ହାଟଡ଼ିହୀ,୧୧l୯ (ଶୁଭକାନ୍ତ ନାୟକ):କେନ୍ଦୁଝର ଜିଲା ହାଟଡ଼ିହୀ ବ୍ଲକ୍ କୁଆଡ଼ ପ୍ରାଥମିକ ବିଦ୍ୟାଳୟ ଦୟନୀୟ ଅବସ୍ଥା ଦେଇ ଗତି କରୁଛି। ଗୋଟିଏ ଶ୍ରେଣୀ କକ୍ଷରେ ଶିଶୁ ବାଟିକାରୁ ୫ମ ଶ୍ରେଣୀ ପର୍ଯ୍ୟନ୍ତ ପିଲା ପଢ଼ୁଛନ୍ତି। ଏପରିକି ଉକ୍ତ କୋଠରିରେ ବିଦ୍ୟାଳୟର କାର୍ଯ୍ୟାଳୟ କାମ ମଧ୍ୟ ଚାଲୁଛି। ବିଦ୍ୟାଳୟର ପାଚେରି, ଶୌଚାଳୟ ନ ଥିବାରୁ ପିଲାଙ୍କ ସ୍ବାସ୍ଥ୍ୟ ଓ ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏହି ସମସ୍ୟା ନେଇ ପଞ୍ଚାୟତ, ବ୍ଲକ୍, ଜିଲା ପ୍ରଶାସନକୁ ଅବଗତ କରାଯାଇଥିଲେ ହେଁ କୌଣସି ସୁବିଧା କରାଯାଉ ନ ଥିବାରୁ ଅଭିଭାବକ ମହଲରେ ଅସନ୍ତୋଷ ପ୍ରକାଶ ପାଉଛି।
ପ୍ରକାଶ ଯେ, ୧୯୭୯ରେ ସ୍ଥାପିତ ଉକ୍ତ ବିଦ୍ୟାଳୟରେ ଶିଶୁବାଟିକାରୁ ୫ମ ଶ୍ରେଣୀ ପର୍ଯ୍ୟନ୍ତ ପୂର୍ବରୁ ୬୦ ପିଲା ପଢ଼ୁଥିଲେ। ହେଲେ ବିଦ୍ୟାଳୟରେ ବିଭିନ୍ନ ଅବ୍ୟବସ୍ଥା କାରଣରୁ ପିଲାଙ୍କ ସଂଖ୍ୟା ହ୍ରାସ ପାଇ ଏବେ ୨୬ ଜଣରେ ସୀମିତ ହେଲାଣି। ଏଠାରେ ଗୋଟିଏ ମାତ୍ର କୋଠରି ଥିବାବେଳେ ସେଥିରେ କାର୍ଯ୍ୟାଳୟ ସହ ସମସ୍ତ ପିଲାଙ୍କୁ ବସାଇ ପଢ଼ାଯାଉଛି। ଶିକ୍ଷାଦାନ ପାଇଁ ଜଣେ ଶିକ୍ଷୟିତ୍ରୀ ଏବଂ ଜଣେ ଶିକ୍ଷକ ନିଯୁକ୍ତ ଅଛନ୍ତି। ଏକ ସଙ୍ଗେ ୨ ଜଣ ଶିକ୍ଷୟିତ୍ରୀଶିକ୍ଷକ ଗୋଟିଏ ଗୃହରେ ଶିକ୍ଷାଦାନ କରୁଥିବାରୁ କିଏ କେଉଁ ଶ୍ରେଣୀର ପିଲାଙ୍କୁ ପାଠ ପଢ଼ାଉଛନ୍ତି, ପିଲାମାନେ କାହା ପାଠ ଶୁଣି କ’ଣ ବୁଝୁଛନ୍ତି, ତାହା ସମସ୍ତଙ୍କୁ ଆଶ୍ଚର୍ଯ୍ୟ କରୁଛି। ବିଶେଷକରି ପାଠପଢ଼ାରେ ବ୍ୟାଘାତ ଘଟୁଛି। ଗୃହରୁ ମଧ୍ୟ ପାଣି ଗଳୁଥିବାରୁ ବର୍ଷାଦିନରେ ବହୁ ସମସ୍ୟା ହେଉଛି। ପୁରୁଣା ଶୌଚାଳୟ ଭାଙ୍ଗିଯାଇଥିବା ବେଳେ ୨୦୧୯ରୁ ଏଠାରେ ଶୌଚାଳୟ ନ ଥିବାରୁ ପିଲାମାନେ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଛନ୍ତି। ବିଶେଷକରି ଝିଅପିଲାମାନେ ଏଥିପାଇଁ ଅତ୍ୟନ୍ତ ଅସୁବିଧାର ସମ୍ମୁଖୀନ ହେଉଛନ୍ତି। କେତେଜଣ ଶୌଚାଳୟ ନ ଥିବାରୁ ବିଦ୍ୟାଳୟ ଆସିବାକୁ ରାଜି ହେଉନାହାନ୍ତି। ପିଲାଙ୍କ ସହ ଶିକ୍ଷୟିତ୍ରୀଶିକ୍ଷକ ବାଧ୍ୟହୋଇ ଖୋଲା ପଡ଼ିଆକୁ ଯାଉଛନ୍ତି। ବିଦ୍ୟାଳୟ ଚାରିପଟେ ପାଚେରି ନ ଥିବାରୁ ପରିସର ସମ୍ପୂର୍ଣ୍ଣ ମୁକୁଳା ପଡ଼ିଛି। ଯେକେହି ବି ଯେତେବେଳେ ଚାହିଁଲେ ବିଦ୍ୟାଳୟ ଭିତରକୁ ପଶି ଆସୁଥିବାବେଳେ ଗୋରୁ, କୁକୁର, ଛେଳି ମଧ୍ୟ ପଶି ଆସୁଛନ୍ତି। ବିଦ୍ୟାଳୟର ନାମ ଲେଖାଥିବା ପ୍ରବେଶ ଫାଟକ ନାହିଁ। ଏଭଳି ସ୍ଥିତିରେ ୨୬ ଜଣ କୁନି ପିଲାଙ୍କ ସୁରକ୍ଷାକୁ ନେଇ ପ୍ରଶ୍ନ ଉଠୁଛି। ଗତ ୫ ବର୍ଷରୁ ଊର୍ଦ୍ଧ୍ୱ ହେବ ବିଦ୍ୟାଳୟକୁ କୌଣସି ପ୍ରକାର ସରକାରୀ ଅନୁଦାନ ମିଳିନାହିଁ। ବିଦ୍ୟାଳୟ କମିଟି ତରଫରୁ ବାରମ୍ବାର ବ୍ଲକ୍ ଶିକ୍ଷା ଅଧିକାରୀ, ଜିଲା ଶିକ୍ଷା ଅଧିକାରୀ, ଜିଲାପାଳଙ୍କୁ ଅବଗତ କରାଯାଇଛି। ହେଲେ ଅଦ୍ୟାବଧି କିଛି ଫଳ ମିଳିନାହିଁ। ସ୍ଥାନୀୟ ସମଣା ସରପଞ୍ଚ ନିଜେ ଏକ ଶୌଚାଳୟ ନିର୍ମାଣ ପାଇଁ ଲିଖିତ ଭାବେ ପ୍ରଧାନ ଶିକ୍ଷୟିତ୍ରୀଙ୍କୁ ଜଣାଇଥିଲେ ମଧ୍ୟ ଏଯାବତ୍ ତାହା ଫାଇଲ ତଳେ ଚାପିି ହୋଇରହିଯାଇଛି।
