ବଡ଼ବିଲ,୧୭।୫(ସ୍ବ.ପ୍ର.): କେନ୍ଦୁଝର ଜିଲା ବଡ଼ବିଲ ଥାନାଞ୍ଚଳ ଏକ ପାର୍କିଂରୁ ହାଇଓ୍ବା ଟ୍ରକ ସହ ଚାଳକଙ୍କୁ ଅପହରଣ କରାଯିବା ସହ ମାଡ଼ମାରି ତାଙ୍କ ମୋବାଇଲ ଏବଂ ନଗଦ ୭ ହଜାର ଟଙ୍କା ଲୁଟ୍ ହୋଇଥିଲା। ତେବେ ପୋଲିସ ହାଇଓ୍ବାକୁ ଉଦ୍ଧାର କରିିବା ସହ ସୋମବାର ୫ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଥିବା ଜଣାପଡ଼ିଛି। ଗିରଫ ଅଭିଯୁକ୍ତମାନେ ହେଲେ ବଡ଼ବିଲ ଦାମୁ ହଟିଂ ଅଞ୍ଚଳର ମୁନା ଓରଫ୍ ମହେନ୍ଦ୍ର ମହାକୁଡ, ରାଜୁ ଦାସ ଓ ରୋହିତ ସିଂହ ଏବଂ ବଡ଼ବିଲ ପ୍ରେମ ନଗରସ୍ଥିତ ନିଉ ମାର୍କେଟ କଲୋନୀ ଅଞ୍ଚଳର ରାହୁଲ ମହାନ୍ତ ଓ ଆକାଶ କାରୁଆ।
ବଡ଼ବିଲ ଥାନାରେ ରୁଜୁ ହୋଇଥିବା କେସ୍ ନଂ. ୭୫/୨୧ ଅନୁଯାୟୀ, ପଞ୍ଚବଟୀ ଏନକ୍ଲେଭ୍ରେ ରହୁଥିବା ବିଜୟ ଜୈନଙ୍କ ଓଡି ୧୪ କ୍ୟୁ ୮୨୪୪ ନମ୍ବର ବିଶିଷ୍ଟ ହାଇଓ୍ବା ଟ୍ରକ ନେଇ ଚାଳକ ଟି.କେ.ବେଡିନ ଶନିବାର ରାତିରେ ବଡ଼ବିଲ ରେଳ ସାଇଡିଂରେ ଲୁହାପଥର ଅନଲୋଡ୍ କରିଥିଲେ। ଏହାପରେ ବେଡିନ ହାଇଓ୍ବାଟିକୁ ପାର୍କିଂରେ ରଖି ରାତି ୧୨ଟା ବେଳେ ଏକ ହୋଟେଲକୁ ଖାଇବାକୁ ଯାଇଥିଲେ। ସେଠାରୁ ଗାଡ଼ି ପାଖରେ ପହଞ୍ଚି ଦେଖିଲା ବେଳକୁ ୩/୪ ଜଣ ଅଜଣା ଦୁର୍ବୃତ୍ତ ମାରଣାସ୍ତ୍ର ଧରି ଠିଆ ହୋଇଛନ୍ତି। ତାଙ୍କୁ ଭୟଭୀତ କରି ଜଙ୍ଗଲ ଆଡ଼କୁ ନେଇଯାଇଥିଲେ। କିଛିଦୂର ଯିବା ପରେ ବେଡିନଙ୍କୁ ମାଡ଼ ମାରିବା ସହ ତାଙ୍କ ଠାରୁ ମୋବାଇଲ ଓ ନଗଦ ୭ ହଜାର ୮ଟଙ୍କା ଲୁଟି ନେଇ ତାଙ୍କୁ ଗାଡିରୁ ଓହ୍ଲାଇ ଦେଇଥିଲେ। ଏ ସମ୍ପର୍କରେ ବେଡିନ ହାଇଓ୍ବା ମାଲିକଙ୍କୁ ଜଣାଇଥିଲେ। ତେବେ ମାଲିକ ବିଜୟ ରବିବାର ପୂର୍ବାହ୍ନରେ ବଡ଼ବିଲ ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗକୁ ଆଧାର କରି ପୋଲିସ ଛାନଭିନ ଆରମ୍ଭ କରିଥିଲା। କୌଣସି ସୂତ୍ରରୁ ଖବର ପାଇ ପୋଲିସ ଶଙ୍ଖଝର ଜଙ୍ଗଲ ରାସ୍ତାରେ ଛିଡା ହୋଇଥିବା ହାଇଓ୍ବା ଟ୍ରକଟିକୁ ଉଦ୍ଧାର କରିବା ସହ ନିକଟସ୍ଥ ଜଙ୍ଗଲରେ ଲୁଚି ରହିଥିବା ୫ ଅଭିଯୁକ୍ତଙ୍କୁ ଗିରଫ କରିବାରେ ସକ୍ଷମ ହୋଇଥିଲା। ବଡ଼ବିଲ ଥାନା ଆଇଆଇସି ସୁଶାନ୍ତ ଦାଶ କହିଛନ୍ତି, ଏହି ଘଟଣାରେ ଆହୁରି ଜଣେ ଅଭିଯୁକ୍ତ ଫେରାର ଅଛନ୍ତି ଓ ତାଙ୍କ ନିକଟରେ ଚାଳକଙ୍କ ଠାରୁ ଲୁଟ୍ ହୋଇଥିବା ମୋବାଇଲ ରହିଥିବା ତଦନ୍ତରୁ ଜଣାପଡ଼ିଛି।
