ଫୁଲବାଣୀ ଅଫିସ/ଫିରିଙ୍ଗିଆ/ଗୋଚ୍ଛାପଡା, ୧୦ା୬: କନ୍ଧମାଳ ଜିଲା ଗସ୍ତରେ ଶୁକ୍ରବାର ରାଜ୍ୟ ସରକାରଙ୍କ ୩ ଜଣ ମନ୍ତ୍ରୀ ଆସି ଫିରିଙ୍ଗିଆ ବ୍ଲକରେ ବିଭିନ୍ନ କାର୍ଯ୍ୟକ୍ରମର ଉଦଘାଟନ କରିଛନ୍ତି ା ଏଥିସହ ୪ଟି ବିଜୁ ସେତୁର ଭିତ୍ତିପ୍ରସ୍ତର ସ୍ଥାପନ କରିଛନ୍ତି ା ମନ୍ତ୍ରୀମାନେ ଯୋଗଦେଇ ସରକାରଙ୍କ ବିଭିନ୍ନ ଯୋଜନା ଉପରେ ଲୋକଙ୍କୁ ଅବଗତ କରିବା ସହ ଓଡିଶାର ଆତ୍ମା ଗ୍ରାମାଞ୍ଚଳରେ ରହିଛି। ଗ୍ରମାଞ୍ଚଳର ଉନ୍ନତି ହେଲେ ରାଜ୍ୟର ଉନ୍ନତି ହେବ ବୋଲି କହିଛନ୍ତି। ସ୍ଥାନୀୟ ଲୋକଙ୍କର ଯେଉଁ ଦାବି ରହିଛି ତାହା ଉପରେ ମୁଖ୍ୟମନ୍ତ୍ରୀଙ୍କୁ ଅବଗତ କରାଯାଇ ସେସବୁ କାର୍ଯ୍ୟ ସମ୍ପାଦନ କରାଯିବ ବୋଲି ମନ୍ତ୍ରୀମାନେ ପ୍ରକାଶ କରିଛନ୍ତି ା
ରାଜ୍ୟ ସରକାରଙ୍କ ଜଙ୍ଗଲ ଓ ପରିବେଶ, ପଞ୍ଚାୟତିରାଜ ମନ୍ତ୍ରୀ ପ୍ରଦୀପ ଅମାତ, ଆଦିବାସୀ ଓ ହରିଜନ କଲ୍ୟାଣ, ପଛୁଆବର୍ଗ ମନ୍ତ୍ରୀ ଜଗନ୍ନାଥ ସାରକା, ଗ୍ରାମ୍ୟ ଉନ୍ନୟନ ଓ ପ୍ରଯୁକ୍ତି ବିଦ୍ୟାମନ୍ତ୍ରୀ ପ୍ରୀତିରଞ୍ଜନ ପ୍ରଥମେ ବ୍ଲକ ପରିସରରେ ନୂତନ ଭାବେ ନିର୍ମିତ ମିଶନ ଶକ୍ତି ଗୃହ ଉଦ୍ଘାଟନ କରିଥିଲେ ା ସେଠାରେ ସ୍ବୟଂ ସହାୟିକାଙ୍କ ପକ୍ଷରୁ ପ୍ରସ୍ତୁତ ଖାଦ୍ୟ ଖାଇ ସେମାନଙ୍କ ସହ ଭାବ ବିନିମୟ କରିଥିଲେ। ଏହାପରେ କାଶିନିପଦରରେ ନିର୍ମିତ ନୂତନ ମାର୍କେଟ କମ୍ପ୍ଲେକ୍ସ ଉଦ୍ଘାଟନ କରିଥିଲେ। ପରେ ଗୋଚ୍ଛାପଡା ଯାଇ ସେଠାରେ ୪ଟି ନୂତନ ବିଜୁ ସେତୁ ଯଥା ଟେଲାପାଲିରୁ ଗଞ୍ଜୁଖୋଲ ରାସ୍ତାର ନାଳ ଉପରେ ପୋଲ, ସଲାଗୁଡାରୁ ବଇପଙ୍ଗା ରାସ୍ତାର ବାଘ ନଦୀ ଉପରେ ପୋଲ, ସଲାଗୁଡା ରାସ୍ତାର ମାଣିଜିରୁ ନାଳ ଉପରେ ପୋଲ, କ୍ରାଣ୍ଡିବାଲିରୁ ପାହିରାଜୁ ରାସ୍ତା ବାଘ ନଦୀ ଉପରେ ପୋଲର ଭିତ୍ତିପ୍ରସ୍ତର ସ୍ଥାପନ କରିବା ପରେ ସାଧାରଣ ସଭାରେ ଯୋଗ ଦେଇଥିଲେ ା ଗୋଚ୍ଛାପଡାକୁ ଏକ ବ୍ଲକ କରିବା, ପିଲାମାନଙ୍କ ଭବିଷ୍ୟତକୁ ଦୃଷ୍ଟିରେ ର୍ଖି ଗୋଚ୍ଛାପଡାରେ ଯୁକ୍ତ ୨ କଲେଜ ଖୋଲିବା, ଗୋଚ୍ଛାପଡା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରକୁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ପରିଣତ କରିବା, ଗ୍ରାମଞ୍ଚଳକୁ ରାସ୍ତା କରିବା ଆଦି ଉପରେ ସ୍ଥାନୀୟ ସରପଞ୍ଚମାନେ ଦାବି କରିଥିଲେ ା ଫୁଲବାଣୀ ବିଧାୟକ ଅଙ୍ଗଦ କହଁର ସଭା ପରିଚାଳନା କରିଥିଲେ। ଅନ୍ୟମାନଙ୍କ ମଧ୍ୟରେ ସ୍ବତନ୍ତ୍ର ଉନ୍ନୟନ ପରିଷଦ ଅଧ୍ୟକ୍ଷ ରୋଦନ ମଲ୍ଲିକ, ଜିଲା ପର୍ଯ୍ୟବେକ୍ଷକଙ୍କ ସମେତ ବିଭିନ୍ନ ପଞ୍ଚାୟତର ସରପଞ୍ଚ, ଜିଲା ପରିଷଦ ସଭ୍ୟ, ବିଜେଡି ଜିଲା କର୍ମକର୍ତ୍ତା ଉପସ୍ଥିତ ଥିଲେ।
