ବଇଣ୍ଡା, ୧୩।୫ (ଡି.ଏନ.ଏ.): ଅନୁଗୋଳ ଜିଲା ଆଠମଲ୍ଲିକ ଉପଖଣ୍ଡର ପ୍ରସିଦ୍ଧ ବଇଣ୍ଡା ଚନ୍ଦନ ଯାତ୍ରା ଗୁରୁବାର ଠାରୁ ଆରମ୍ଭ ହୋଇଛି। ୪୬ ବର୍ଷରେ ପହଞ୍ଚିଥିବା ଏହି ଯାତ୍ରା ବେଶ୍ ଧୁମ୍ଧାମରେ ପାଳନ କରାଯାଉଛି। ଯାତ୍ରା କମିଟି ପକ୍ଷରୁ ଆୟୋଜିତ ଏହି ଯାତ୍ରାରେ ଚଳିତ ବର୍ଷ ୪୦ ହଜାରରୁ ଅଧିକ ଲୋକଙ୍କ ସମାଗମ ହୋଇଛି। ପ୍ରଥମେ ପ୍ରଭୁ ରାଧାକୃଷ୍ଣଙ୍କୁ ସୁସଜ୍ଜିତ ବିମାନରେ ବସାଇ ରାଧାକୃଷ୍ଣ ମନ୍ଦିରରୁ ଯାତ୍ରା ପଡିଆକୁ ଅଣା ଯାଇଥିଲା। ସେଠାରେ ଯଥାରୀତିରେ ପୂଜା କରାଯିବା ପରେ ଚନ୍ଦନନଗରକୁ ନିଆଯାଇଥିଲା। ରାତି ୧ଟା ବେଳେ ଏକ ବିରାଟ ଶୋଭାଯାତ୍ରାରେ ସେଠାରୁ ଅଣାଯାଇ ଗ୍ରାମ ପରିକ୍ରମା କରାଯାଇଥିଲା। ବାଜା, ବାଣ ସହ ସାଉଣ୍ଡର ତାଳେ ତାଳେ ପ୍ରଭୁଙ୍କୁ ନଗର ପରିକ୍ରମା କରାଯାଇଥିଲା। ଶୋଭାଯାତ୍ରାରେ ଲଉଡି ଖେଳ, ଘୋଡାନାଚ, ଘଣ୍ଟବାଦ୍ୟ ପରିବେଷଣ ହୋଇଥିଲା। ପରେ ପ୍ରଭୁଙ୍କୁ ଗ୍ରାମ ଚନ୍ଦନ ପୋଖରୀକୁ ନିଆଯାଇ ନୌକା ବିହାର କରାଯାଇଥିଲା। ଏଥିସହ ଆତସବାଜି ପ୍ରଦର୍ଶନ କରାଯାଇଥିଲା। ଯାତ୍ରା ପଡିଆରେ ବିଭିନ୍ନ ପ୍ରକାର ଦୋଳି ପଡିଥିବା ବେଳେ ମିନା ବଜାରରେ ପ୍ରବଳ ଭିଡ଼ ଜମୁଛି। ଉପଖଣ୍ଡରେ ଏହି ଯାତ୍ରା ସ୍ବତନ୍ତ୍ର ପରିଚୟ ସୃଷ୍ଟି କରିଥିବା ବେଳେ ବହୁ ଜନସମାଗମ ହେଉଛି। ଏପରିକି ଯାତ୍ରା ପଡିଆରେ ନାହିଁ ନ ଥିବା ଭିଡ଼ ଦେଖିବାକୁ ମିଳୁଛି। ବଇଣ୍ଡା ଛକ ଆଲୋକମାଳାରେ ଝଲସିଉଠୁଛି। ଦର୍ଶକଙ୍କ ମନୋରଞ୍ଜନ ପାଇଁ ୨ଟି ସ୍ଥାନରେ ମେଲୋଡି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ବଇଣ୍ଡା ସାମ୍ବାଦିକ ସଂଘ ପକ୍ଷରୁ ପାନୀୟ ଜଳ ବ୍ୟବସ୍ଥା କରାଯାଇଥିବା ବେଳେ ସୂଚନା ଭବନ ଖୋଲାଯାଇଥିଲା। ହଣ୍ଡପା ପୋଲିସ ପକ୍ଷରୁ ୫ ଜଣ ମଦ୍ୟପଙ୍କୁ କାବୁ କରାଯାଇଥିଲା। ଶାନ୍ତି ଶୃଙ୍ଖଳା ପାଇଁ ଅନୁଗୋଳ ଅତିରିକ୍ତ ଏସ୍ପି ପି.ସି.ଏଚ୍ ପ୍ରାଣିଗ୍ରାହୀ, ଆଠମଲ୍ଲିକ ଏସ୍ଡିପିଓ ବାଳକୃଷ୍ଣ କଅଁର, ହଣ୍ଡପା ଆଇଆଇସି ନମିତା ନାୟକ, କିଶୋରନଗର ଆଇଆଇସି ଲବ ବୋଡା, ୭ ଜଣ ଅଫିସରଙ୍କ ସମେତ ୨ ପ୍ଲାଟୁନ ଫୋର୍ସ ମୁତୟନ କରାଯାଇଥିଲା। ଯାତ୍ରା କମିଟିର ଜିତେନ୍ଦ୍ର ବେହେରା, ପ୍ରତାପ ପ୍ରଧାନ, ମାନସ କୁମାର ସାହୁ, ରାଜ କୁମାର ଅଗ୍ରୱାଲା, ଅରବିନ୍ଦ ସାହୁ, ଅନ୍ତର୍ଯ୍ୟାମୀ ବେହେରା, ଲକ୍ଷ୍ମୀଧର ବେହେରା, ଗିରୀଶ ବେହେରା, ଦୀପକ ଟିବ୍ରୁୱାଲାଙ୍କ ସମେତ ଗ୍ରାମବାସୀ ସହଯୋଗ କରିଥିଲେ।
