ଲକ୍ଷ୍ନୌ, ୯।୨: ଉତ୍ତର ପ୍ରଦେଶରେ ୪ ବିବାହିତା ମହିଳା ପ୍ରଧାନମନ୍ତ୍ରୀ ଆବାସ ଯୋଜନା (ପିଏମ୍ଏଓ୍ବାଇ) ଟଙ୍କା ନେଇ ନିଜ ନିଜ ପ୍ରେମିକଙ୍କ ସହ ଫେରାର ହୋଇଯାଇଛନ୍ତି। ଘଟଣାରେ ସମ୍ପୃକ୍ତ ମହିଳାମାନେ ଉତ୍ତରପ୍ରଦେଶର ବେଲହରା, ବାଙ୍କି, ଜେଦପୁର ଏବଂ ସିଦ୍ଧଉର ଜିଲାର ବୋଲି ଜଣାପଡ଼ିଛି। ପିଏମ୍ଏଓ୍ବାଇର ପ୍ରଥମ ପାଳି ୫୦,୦୦୦ ଟଙ୍କା ଯୋଗ୍ୟ ହିତାଧିକାରୀଙ୍କ ବ୍ୟାଙ୍କ ଆକାଉଣ୍ଟକୁ ପଠାଯାଇଥିଲେ ସୁଦ୍ଧା ଘର ନିର୍ମାଣ କାର୍ଯ୍ୟ ଆରମ୍ଭ ହୋଇ ନ ଥିବାରୁ ସମ୍ପୃକ୍ତ ମହିଳାଙ୍କ ସ୍ବାମୀମାନେ ଏବେ ଅଡ଼ୁଆରେ ପଡ଼ିଯାଇଛନ୍ତି।
କାରଣ ଜିଲା ସହରାଞ୍ଚଳ ଉନ୍ନୟନ ଏଜେନ୍ସି (ଡିୟୁଡିଏ) ଅଫିସର ସୌରଭ ତ୍ରିପାଠୀ ନୋଟିସ୍ ଜାରି କରି ଘର ନିର୍ମାଣ କାର୍ଯ୍ୟ ଖୁବ୍ ଶୀଘ୍ର ଆରମ୍ଭ କରିବାକୁ ନିର୍ଦ୍ଦେଶ ଦେଇଛନ୍ତି। ନୋଟିସ୍ ପାଇବା ପରେ ସମ୍ପୃକ୍ତ ମହିଳାଙ୍କ ସ୍ବାମୀମାନେ ଅଫିସରଙ୍କ ନିକଟରେ ପହଞ୍ଚି ସେମାନଙ୍କୁ ସବୁ କଥା ଜଣାଇଥିଲେ। ଏଥିସହ ଯୋଜନା ନେଇ ପଠାଯିବାକୁ ଥିବା ଦ୍ୱିତୀୟ ପାଳି କିସ୍ତି ଉକ୍ତ ବ୍ୟାଙ୍କ ଆକାଉଣ୍ଟକୁ ନ ପଠାଇବା ଲାଗି ସେମାନେ ଅଫିସରଙ୍କୁ ସତର୍କ କରିଥିଲେ। ଉକ୍ତ ମହିଳାମାନଙ୍କଠାରୁ ଟଙ୍କା କିପରି ଭାବେ ଫେରସ୍ତ ମିଳିବ ସେ ନେଇ ସରକାରୀ ସ୍ତରରେ କାର୍ଯ୍ୟ ଚାଲିଥିବା ଡିୟୁଡିଏ ଅଫିସର କହିଛନ୍ତି। ଆର୍ଥିକ ସ୍ତରରେ ପଛୁଆ ଏବଂ ନିମ୍ନ ମଧ୍ୟବିତ୍ତ ପରିବାରକୁ ଉତ୍ତମ ବାସଗୃହ ଯୋଗାଇ ଦେବା ଲାଗି କେନ୍ଦ୍ର ସରକାରଙ୍କ ପକ୍ଷରୁ ପ୍ରଧାନମନ୍ତ୍ରୀ ଆବାସ ଯୋଜନା ଆରମ୍ଭ କରାଯାଇଛି। ଯୋଜନା ଅନ୍ତର୍ଗତ ପରିବାରର ମହିଳାଙ୍କ ଖାତାଙ୍କୁ ହିଁ ଏହି ଟଙ୍କା ପଠାଯାଇଥାଏ।
