଷେପ ନେବାକୁ ଦାବି କରିଛନ୍ତି।
