ଆସିକା,୨୦ା୧୦(ଡି.ଏନ୍.ଏ.): ଗଞ୍ଜାମ ଜିଲା ଆସିକା ଥାନା ଅଧୀନ ନଳବଣ୍ଟା ଗ୍ରାମରେ ଚାଲିଥିବା ବେଆଇନ ବାଣ କାରଖାନା ଉପରେ ପୋଲିସ ଗୁରୁବାର ଚଢ଼ାଉ କରିଥିଲା । ପୋଲିସ ସେଠାରୁ ବିଭିନ୍ନ ପ୍ରକାରର ପ୍ରାୟ ୪୫ ଲକ୍ଷ ଟଙ୍କାର ବାଣ ସହ ଏକ ପିକ୍ଅପ ଭ୍ୟାନ ଜବତ କରିଛି। ବାଣ କିଣି ଆଣିବାକୁ ଯାଇଥିବା ଜଣଙ୍କୁ ପୋଲିସ ଗିରଫ କରଛି। ସେ ହେଲେ କଟକ ଜିଲା ତିଗିରିଆର ହୃଦାନନ୍ଦ ନାୟକ।
ପୋଲିସ ନଳବଣ୍ଟା ଗ୍ରାମର ବିଭିନ୍ନ ସାହିରେ ଚାଲିଥିବା ପ୍ରାୟ ୨୫ରୁ ଉର୍ଦ୍ଧ୍ୱ ଛୋଟବଡ ବାଣ ପ୍ରସ୍ତୁତି କାରଖାନା ଉପରେ ଚଢାଉ କରାଯାଇଛି। ପିକ୍ଅପରେ ଏଠାରୁ ବାଣ ଅନ୍ୟତ୍ର ଯିବା ଲାଗି ବୋଝେଇ ହେଉଥିଲା ବେଳେ ୧୦ରୁ ଉର୍ଦ୍ଧ୍ୱ ବାଣ କାରଖାନା ମାଲିକ ଫେରାର ହୋଇଯାଇଛନ୍ତି। ଆସିକା ଏସ୍ଡିପିଓ ଉମାଶଙ୍କର ସିଂଙ୍କ ନେତୃତ୍ୱରେ ହୋଇଥିବା ଏହି ଚଢାଉରେ ଆସିକା ଥାନା ଅଧିକାରୀ ପ୍ରଶାନ୍ତ କୁମାର ସାହୁ ଓ ଅନ୍ୟ ଅଧିକାରୀଙ୍କ ସହ ୨ ପ୍ଲାଟୁନ ସଶସ୍ତ୍ର ପୋଲିସ ସାମିଲ ଥିଲେ। ଆସିକା ତହସିଲଦାର ସଞ୍ଜୟ କୁମାର ସାମନ୍ତରାୟ ମାଜିଷ୍ଟ୍ରେଟ ଦାୟିତ୍ୱ ତୁଲାଇଥିଲେ।
ଗଞ୍ଜାମ ଜିଲାର ଶିବକାଶୀ କୁହାଯାଉଥିବା ନଳବଣ୍ଟା ଗ୍ରାମରେ କେଉଁ ଆବହନମାନ କାଳରୁ ବାଣ ପ୍ରସ୍ତୁତି ଚାଲିଆସୁଛି । ବ୍ୟବସାୟ ଉଦ୍ଦେଶ୍ୟରେ ଗ୍ରାମର କେତେଜଣ ବ୍ୟକ୍ତି ଏହି କାରବାର ଚଳାଉଥିବା ବେଳେ ବିପଦପୂର୍ଣ୍ଣ କାର୍ଯ୍ୟରେ ବହୁ ପରିବାରର ଛୋଟ ବଡ ସଦସ୍ୟ ନିୟୋଜିତ ହେଉଛନ୍ତି। ଉଚ୍ଚ ଶବ୍ଦ ହେଉଥିବା ବାଣ ଲାଗି ନଳବଣ୍ଟାର ଏକ ସ୍ବତନ୍ତ୍ର ପରିଚୟ ରହିଛି। ବର୍ଷତମାମ ଜିଲା ତଥା ଜିଲା ବାହାରକୁ ଏଠାରୁ ରୀତିମତ ବାଣ ଚାଲାଣ ହେଉଛି। ବାଣ ପ୍ରସ୍ତୁତି ବେଳେ ଏହି ଗ୍ରାମରେ ବିସ୍ପୋରଣ ଘଟି ପୂର୍ବରୁ ବହୁ ଧନଜୀବନ ହାନି ହୋଇଛି।