ପ୍ରଧାନ ଶିକ୍ଷୟିତ୍ରୀ ପ୍ରତିଭା ପରିଡ଼ା କହିଛନ୍ତି, ବିଦ୍ୟାଳୟର ମାତ୍ର ଗୋଟିଏ ଗୃହରେ ଅଫିସ୍ ଏବଂ ଶିଶୁବାଟିକାରୁ ୫ମ ଶ୍ରେଣୀ ପର୍ଯ୍ୟନ୍ତ ପିଲା ପଢୁଛନ୍ତି। ବିଦ୍ୟାଳୟ ପାଇଁ ପାଚେରି, ଶୌଚାଳୟ, ଶ୍ରେଣୀଗୃହର ଆବଶ୍ୟକତା ରହିଛି ବୋଲି କହିଛନ୍ତି। ଅଭିଭାବକ ରଞ୍ଜନ ଜେନା କହିଛନ୍ତି, ସରକାରୀ ବିଦ୍ୟାଳୟର ଏଭଳି ଅବସ୍ଥା ହେଲେ ଆମ ପିଲା କେମିତି ପାଠ ପଢ଼ିବେ। ବିଦ୍ୟାଳୟ ପରିଚାଳନା କମିଟି ସଭାପତି ଜୟଦେବ ଜେନା କହିଛନ୍ତି, ବିଦ୍ୟାଳୟରେ ଶ୍ରେଣୀ ଗୃହ, ପାଚେରି, ଶୌଚାଳୟ, ସୌନ୍ଦର୍ଯ୍ୟକରଣ ପରି ଗୁରୁତର ସମସ୍ୟା ଯୋଗୁ ଛାତ୍ରୀଛାତ୍ରଙ୍କ ସଂଖ୍ୟା କମୁଛି। ବିଦ୍ୟାଳୟରେ ଅବ୍ୟବସ୍ଥା କାରଣରୁ ଅନ୍ୟ ଗ୍ରାମରୁ ପୂର୍ବରୁ ପଢ଼ିବାକୁ ଆସୁଥିବା ଛାତ୍ରୀଛାତ୍ର ଏବେ ଏଠାରୁ ପ୍ରାୟ ୨ରୁ ୩ କି.ମି. ଦୂରରେ ଥିବା ଗୋବିନ୍ଦପୁର, ଢ଼ାଇପୋଖରୀ, ମରୁଆ, ସରିଦା ପ୍ରଭୃତି ଗ୍ରାମରେ ଥିବା ବିଦ୍ୟାଳୟକୁ ଯାଉଛନ୍ତି। ବିଦ୍ୟାଳୟ ସମସ୍ୟା ନେଇ ବ୍ଲକ୍ ପ୍ରଶାସନଠାରୁ ଆରମ୍ଭକରି ଜିଲା ପ୍ରଶାସନ ପର୍ଯ୍ୟନ୍ତ ଦୀର୍ଘ ବର୍ଷ ହେବ ଦୃଷ୍ଟି ଆକର୍ଷଣ କଲେ ମଧ୍ୟ ସମସ୍ୟା ଦୂର ହୋଇପାରିଲାନାହିଁ। ବିଶେଷକରି ବିଦ୍ୟାଳୟକୁ କୌଣସି ସହାୟତା ମିଳୁ ନ ଥିବାରୁ ଏହାର ସ୍ଥିତି ସୁଧୁରି ପାରୁ ନାହିଁ ବୋଲି ଜେନା କହିଛନ୍ତି। ସେହିପରି ସମଣା ସରପଞ୍ଚ ଜଗବନ୍ଧୁ କାଣ୍ଡି କହିଛନ୍ତି, ଶୌଚାଳୟ ନିର୍ମାଣ ପାଇଁ ଦେଇଥିବା ଲିଖିତ ପ୍ରତିଶ୍ରୁତି ଅନୁସାରେ ଅନୁଦାନ ଅନୁମୋଦନ ହୋଇ ବ୍ୟୟ ବରାଦ ସରିଛି। ସମସ୍ୟା ଥିବାରୁ ଶୌଚାଳୟ ନିର୍ମାଣ ହୋଇପାରିନାହିଁ। ହାଟଡ଼ିହି ଏବିଇଓ ପ୍ରମୋଦ କୁମାର ନାୟକ କହିଛନ୍ତି, ବିଦ୍ୟାଳୟ ସମସ୍ୟା ବାବଦରେ ଅବଗତ ଅଛନ୍ତି। ଏହାର ସୁଧାର ଆଣିବା ପାଇଁ ପଦକ୍ଷେପ ନିଆଯାଉଛି।