ଯୋଡା, ୨୩।୪: (ଡି.ଏନ୍.ଏ.) କେନ୍ଦୁଝର ଜିଲା ଯୋଡ଼ାସ୍ଥିତ ୫୨୦ ନଂ. ଜାତୀୟ ରାଜପଥର ଲହଣ୍ଡା ରେଲୱେ ଓଭର ବ୍ରିଜ୍ ନିକଟରେ ଶନିବାର ୨ ଟ୍ରକ୍ ମଧ୍ୟରେ ଧକ୍କା ହୋଇ ଫସି ରହିଥିଲା। ଫଳରେ ଦୀର୍ଘ ୪ଘଣ୍ଟା ରାସ୍ତା ଜାମ୍ ହୋଇ ଟ୍ରାଫିକ୍ ସମସ୍ୟା ଦେଖାଯାଇଥିଲା। ଲୋକେ ଜାମ୍ରେ ଫସି ହନ୍ତସନ୍ତ ହୋଇଥିଲେ। ରାଜପଥ କାମ ଅଧାପନ୍ତରିଆ ହୋଇ ପଡ଼ିଥିବାରୁ ଦୁର୍ଘଟଣା ଘଟୁଛି ବୋଲି ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ପ୍ରକାଶ ଯେ, ଉକ୍ତ ଓଭର ବ୍ରିଜ୍ ରାସ୍ତା ଦେଇ ଗୋଟିଏ ଟ୍ରକ୍ ଯାଉଥିଲା। ଅଣ ଓସାରିଆ ରାସ୍ତାରେ ସେହି ସମୟରେ ଅନ୍ୟ ଏକ ଟ୍ରକ୍ ଜବରଦସ୍ତ ଯିବାକୁ ଚେଷ୍ଟା କରିବା ବେଳେ ଧକ୍କା ହୋଇଥିଲା। ପରେ ରାସ୍ତାରେ ଚଳାଚଳ ସମ୍ପୂର୍ଣ୍ଣ ଠପ୍ ହୋଇଯାଇଥିଲା। ଯୋଡ଼ା, ଭଦ୍ରାସହି, ବଡ଼ବିଲକୁ ସଂଯୋଗ ପାଇଁ ଏହା ହିଁ ଏକ ମାତ୍ର ରାସ୍ତା ହୋଇଥିବାରୁ ପ୍ରାୟ ୪ଘଣ୍ଟାରୁ ଊଦ୍ଧର୍ବ ସମୟ ଧରି ଯାତ୍ରୀବାହୀ ବସ୍, କ୍ଷୀର ଗାଡ଼ି, ଛୋଟ ବଡ଼ ଯାନବାହନ, ଏପରିକି ରୋଗୀ ନେଇ ଯାଉଥିବା ଆମ୍ବୁଲାନ୍ସ ମଧ୍ୟ ଅଟକି ରହିଥିଲା। ଉଭୟ ପାର୍ଶ୍ୱରେ ପ୍ରାୟ ୫କି.ମି. ବ୍ୟାପି ଗାଡ଼ି ଲମ୍ବି ରହିଥିବା ଦେଖିବାକୁ ମିଳିଥିଲା। ଘଟଣାସ୍ଥଳରେ ପୋଲିସ ପହଞ୍ଚତ୍ଥିଲେ ହେଁ ଟ୍ରାଫିକ ନିୟନ୍ତ୍ରଣ କରିବାକୁ ନାକେଦମ ହେବାକୁ ପଡ଼ିଥିଲା। ଜାତୀୟ ରାଜପଥ ପ୍ରାଧିକରଣ ବିଭାଗ ପକ୍ଷରୁ ୫୨୦ ନଂ. ଜାତୀୟ ରାଜପଥର ୪ ଲେନ୍ ରାସ୍ତା ନିର୍ମାଣ ସମ୍ପୂର୍ଣ୍ଣ କରାଯାଇଛି। ମାତ୍ର କଳାପାହାଡ଼ଠାରୁ ଲହଣ୍ଡା ପର୍ଯ୍ୟନ୍ତ ରାସ୍ତା ସମ୍ପୂର୍ଣ୍ଣ ହୋଇନାହିଁ। ଅଣଓସାରିଆ ଓ ବିପଦସଙ୍କୁଳ ଅବସ୍ଥାରେ ଏହି ଓଭର ବ୍ରିଜ୍ ରହିଥିବାରୁ ରାସ୍ତା ଦେଇ କେବଳ ଗୋଟିଏ ମାତ୍ର ଟ୍ରକ୍ ଅତିକ୍ରମ କରିଥାଏ। ଏକାଧିକ ଭାରିଯାନ ଚଳାଚଳ କଲେ ଅନେକ ସମୟରେ ଦୁର୍ଘଟଣା ଘଟିଥାଏ। ବିଭାଗୀୟ ଖାମଖିଆଲ ନୀତି ଯୋଗୁ ଲୋକେ ହନ୍ତସନ୍ତ ହେଉଥିବା ଅଞ୍ଚଳର ଶ୍ୟାମ ପାତ୍ର, ଗୁରୁଚରଣ ମୁଣ୍ଡା, ରାଜେଶ ଓରାମ ପ୍ରମୁଖ ଅଭିଯୋଗ କରିଛନ୍ତି।
