ଖଇରା,୨୨।୧୦(ଡି.ଏନ.ଏ.): କେନ୍ଦ୍ର ଓ ରାଜ୍ୟ ସରକାର କୃଷି ଓ କୃଷକର ଉନ୍ନତି କରୁଥିବା ନେଇ ଡିଣ୍ଡମ ପିଟୁଛନ୍ତି । ହେଲେ ସେପଟେ ସାର ଓ କୀଟନାଶକ ଦର ବର୍ଷକୁ ବର୍ଷ ହୁ ହୁ ହୋଇ ବଢୁଛି । ଜଳସେଚନ ବ୍ୟବସ୍ଥା ନ ଥିବାରୁ ଚାଷୀ ଠିକ୍ ସମୟରେ ରୁଆ ପୋତା କାର୍ଯ୍ୟ କରିପାରୁନି। ୫୦ରୁ ଅଧିକ ଉଠା ଜଳସେଚନ ଓ ବୋରଓ୍ବେଲ ଅକାମୀ ହୋଇପଡ଼ିଛି। ବିଳମ୍ବରେ ଚାଷ ଆରମ୍ଭ ଯୋଗୁ ଅମଳ ମଧ୍ୟ ଯଥେଷ୍ଟ କମିଯାଉଛି ।
ବଜାର ଦର ଯାହା ଚାଷ ଖର୍ଚ୍ଚ ମଧ୍ୟ ଭରଣା ହେଉନି । ଏଭଳି ପ୍ରତିକୂଳ ପରିସ୍ଥିତି ପାଇଁ ଖଇରା ବ୍ଲକର ୩୦ ପଞ୍ଚାୟତରେ ଚଳିତବର୍ଷ ୪୦ଭାଗ ଜମି ପଡ଼ିଆ ପଡ଼ିଛି।
ବେଳ ହୁଁ ସାବଧାନ ନ ହେଲେ ଆଗକୁ ଅଧିକ ଜମି ପଡ଼ିଆ ପଡ଼ିବା ସହ ଦାଦନ ଶ୍ରମିକଙ୍କ ସଂଖ୍ୟା ଯଥେଷ୍ଟ ବଢ଼ିବାର ସମ୍ଭାବନା ରହିଛି। ପ୍ରକାଶ ଯେ, ଖରିଫ ଋତୁରେ ଧାନ ଚାଷ ହେଉଥିବା ମୋଟ ୧୯ହଜାର ୪୦୦ ହେକ୍ଟର ଚାଷ ଜମି ମଧ୍ୟରୁ ଅନ୍ୟୁନ ୧୨ହଜାର ହେକ୍ଟର ଚାଷ ଜମିରେ ଚାଷ ପାଇଁ ଚାଷୀ ମୌସୁମୀ ଓ ଲଘୁଚାପ ଉପରେ ନିର୍ଭର କରିଥାନ୍ତି। ବ୍ଲକର ସାରଡାଙ୍ଗ, ନନ୍ଦୁରୁ, ମହତୀପୁର, ଗୋବିନ୍ଦପୁର, କୁରୁଣ୍ଟା, ଖଇରା, ନୟାଖଣ୍ଡି, ଶ୍ୟାମସୁନ୍ଦରପୁର, ଅଚ୍ୟୁତପୁର, ମାଖନପୁର, ଗଗନଧୂଳି, ଡଗରପଡା, ଡାଲଙ୍ଗ, ସାରୁଗାଁ, ସୁଣ୍ଢିରା, ଗଡପୋଖରୀ, କୁପାରୀ, କଇଥଗଡିଆ, ପଳସା, ଗୋଳିହା, ସାରକୋଣା ଆଦି ପଞ୍ଚାୟତରେ ଜଳସେଚନ ବ୍ୟବସ୍ଥା ନ ଥିବା କାରଣରୁ ବର୍ଷା ଏବଂ କାଁ ଭାଁ ଉଠାଜଳସେଚନ ଉପରେ ନିର୍ଭର କରିଥାନ୍ତି ।
ହେଲେ ଗତବର୍ଷ ମୌସୁମୀ ଓ ଲଘୁଚାପ ବର୍ଷା ଧୋକା ଦେଲା। ବହୁ ବିଳମ୍ବରେ ବର୍ଷା ଯୋଗୁ ବହୁ ଚାଷୀ ବିଲକୁ ଯାଇ ନ ଥିଲେ। ଯେଉଁମାନେ ଚାଷ କଲେ ଏକରରେ ୧୦ରୁ ୧୨ କୁଇଣ୍ଟାଲ ଧାନ ମିଳିଲା। ଯେଉଁ କାରଣରୁ ଚଳିତବର୍ଷ ବ୍ଲକରେ ପାଖାପାଖି ୪ହଜାର ୮ଶହ ହେକ୍ଟର ଜମି ପଡ଼ିଆ ପଡ଼ିଛି। ବାହାର ଦଲାଲମାନଙ୍କଠାରୁ ଯାହା ମିଳିଲା ତାହା ଅଧା ଖର୍ଚ୍ଚ ବି ଭରଣା ହେଲାନି ବୋଲି ଚାଷୀ ପ୍ରଶାନ୍ତ କୁମାର ରାଉତ କହିଛନ୍ତି । ହେଲେ ଚଳିତବର୍ଷ ମଧ୍ୟ ଆହୁରି ଅବସ୍ଥା ସାଂଘାତିକ। ସାର ଦର ୨ ଗୁଣା ହେବା ତାହା ପୁଣି ବଜାରରେ ଉପଲବ୍ଧ ନ ହେବା, ଉଠାଜଳସେଚନ ଅକାମୀ ହୋଇ ରହିବା, ଘରୋଇ ଏଜେନ୍ସି ଏବଂ ସମବାୟ ସମିତି ମାଧ୍ୟମରେ ଦିଆଯାଉଥିବା ବିହନ ଠିକ୍ ଭାବେ ଗଜା ନ ହେବା, ଷଣ୍ଢଙ୍କ ପ୍ରାଦୁର୍ଭାବ, ଆମ୍ବହତା କେନାଲ ଅସମ୍ପୂର୍ଣ୍ଣ ଯୋଗୁ ପାଣି ନ ଆସିବା ଭଳି କାରଣ ଯୋଗୁ ବହୁ ଚାଷୀ ଚାଷରୁ ମୁହଁ ଫେରାଇ ନେଇଥିବା ଗନ୍ଧାଳି ଗ୍ରାମର ସଞ୍ଜୟ ବେହେରା କହିଛନ୍ତି। ଠିକ୍ ସମୟରେ ବର୍ଷା ନ ହେବା ତଥା ତଳି ଗଜା ନ ହେବା ଯୋଗୁ ଏଥର ଚାଷ ଜମି ପଡ଼ିଆ ପଡ଼ିଥିବା ନେଇ ଦିଘି ତେନ୍ତୁଳି ଗ୍ରାମର ନିର୍ମଳ ପାଢୀ ଓ ପୁରସ୍ତମ ଦାସ କହିଛନ୍ତି । ଏ ସମ୍ପର୍କରେ ବ୍ଲକ ସହକାରୀ କୃଷି ଅଧିକାରୀ ସରୋଜ କୁମାର ଜେନାଙ୍କ ମତାମତ ନେବାରେ ସେସବୁ ପଞ୍ଚାୟତରୁ ରିପୋର୍ଟ ଆଣିବା ପରେ କେତେ ପଡ଼ିଆ ପଡ଼ିଛି ତାର ଆକଳନ କରାଯାଇପାରିବ ବୋଲି କହିଛନ୍ତି ।
